Isaia 30:16 - Baibuli Ekibono kya Katonda 2014

¹⁶ Mwakoba muti: “Busa naire! Titwidha kukola ekyo, twidha kuvuga embalaasi dhaife tulumuke ku bazigu baife.” Aye waire mwesigulira ku mbalaasi dhaimwe muti dhirumuka inho, embalaasi edh'abazigu abababingirira n'edhisinga kuba na mbiro.

Isaia 30:16 ပူးပေါင်းရင်းမြစ်များ

2 Bakyabazinga 25:5

Aye ab'eigye ly'Abababilonia baabingirira kyabazinga Zedekia, baamutuukaku mu kiketezo eky'oku museetwe eky'e Yeriko, eigye lye lyonalyona lyasansaana lyamulekulira agho.

Yobu 39:11

Onaagyesiga olw'amaani gaayo amangi, waagirekera omulimo gw'enaakukolera?

Zabbuli 147:10

Eisanhu lye tiriri mu kuba na mbalaasi dha maani, waire okuba n'abalwani ab'amaani,

Zabbuli 33:17

Ole aba yeerimba bw'asuubira okughangula olutalo n'embalaasi; amaani gaayo amangi tigasobola kumuwonia.

Isaia 2:7

Ensi yaibwe eidhwire feeza ni zaabu, era obukombe bwaibwe tibukoma. Ensi yaibwe eidhwire mbalaasi, era ebigaali byaibwe eby'omu lutalo tibiwaayo.

Isaia 31:1

Bakagwireku abo abaja e Misiri okufunayo obuyambi, abeesiga embalaasi dhaayo, ni beesiga n'abavuzi baadho olw'okuba ab'amaani, era ni beesiga n'ebigaali byayo eby'omu lutalo olw'okuba ebingi einho. Aye ni baaloba okwesiga Musengwa Katonda Omutukuvu wa Isiraeli, waire okumwebuuzaaku abayambe!

Isaia 31:3

Abamisiri bantu buntu, se ti Katonda. N'embalaasi dhaibwe dhiri na mubiri, se ti mwoyo mwereere. Musengwa Katonda bw'aligalula omukono gwe okubonereza, abayambi baligangalima, era n'abo be bayamba baagwa, olwo boonaboona baazikirira.

Yeremia 39:4

Kyabazinga Zedekia n'abaisirukale be boonaboona bwe baabona ebigwiregho, baalumuka bave mu kibuga obwire. Baagema engira ebitira mu nimiro ya kyabazinga, baabita mu mulyango oguyimba ebimante ebibiri, baaja nga boolekeire ekiiko ekirimu omwiga Yorudani.

Yeremia 4:13

Bona, abazigu baabale bali kwidha ng'oti bire. Ebigaali byaibwe eby'omu lutalo birumuka ng'oti mpewo eyeezungulula n'amaani bw'eidha; n'embalaasi dhaibwe dhiziinhuuka okusingaku n'enkookooma. Tukagwireku ife era tuzikiriire!

Yeremia 46:6

Ni bale abasinga kuziinhuuka mbiro tibasobola kulumukagho; abalwani ab'amaani abo tibasobola okwewonia. Ere ku luuyi olw'omukono omugooda olw'e buvandhuba, okumpi n'omwiga Eufurate, bagangaliime baagwa.

Yeremia 52:7

Agho baawomola ekituli mu kimante eky'oku kibuga, kyabazinga n'abaisirukale boonaboona baalumuka obwire, waire nga Abababilonia baali bazingiiza ekibuga ku ndhuyi dhoonadhoona. Baagema engira ebitira mu nimiro ya kyabazinga, baabita mu mulyango oguyimba ebimante ebibiri, baaja nga boolekeire ekiiko ekirimu omwiga Yorudani.

Okulira 4:19

Abazigu nga batubingirira embiro okusingaku n'enkookooma bw'eguluka mu ibbanga; baatubingirira mu nsozi, era baatweteega ni mu irungu.

Amosi 9:1

Nabona Musengwa Katonda ng'ayemereire ku mbali kw'alutaari, era yaalagira ati: “Kuba emitwe egy'empagi edh'eisinzizo okutuusa lwe linaatengeeta. Era menha emitwe egy'empagi edho dhikube emitwe egy'abantu boonaboona. Abo abataafe mu nsambo eyo, ndidha kubasindika bafiire mu lutalo. Ku abo ezira aja kulumukagho waire okuwonagho.

Mika 1:13

Imwe abantu ababa mu kibuga Lakishi musibe ebigaali byaimwe eby'omu lutalo ku mbalaasi dhaimwe mwetegeke. Mwakoopa ebibi eby'Abaisiraeli, mwaleetera ab'e Yerusalemu boona baababoneraku, baatoolera okukola ebibi n'ebirala ebyo.

Habakkuku 1:8

“Embalaasi dhaibwe dhirumuka embiro okusingaku n'empala, era nkambwe okusingaku emisege egiri endhala einho; dhimaduka nga dhizira kye dhitya. Abadhivuga bava ghala, baidha nga baguluka buguluke ng'oti n'enkookooma bw'eika n'eswankula ky'eja okulya.

Amateeka Agokubiri 28:25

“Musengwa Katonda aidha kuleeteranga abazigu baimwe babaghangulenga nga babona. Mwidha kujiiranga mu ngira ndala nga muja okubalumba, aye mwidha kwiriranga mu ngira kamaala nga muli kughaba okulumuka okuva ghe bali. Amaghanga goonagoona ku nsi bwe ganaabonanga ebibatuuseeku, gaidha kutyanga inho.

Amateeka Agokubiri 28:49

Musengwa Katonda alibasindikira abantu ab'eighanga erindi, aboogera olulimi lwe mutategeera. Abantu abo alibatoola ku nkomerero y'ensi, baabalumba nga baziinhuuka ng'oti n'enkookooma bw'eziinhuuka.