Isaia 2:12 - Baibuli Ekibono kya Katonda 2014

¹² Kuba ghaligho olunaku, Musengwa Katonda oyo Afuga Amagye lw'aliikizaaku ghansi, abo abeekuluntaza ni beebona nga ba ghaigulu, n'abo abeekudumbaza ni beegulumiza.

Isaia 2:12 ပူးပေါင်းရင်းမြစ်များ

2 Samueli 22:28

Olokola abo abagonvu aye olingirira abo abeetwala nga ba ghaigulu, waabaisa ghansi.

Yobu 24:1

“Ku lwaki oyo Aghanga Ebintu Byonabyona tataagho biseera bya kusaliramu musango? Ku lwaki abagheereza be tibabona bw'asala musango mu butuufu?

Zabbuli 131:1

Wo Musengwa Katonda, nze tyekuluntaza, era tyebona nga ndi wa ghaigulu. Timala biseera byange nga neegomba bintu ebikologho bye ntatuukaaniraku, oba ebiswikiriire okutegeera kwange.

Zabbuli 18:28

Wo Musengwa Katonda, onkunaanikiiza eitaala waamingaku enzikiiza.

Zabbuli 37:13

Aye Musengwa Katonda asekerera omubi, kuba aidhi ati olunaku lwe tiruli ghala.

Zabbuli 94:2

Situkiramu, niiwe asalira ensi emisango, abo abeebona nga ba ghaigulu obasasule ekyo ekibagwaniire.

Ensambo 16:5

Musengwa Katonda yeenhinhata kiisi eyeekuluntaza, era ekikakafu kiri nti taliroba kumubonereza.

Isaia 10:12

“Aye Musengwa Katonda akoba ati: ‘Bwe ndimala okukola ekyo kye ndi n'okukola ku Lusozi Sioni ni ku Yerusalemu, ndibonereza kyabazinga w'e Assiria olw'okwesuuta n'okwekuluntaza.’”

Isaia 10:33

Bona eno, Musengwa Katonda Afuga Amagye alibaghanulayo ng'oti n'olusaga olutemeibwa ku muti ni lugwa. Abaleeyi abaawaiguka alibasuula ghansi, n'abeetwala okuba aba ghaigulu yaabaisa.

Isaia 13:11

Musengwa Katonda akoba ati: “Ndisindika ekibamba ku nsi, naabonereza abantu olw'ebibi byaibwe. Ndiisa ghansi abo abeetwala okuba aba ghaigulu, naabonereza abo abeekuluntaza n'abakola ebikolwa eby'obukambwe.

Isaia 13:6

Muwowoole amaziga kuba olunaku lwa Musengwa Katonda luli kumpi; olunaku oyo Aghanga Ebintu Byonabyona lw'alireeteraku okuzikirira.

Isaia 13:9

Bona, olunaku lwa Musengwa Katonda luli kwidha! Ku lunaku olwo aliraga ekiruyi n'obusungu obubitiriire, yaaleka ensi ng'eri bwa bifulukwa byereere era yaasaaniagho abakozi b'ebibi boonaboona mu nsi.

Isaia 14:15

Aye mperaano bakwisiisa e magombe, ere ghansi ku ntobo yeene ey'olwina.

Isaia 23:9

Musengwa Katonda Afuga Amagye n'eyaleetera ebyo okubaagho, asobole okumalagho okwekuluntaza kwaibwe, era aise ghansi abo abazira muntu wundi abasinga kuba na kitiibwa mu nsi.

Isaia 24:21

Ku lunaku olwo Musengwa Katonda alibonereza obuyinza bwonabwona obuli ghaigulu mu igulu, n'abafuzi abali ghansi ku nsi.

Isaia 24:4

Ensi ewolongeire n'ebigiriku byayongobera; eitaka likaze n'ebiririku byaniala. Ebiri ghaigulu ku igulu n'ebiri ghansi ku itaka byonabyona bifafaagaine.

Isaia 40:23

Oyo n'aleetera abafuzi okugwa, baasigala agho batyo nga bazira bwe bali.

Isaia 42:15

Ndyonoonayonoona ensozi n'obusozi, naakaza eisubi n'emiti ebidhiriku. Emiiga ndigifuula bizinga, naakaza n'ebidiba eby'amaadhi.

Isaia 5:15

Buli muntu aliswazibwa, n'abo abeekuluntaza baliisibwa ghansi.

Isaia 61:2

Yantuma okulangirira nti ekiseera kituuse, Musengwa Katonda agemerwe abantu be ekivunika, era yeesasuulize ku bazigu baibwe. Era yantuma okugumya abo boonaboona abalira olw'okuba mu nnaku.

