Isaia 27:9 - Baibuli Ekibono kya Katonda 2014

⁹ Aye Abaisiraeli balisoniyibwa ebibi byaibwe, nga bamaze okumenhamenha alutaari dh'emisambwa n'okusekulasekula amabaale gaadho ni gafuuka ensaano. Era nga bamaze okukomya okuniokezanga obubbaani ku alutaari edho, era nga basaaniizaagho kiisi kamanhiso akooleka omusambwa omukazi Ashera.

Isaia 27:9 ပူးပေါင်းရင်းမြစ်များ

2 Bakyabazinga 10:26

baatoolamu empango ya Baali, baagyokya.

2 Bakyabazinga 23:14

Kyabazinga Yosia yaamenhamenha empango, era yaatematema n'ebifaananie eby'omusambwa Ashera. Mu bifo byabyo yaidhuzaamu amagumba g'abafu.

2 Bakyabazinga 25:9

Yaayokya eisinzizo lya Musengwa Katonda, n'ekisaagaati kya kyabazinga, n'ebizimbe byonabyona ebikologho eby'omu Yerusalemu.

2 Ebyomubyanda 14:5

Era yaatoola mu bibuga byonabyona ebya Buyudaaya, ebifo ebigulumivu eby'okusinzizaamu, ni alutaari edh'okuniokezaaku obubbaani. Kale, mu biseera bye, obwakyabazinga bwe bwaba mu miraala.

2 Ebyomubyanda 34:4

Baamenhamenha alutaari edh'omusambwa Baali nga Yosia aligho mwene, baatematema ni alutaari edh'okuniokezebwaku obubbaani edhaali ghaigulu gh'edho. Baamulungula ebifaananie eby'omusambwa omukazi Ashera, n'ebifaananie ebindi ebibaadhe, n'ebyo ebyakolebwa mu kyuma ekisaanuusiibwa, baabisa byafuuka nkungu era enkungu eyo baagimansira ku magombe g'abo abaaghangayo emisengo y'ebifaananie ebyo.

2 Ebyomubyanda 36:19

Yaayokya eisinzizo, yaamenhagho ekimante ekyali kyezungulula Yerusalemu, yaayokya amayumba gaamu goonagoona, era yaazikiriza n'ebintu byamu ebirungi byonabyona.

Zabbuli 119:67

Nali ndaaliimye okuva mu ngira entuufu, iwe wankangaivula, aye buti tiva ku kibono kyo.

Zabbuli 119:71

Okukangaivulwa kwange kwankola bukalamu, kuba kwandeetera okwega okukola by'olagira.

Okuvaayo 34:13

Mu kifo eky'okukola nabo endagaano, mumenhemenhegho alutaari dhaibwe, n'ebituuti byaibwe eby'amabaale, era n'ebifaananie bya Ashera, omusambwa gwaibwe omukazi.

Ensambo 20:30

Emiigo eginuubula gigolola empisa embi, n'okuwaiga omuntu kwamumaliramu irala emize emibi.

Isaia 1:29

Ensoni dhiribagema imwe olw'emiti emikologho gye mwasinzanga, n'olw'enimiro dhe mwasengangamu emisambwa.

Isaia 17:8

Balirekera agho okufangayo einho ku alutaari dhe beekolera beene n'engalo edhaibwe, era baalekera agho okwesiganga ebintu obuntu beene bye beekolera ka bibe ebifaananie bya Ashera omusambwa gwaibwe omukazi, oba alutaari edhiniokezebwaku obubbaani.

Isaia 30:22

Olwo mulitoola ebifaananie byaimwe ebibaadhe bye mwalimbyaku feeza, n'ebyo bye mwakola mu zaabu, mwabisuula ere ng'ebintu ebitali birongoofu, nga mukoba muti: “Muje ere, era timwiranga!”

