Isaia 26:4 - Baibuli Ekibono kya Katonda 2014

⁴ Mwesigenga Musengwa Katonda ebyanda n'ebyanda, kuba Musengwa Katonda oyo ali ng'oti lubaale olwewogomwamu, aidha kubakuumanga ebyanda n'ebyanda.

Isaia 26:4 ပူးပေါင်းရင်းမြစ်များ

2 Ebyomubyanda 20:20

Bwe bwakya, baasituka ku nkyo okuja mu irungu ly'e Tekoa. Bwe baali bali kuja, Yehoshafati yaayemerera, yaakoba ati: “Imwe abantu ab'omu Buyudaaya n'ab'omu Yerusalemu, mumpulirise. Mwikirize Musengwa Katonda waimwe, olwo mwidha kuba bagumu. Mwikirize eby'abalanzi be, olwo mwidha kughangula.”

2 Ebyomubyanda 32:8

Mwene ali na igye lya bantu buntu, aye ife tuli ni Musengwa Katonda waife, nga n'atubeera era nga n'atulwaniragho entalo dhaife.” Agho abantu bairamu amaani olw'ebyo kyabazinga Hezekia owa Buyudaaya bye yabakoba.

Yobu 9:19

Bwe kuba kwegera maani, mwene yenka n'aligho! Bwe kuba kuwoza musango, naani aghanga okumweta, n'aganha okwidha okuwoza?

Zabbuli 125:1

Abo abeesiga Musengwa Katonda bali ng'oti n'olusozi Sioni, olutatengeeseka era olutavaagho ebyanda n'ebyanda.

Zabbuli 18:2

Musengwa Katonda n'olubaale mwe neegisa, era n'ekifo kyange eky'okwewogomamu, oyo n'antoola aghabi. Musengwa oyo ni Katonda wange, era n'engabo mwe neewoma; n'omulwanirizi wange amponia byonabyona.

Zabbuli 46:1

Katonda n'omukuumi waife, era oyo n'amaani gaife, buliidho abaagho era nga mwetegefu okutubeera nga tuli mu buzibu.

Zabbuli 55:22

Ebizibu byo birekere Musengwa Katonda, aidha kukukuuma. Taleka bantu bakola bituufu kughangulwa.

Zabbuli 62:11

Nkiwuliire emikuzi egisinga mu mulala nga Katonda akoba ati ni mwene buyinza,

Zabbuli 62:8

Bantu bange, mumwesigenga ebiseera byonabyona, mumukobere ebiri mu myoyo gyaimwe byonabyona; kuba oyo n'omukuumi waife.

Zabbuli 62:9

Abantu abayabayaba bali ng'oti muuka gwa mu nhindo; ate abantu abakologho biwooboloolo, boonaboona bw'obata ku minzaani teika, eja bwa ghaigulu; bagheghere okusinga omuuka ogw'omu nhindo.

Zabbuli 66:7

Olw'amaani ge afuga ebyanda n'ebyanda; era yaalingirira amaghanga n'amaiso ge ekiseera kyonakyona, abadheemu balobe kumudheemera.

Zabbuli 93:1

Musengwa Katonda ni Kyabazinga ali n'ekitiisa n'amaani. Ensi kyeva n'eba engumu mu kifo kyayo, ni ghabula ekisobola okugiseseetula.

Isaia 12:2

Bona, Musengwa Katonda n'omulokozi wange; ndidha kumwesiganga nga ghazira kye ntya. Musengwa Katonda oyo n'amaani gange, oyo n'olwembo lwange, era n'omulokozi wange.

Isaia 17:10

Iwe Isiraeli weerabiire Katonda wo akuwonia, waamuvaaku oyo ali ng'oti lubaale mwe weewogoma. Oize mu kusimba nimiro dh'omala n'osengamu emisambwa.

Isaia 30:29

Aye imwe abantu ba Katonda, mulyemba era mwasagamba nga bwe mukola obwire nga mukuza ekibinuko ekitukuvu. Muliba basangaavu ng'abo abatambulira ku lwembo olw'endere, nga baja ku lusozi lwa Musengwa Katonda, oyo olubaale Isiraeli lwe yeewogomamu.

Isaia 32:2

Buli muntu ku abo aliba ng'oti kifo kya kwekwekamu okuwona empewo era ng'oti mpuku ya kwewogomamu okuwona kiwunga. Baliba ng'oti miiga gya maadhi mu nsi enkalu ey'eirungu, era ng'oti kinsense eky'ogubaale ogukologho mu kiketezo ekikalukalu.

