Isaia 17:7 - Baibuli Ekibono kya Katonda 2014

⁷ Olunaku olwo bwe lulituuka, abantu balita omwoyo ku Mutonzi waibwe, n'amaiso baagakyukiza eri oyo Omutukuvu wa Isiraeli.

Isaia 17:7 ပူးပေါင်းရင်းမြစ်များ

2 Samueli 22:42

Baakanula amaiso aye nga tibabona wa kubawonia, baalirira Musengwa Katonda aye yaaloba kubavugira.

2 Ebyomubyanda 31:1

Ebyo byonabyona nga biwoire, Abaisiraeli boonaboona abaaligho baaja mu bibuga bya Buyudaaya, baamenhamenha empango edh'amabaale, baasimulagho ebifaananie eby'omusambwa omukazi Ashera n'ebifo ebigulumivu eby'okusinzizaamu, ni alutaari. Baaja baakola batyo mu biketezo ebindi byonabyona ebya Yuda, n'ebya Benjamini, n'ebya Efuraimu, n'ebya Manasse, okutuusa lwe baabizikiriza byonabyona. Agho abantu boonaboona bairayo mu bibuga byaibwe, buli muntu mu kibandha kye.

Zabbuli 95:6

Mwidhe tumusinze nga twewombeese, tumukubire amakiryaivu oyo Musengwa Katonda, Omutonzi waife.

Isaia 19:22

Musengwa Katonda alibonereza Abamisiri, aye ate b'abonereiza alimala yaabawonia. Balikyukira y'ali baamusaba, era yaawulira okusaba kwaibwe yaabawonia.

Isaia 22:11

Mwasima ekidiba mu kibuga, okukuumiramu amaadhi agava mu kidiba kire ekikaire. Aye timwafaayo ku Katonda eyategeka okuva eira ng'ebintu ebyo byakubaagho, era n'abireetera okubaagho.

Isaia 29:24

Abasirusiru balifuuka abategeevu, n'abo abatasiima abeemuluguunhia buli kiseera balisangaala olw'okwegeresebwa.”

Hosea 3:5

Aye mu biseera eby'oluvainhuma abantu bange Abaisiraeli balikyuka, kabiri baira eri Musengwa Katonda waibwe n'eri Daudi kyabazinga waibwe. Baliiramu okutya Musengwa Katonda oyo, era baafunanga ebirungi ebiva y'ali.

Hosea 6:1

Abantu baja baakoba bati: “Mukole twire ye Musengwa Katonda. Waire nga mwene n'eyatuyuzayuza aye alituwonia; era waire nga n'eyatufumita aye alitunhiga ebibwa ebyo.

Amosi 3:12

Musengwa Katonda akoba ati: “Ng'omwayi w'entaama bw'awoniagho amagulu abiri obubiri, oba akatundu obutundu aka kutu, n'Abaisiraeli ababa mu Samaria boona batyo bwe baliwonezebwa n'ensonda ey'omwito, n'akatundu ak'obuliri.”

Mika 7:7

Aye nze, amaiso ndidha kugatanga ku Musengwa Katonda yenka. Katonda oyo ye ndidha okuteegereranga aidhe andokole. Katonda wange aidha kuwuliranga okusaba kwange.