Isaia 4:4

Agho Musengwa Katonda aliba ng'amaze okukozesa obuyinza bwe okusalira omusango abantu b'omu Yerusalemu, n'okubanaazaaku ebibi byaibwe, n'okutoola ku Yerusalemu omusango ogw'obutemo bwe baakikoleramu.

Isaia 40:2

Mwize amaani mu bantu b'omu Yerusalemu. Mubakobe muti mpegaano okudaazibwadaazibwa kukomye, era ebibi byaibwe bisoniyiibwa. Nze Musengwa Katonda namala okubagha ekibonerezo ekibajaamu olw'ebibi byaibwe.”

Isaia 48:10

Mubone eno, nabaleba nga mbabisa mu kudaazibwadaazibwa, ng'oti ni feeza bwe bamukenenula mu muliro. Era naakizuula nga ghazira kye mugasa.

Ezekieli 11:18

Era bwe baliira, balitoolagho ebintu byonabyona ebibi ebyenhinhalwa.

Ezekieli 20:38

Ndibasunsulamu abo abadheemu, n'abo abakola ebibi ni bansungughaza. Ndibatoola mu nsi dhe baasengamu, aye tiribaganha kwirayo mu Isiraeli. Olwo mulimanha nga ninze Musengwa Katonda.”

Ezekieli 6:4

Alutaari dhaibwe dhirisigala bw'agho bifulukwa, n'edho edhiniokezebwaku obubbaani dhoona dhaamenhebwamenhebwa. Emirambo egy'abantu abaliitibwa girisuulibwa agho mu maiso ag'ebisinzibwa byaibwe ebitali Katonda.

Danieli 11:35

Abandi ku bakulembeze abagezi abo baliitibwa. Olwo okwitibwa kwaibwe okwo kwaleetera abantu okwamulwa, baatukuzibwa era baafuulibwa balongoofu. Ekyo kiribaagho okutuusa ekiseera eky'enkomerero Katonda mwene kye yategeka nga kimaze okutuuka.

Hosea 14:8

Abaisiraeli tibaliirayo kabiri kusinza ebitali Katonda. Ndidha kubaghanga kye banansabanga, era ndidha kubalabiriranga. Ndidha kubateerangagho ekinsense ng'oti n'omuti ogutawaawuza makaba. Ninze ensimuko ey'ebirungi byonabyona bye bafuna.”

Abalevi 26:30

Ndidha kuzikiriza ebifo byaimwe ebigulumivu bye musinzizaamu emisambwa, era mmenheregho irala alutaari dhe muniokezaaku obubbaani olw'emisambwa egyo, n'emirambo gyaimwe ngisuule ku bifaananie eby'emisambwa egyo gye musinza. Mu busungu obungi

Mika 5:11

Ndizikiriza ebifo byaimwe eby'okwewogomamu n'ebibuga byonabyona.

Zekaria 13:2

Nditoola mu nsi Isiraeli ebisinzibwa ebitali Katonda, ghalobe kubaagho muntu abiidhukira waire okwidhukira amaina gaabyo. Nditoolagho n'abo boonaboona abeeyeta abalanzi, era naatoola ni mu bantu omwoyo ogwenda okusinza ebitali Katonda.

Ab'e Roma 11:27

Era eno n'eriba endagaano nabo, bwe ndibatoolaku ebibi byaibwe.”

1 Ab'e Korintho 11:32

Aye Musengwa bw'atusalira omusango n'atukangaivula, atwegeresa tulobe kusalirwa musango kutusinga aghalala n'ensi.

Amateeka Agokubiri 12:3

Mumenhemenhengagho alutaari dhaibwe, mutemetemenga empango dha bakatonda baibwe edh'amabaale, mwokyeyokyenga ebifaananie ebibaadhe eby'omusambwa gwaibwe omukazi Ashera, era mwasaageyasaagenga ebintu byaibwe bye basinza ebitali Katonda, byerabirirwenga irala ku nsi.

Abaheburayi 12:6

Kuba Musengwa akangaivula oyo y'agonza, era abonereza kiisi y'ayeta omwana we.”