Isaia 44:8

Mutatya era mutawaamu maani. Mukiidhi bukalamu ng'okuva eira n'eira n'okutuusa ye buli eno, mbairenga mbakobera ebiribaagho. Era niimwe abadhulizi bange. Ate eriyo ekyetebwa katonda okutoolaku nze? Ninze zenka ali ng'oti n'olubaale mwe mwewogoma, ezirayo wundi ye ndidhi.”

Isaia 45:17

Aye Musengwa Katonda buliidho aidha kulokolanga Isiraeli. Imwe Abaisiraeli ensoni tidhiribagema waire okuswazibwaswazibwa ebyanda n'ebyanda.’ ”

Isaia 45:24

Balikoba bati mu nze Musengwa Katonda mwonka n'omuli obutuufu n'amaani. Aye abo boonaboona abankyagha, ensoni dhiribagema baaswazibwaswazibwa.

Isaia 50:10

Buli muntu ata mu Musengwa Katonda ekitiisa, era n'ajiira ku ebyo omugheereza wa Musengwa Katonda oyo by'akoba, ni bw'atambulira mu nzikiiza ng'azira kimulika, yeesigenga bwa Musengwa Katonda oyo, agumirenga ku Katonda oyo.

Isaia 51:5

Ndija mangu naabawonia, era ekiseera kyange eky'okulokola kiri kumpi. Mwene nze ninze ndifuga amaghanga. Era ensi edh'eghala dhinteegereire nga dhisuubirira mu nze okudhirokola.

Isaia 63:1

“Naani oyo ali kuviira mu kibuga Bozira eky'omu nsi Edomu ng'ali mu ngoye edh'erangi ya kasaayisaayi? Naani oyo ali kutoonha mu bivaalo bye eby'ebitiibwa, ali kukumba n'obukumu n'amaani atyo?” “Ninze Musengwa Katonda ali n'obuyinza obw'okulokola, era ndi kwidha okulangirira obughanguzi bwange.”

Danieli 3:17

Bwe kunaaba okutusuula mu muliro, Katonda waife ye tugheereza asobola bukalamu okutuwonia yaatutoola mu kikoomi ekiri kugeigera omuliro, era yaatutoola ni mu buyinza bwo.

Danieli 3:28

Agho Nebukadinezzari yaakoba ati: “Katonda wa Shaduraka, ni Meshaki, ni Abedinego asaakibwe. Oyo n'atumye malaika we yaawonia abagheereza be bano abaamwesize, ni badheemera ekiragiro kyange nze kyabazinga. Bataire obulamu bwaibwe mu kabi, mu kifo ky'okugheereza n'okusinza katonda yeenayeena okutoolaku Katonda owaibwe.

Matayo 28:18

Yesu yaaseeta yaayogera nabo ati: “Nagheebwa obuyinza bwonabwona mu igulu ni mu nsi.

Matayo 6:13

Totutwala mu kulebwa, aye tulokole mu bubi.’

Amateeka Agokubiri 32:15

Abantu ba Musengwa Katonda abo baakombaghala, aye baaba badheemu. Emere yaabageedhulusa, yaabazimbagatania. Baava ku Katonda omutonzi waibwe, baava ku mununuzi waibwe oyo ow'amaani.

Amateeka Agokubiri 32:4

Oyo n'ow'amaani atulwanirira, era akola ebituukiriire, atasaliriza nsonga. Katonda mwesigwa era wa mazima, akola mu butuufu aghazira kuboola.

Amateeka Agokubiri 33:27

Katonda ow'ebyanda n'ebyanda, n'omukuumi waimwe. Emikono gye egy'olubeerera n'egibagemerera. Aidha kubinganga abazigu baimwe mu nsi, nga muli kumpi okutuukayo. Olwo aidha kubakobanga ati, ‘Mubasaaniegho boonaboona.’

Ab'e Filippi 4:13

Nsobola okugumira byonabyona olw'amaani Kurisito g'ampa.

1 Samueli 2:2

Ezirayo mutukuvu ng'oti ni Musengwa Katonda, ezira wundi naire; ezirayo lubaale lwa kwewogomamu luli ng'oti ni Katonda waife bw'atukuuma.