Isaia 27:11 - Baibuli Ekibono kya Katonda 2014

¹¹ Ensaga dh'emiti gyamu bwe dhikala, abakazi badhikookola, baadhigherera ng'enku. Era ng'abantu abo bwe baziramu naire akategeera, Katonda eyabatonda talibasaasira waire okubagemerwa ekivunika.

Isaia 27:11 ပူးပေါင်းရင်းမြစ်များ

Zabbuli 106:40

Agho obusungu bwa Musengwa Katonda bwatumbukira ku bantu be abo ng'oti muliro, Musengwa Katonda oyo yaatuuka okwesinwa abantu be abo beene be yeerondera.

Isaia 1:3

Ente emanha mwene yo, n'endogoyi yaamanha ekintu musengwa waayo mw'agigheera eby'okulya; aye abantu bange Abaisiraeli okumanha okwaibwe tikutuuka agho, era abantu bange abo baziramu kategeera naire.”

Isaia 18:5

Alizikiriza abalwani b'abantu abo nga bakaali na kulumba, ng'oti n'omuntu bwe yandiidhie ku muti ogumaze okumulisa ekimuli, nga gutaireku n'ebibala era nga biri na kwenga, aye nga bakaali bwa kubinoga, memale n'atema ensaga n'adhighanulayo yoonayoona ye dhaalandira.

Isaia 43:1

Aye mpegaano iwe Isiraeli, Musengwa Katonda eyakutonda akoba ati: “Otatya, kuba ndidha kukununula. Era namala irala okukweta eriina lyo, buti oli wange.

Isaia 43:7

Abantu abo boonaboona bange ku bwange, era beetebwa liina lyange. Ekyabantondesa ni mbataagho, n'okumpeesanga ekitiisa.”

Isaia 44:2

Mulobe kutya, kuba muli bagheereza bange, era abantu bange be nalondamu, be ngonza. Nze ninze Musengwa Katonda eyabatonda ni mbata mu nda dha bainhaimwe, era ndidha kubayambanga.

Isaia 44:24

“Ninze Musengwa Katonda Omununuzi waimwe, eyabatonda ni mbata mu nda dha bainhaimwe. Ninze Musengwa Katonda eyakola ebintu byonabyona, ni mmambagho eigulu zenka, era ni nhandhagho ensi nga ghazira angemeireku naire.

Isaia 5:13

Kale abantu bange kye baliva ni batwalibwa mu bunhage, olw'obutaba na kumanha. Abakungu baibwe endhala eribaita, n'abantu baibwe boonaboona baafa olw'endiwo.

Isaia 9:17

Kale ni, Musengwa Katonda talireka abaana baibwe abaakaisuka kuwonagho, waire okusaasira banamwandu baibwe oba abaana baibwe bamulekwa; kuba abantu boonaboona tibatya Katonda, bakola ebibi era boogerayogera eby'ekisiru. Aye waire ng'ebyo bimaze okubaagho, obusungu bwe bwidha kusigala nga bukaaligho. Era asigale ng'akaagalwire omukono gwe okubabonereza.

Yeremia 11:16

Ghaligho olundi lwe nabeetaku omuti omwoliva ogusagaatiriire amakaba n'ebibala ebiboneka obulungi einho. Aye buti ndidha kugusindikaku kiwunga ow'amaani alimu n'okutyabuka, agukunaanieku omuliro, ensaga dhaagwo dhisiriire.

Yeremia 13:14

Memale mbakontaganie buli muntu ku mwine, k'abe omuto oba omukulu. Nga ghazira kusaasira, oba okusonigha, waire okugemerwa omuntu ekivunika, aye okutoolaku okubazikiriza obuzikirize.”

Yeremia 16:5

“Otangiranga mu ndhu omuli abali kulira abafu. Otajangayo kubalirisaaku waire okubagumya. Abantu abo, nze Musengwa Katonda, nabatoolaku emiraala gyange, naalekera agho okubagonzanga n'okubasaasiranga.

Yeremia 25:37

era ensi yaibwe eyabangamu emiraala agirese agho etyo ng'eri bifulukwa byereere, olw'obusungu bwe obubitirivu.

Yeremia 4:22

Musengwa Katonda akoba ati: “Abantu bange basiru tibandidhi naire. Basiru ng'oti bwa baana bato; baziramu kutegeera naire. Bakugu mu kukola ebibi, aye tibaidhi kukola birungi.”