Yeremia 12:9

Abantu bange be neerondera bali ng'oti n'enhonhi erumbiibwa ensega ku ndhuyi dhoonadhoona. Ja oyete ensolo edh'omu nsiko dhoonadhoona dhiidhe dhirye.

Yeremia 13:9

“Nze Musengwa Katonda ntyo bwe nja okumalagho okwekuluntaza okw'abantu b'omu Yerusalemu n'ab'omu Buyudaaya yoonayoona.

Yeremia 30:7

Tukagwireku! Olunaku olutiisa einho luli kwidha, era ezira lundi lw'olugerangeraniaku. Luliba lwa bulumi ku bantu bange, aye balirubitamu baabaagho.”

Yeremia 46:10

Luno n'olunaku lwa Musengwa Katonda afuga Amagye, olunaku olw'okwesasuuza nga yeesasuuliza ku bazigu be. Empiima ye eja kubalya eigute, era enhwe omusaayi gwaibwe okutuusa ku nkooye; kuba Musengwa Katonda oyo Afuga Amagye aja kubaghaayo ng'oti musengo, ere mu nsi eri ku luuyi olw'omukono omugooda olw'e buvandhuba kumpi n'omwiga Eufurate.

Yeremia 50:31

“Iwe ensi Babilonia, weekuluntaza inho. Kale ni, nze Musengwa Katonda Afuga Amagye ndidha kukukolaku. Ekiseera kituuse nze nkubonereze.

Ezekieli 13:5

Tibakuuma mu bifo ebimante ghe byawomolwa ebituli, waire okuzimba obuyaaka ebimante ebyo, basobole okulwanirira abantu b'eighanga Isiraeli mu lutalo, ng'olunaku lwa Musengwa Katonda lutuuse.

Danieli 4:37

“Era mperaano, nze Nebukadinezzari nsaaka Katonda ow'eigulu, naamugulumiza era naamutaamu ekitiisa kuba by'akola byonabyona bituufu era tasaliriza nsonga. Abo abeetwala okuba aba ghaigulu abaisa.”

Amosi 5:18

Mukagwireku, imwe abenda einho olunaku lwa Musengwa Katonda lutuuke! Mulwenda lwaki? Tiruliba lunaku lwa isanhu, aye luliba lwa bizibu.

Mika 2:3

Musengwa Katonda kyava n'akoba ati: “Bona eno, ndi kuyiiya akabi ke nnaatuusa ku bantu imwe, era ghazira ghe mughanga kukawonera. Mwidha kweyagaana mu buzibu obutoogerekeka n'amalala gabaweemu.

Mika 5:11

Ndizikiriza ebifo byaimwe eby'okwewogomamu n'ebibuga byonabyona.

Zefania 1:16

Ku lunaku olwo amagwala agalaalika olutalo gaja kuvuga, okuleekaana okw'abalwani kuwulirwe nga balumbye ebibuga ebyezungulwirwa ebimante ebigumu, n'ebituuti byaku ebireeyiriri ebirengererwaku.

Zefania 3:11

Mu kiseera ekyo, imwe abantu bange timuja kugemwa nsoni kabiri olw'okudheema kwe mwandheemeranga. Nja kubatoolamu abo boonaboona abeekuluntaza mu imwe n'abo abeegulumiza. Era timuja kwirayo kundheemera ku lusozi lwange olutukuvu.

Malaki 4:1

Musengwa Katonda Afuga Amagye akoba ati: “Olunaku luli kwidha abo abeetwala okuba aba ghaigulu n'abakozi ab'ebibi, lwe baliya ng'oti isubi ikalu. Ku lunaku olwo baliya ensaga n'emizi, okutuuka okuweekereragho.

Malaki 4:5

“Aye bona eno, olunaku lwa Musengwa Katonda olukologho era olw'entiisa bwe luliba lukaali kutuuka, ndibatumira Eliya omulanzi.

Matayo 23:12

Oyo eyeetwala okuba owa ghaigulu aliisibwa ghansi, ate eyeisa ghansi alitwalibwa okuba owa ghaigulu.

Luka 14:11

Kuba buli eyeetwala ati wa ghaigulu aja kwisibwa, ate buli eyeisa aja kutwalibwa nga wa ghaigulu.”

1 Ab'e Korintho 5:5

omusaadha oyo mumugheeyo mu maani ga Sitaani omubiri gwe guzikirizibwe, memale omwoyo gwe gulokolebwe ku lunaku lwa Musengwa waife Yesu.

1 Ab'e Thessalonika 5:2

Kuba mwidhi bukalamu nga olunaku lwa Musengwa luligwa bugwe oti n'omwibi bw'aidha obwire.

Yakobo 4:6

Aye atwoleka ekisa kye okusingagho, ekyaghandiikibwa kye kiva ni kikoba kiti: “Katonda atakania abeekudumbaza, aye abeewooya abooleka ekisa kye.”