Yeremia 8:7

Ni bw'aba sekanhulya amanha ebiseera bye eby'okwiriramu eka. Enjiibwa n'obumiini ni ŋaali, bikuuma ebiseera byabyo eby'okusengukiramu. Aye imwe abantu bange timwidhi mateeka gange nze Musengwa Katonda.

Ezekieli 19:12

Aye abantu baagwiwululagho n'emizi mu busungu, baagusuula ghansi. Empewo eva e buvandhuba yaidha yaagukaza. Ebibala byagwo baabikunkumusa ghansi, n'ensaga dhaagwo baadhikookola dhaakala, era baadhookya omuliro.

Ezekieli 20:47

Koba ekibira ekyo ekiri mu kiketezo ekikalukalu ekyo, kiwulirise nze Musengwa Katonda bye ndikukoba nti: Bona eno, ndikukunaaniaku omuliro gwayokya buli muti gwonagwona ogukulimu, ka gube omubisi oba omukalu. Omuliro gulibbeibbera era tighalibaagho muntu asobola kuguzikiza. Gulyokerera buli muntu, okuva ku luuyi olw'omukono omusaadha olw'e buvandhuba okutuuka ku luuyi olw'omugooda olw'e buvandhuba.

Ezekieli 9:10

Aye tirisaasiraku naire omulala ati, oba okumugemerwa ekivunika. Ndibeesasuulizaaku olw'ebyo bye baakola.”

Hosea 4:14

Tiribonereza baghala baimwe nga bakoze obwamalaaya, waire okubonereza bakazi baimwe nga bakoze obwenzi; kuba n'imwe abasaadha beene muja n'abakazi bamalaaya ab'omu isabo, era mwabeeyimbaku mwaghaayo emisengo. Kale ni abantu abatategeera balizikirira.

Hosea 4:6

Abantu bange bazikirira olw'okuba tibandidhi nze. Imwe bakabona mwaloba okuumanha nze, kale ni zeena ndibaloba okuba bakabona bange. Era nga bwe mwerabira amateeka gange nze Katonda waimwe, zeena nja kwerabira abaana baimwe.

Matayo 13:15

kuba omwoyo ogw'abantu bano mukalangafu, amatu gaibwe gasembye, n'amaiso gaibwe bagazibye. Nkani bandiboine n'amaiso gaibwe, bandiwuliire n'amatu gaibwe, baategeera n'omwoyo, baakyukira ye ndi naabawonia.’

Matayo 13:19

Yeenayeena awulira ekibono eky'Obwakyabazinga n'atakitegeera, ali ng'oti n'ensigo eyagwa ku ngira omubi aidha yaswankula ekyo ekisigiibwa mu mwoyo gwe.

Matayo 3:10

Kwo n'okuba empasa eteereibwa ku kikolo eky'emiti kale buli muti ogutaania bibala bikalamu gwa kutemebwa gusuulibwe mu muliro.

Yoanne 15:6

Oyo atasigala mu nze asuulibwa ere ng'oti n'olusaga bwe lusuulibwa ere ni lukala ensaga ng'oti n'edho dhisolozebwa dhaasuulibwa mu muliro dhaaya.

Ab'e Roma 1:28

Olw'okuba baaloba okumanha Katonda, kyova Katonda yabaleka ni badankaana mu myoyo, ni bakola ebitasaana.

Ab'e Roma 1:31

Basirusiru, tibeesigwa, tibagonzania era bazira kusaasira.

Amateeka Agokubiri 4:6

Mubikuumenga era mubituukirizenga, kuba ekyo n'ekinaayolekanga abantu abamaghanga agandi nga bwe muli n'amagezi n'okutegeera. Bwe banaawuliranga amateeka ago goonagoona, baidha kukobanga bati, ‘Bwenebwene eighanga lino eikologho, lya bantu bagezi era abategeevu!’

1 Ab'e Thessalonika 2:16

nga batwekiika emberi tulobe kukobera abamaghanga agandi ebibono eby'okubalokola. Ekyo buliidho kyaidhuuliriza ebibi bye bakola. Aye ekiviire mu ebyo ni Katonda okubamaliraku ekiruyi kye.

Yakobo 2:13

Mu kusala omusango Katonda taja kusaasira muntu oyo atasaasira ate okusaasira n'okusinga mu kusala emisango.