Isaia 17:3 - Baibuli Ekibono kya Katonda 2014

³ Ensi Isiraeli eriba nga tekaali na bifo bya kwewogomamu kwewonia bazigu, ni Damasiko nga tikikaali na bwakyabazinga. Abasiria abaliwonagho baliswala inho ng'oti n'Abaisiraeli. Nze Musengwa Katonda Afuga Amagye ntyo bwe nkobye.”

Isaia 17:3 ပူးပေါင်းရင်းမြစ်များ

2 Bakyabazinga 16:9

Kyabazinga w'e Assiria yaikiriza, yaaja yaalumba ekibuga Damasiko yaakigema, yaita kyabazinga Rezini, era yaatwala abantu baayo e Kiri nga banhage.

2 Bakyabazinga 17:6

Mu mwaka ogwomwenda nga kyabazinga Hoshea n'afuga Isiraeli, kyabazinga w'e Assiria yaagema ekibuga Samaria, era yaakukumba abantu ab'omu Isiraeli yaabatwala mu Assiria nga banhage. Abandi yaabata mu kibuga Hala, abandi kumpi n'omwiga Habori mu kiketezo ky'e Gozani, ate abandi mu bibuga eby'Abamedia.

Isaia 10:9

Naghangula ekibuga Kalino ng'oti ni bwe naghangula ekibuga Karikemishi, naaghangula ni Hamathi ng'oti ni bwe naghangula Arupadi, era naaghangula ni Samaria ng'oti ni bwe naghangula Damasiko.

Isaia 16:14

Aye mpegaano Musengwa Katonda akoba ati: “Mu myaka esatu gyonka, ebitiibwa bya Moabu biriba nga tibikaaligho. Ku bantu baakyo waire nga bangi batyo, batono bati n'abalisigalagho ate nga tibakaali na maani naire.”

Isaia 17:4

Musengwa Katonda era akoba ati: Olunaku olwo bwe lulituuka, ebitiibwa by'ensi Isiraeli birikendeera, era mu kifo ky'okukombaghala, eryavughala bwavughale.

Isaia 25:2

Ebibuga obireeteire okufuuka emungo dh'ebimunku, waazikiriza ebifo byamu eby'okwewogomamu. Ebisaagaati eby'abazigu baife eby'obwakyabazinga tibikaaligho, era tibiriiramu kuzimbwa kabiri.

Isaia 7:16

Era aliba akaali na kwawulagho kirungi na kibi, ng'ensi dha bakyabazinga ababiri ababatiisa dhaamala ira okusigala agho nga ndhereere.

Isaia 7:8

kuba Rezini afuga Siria yonka n'ekibuga kyayo ekikulu Damasiko. Ate mu myaka nkaaga n'etaanu, Isiraeli eriba yeekutwirekutwiremu nga tekaali ighanga irala.

Isaia 8:4

kuba omwana oyo aliba akaali na kwega kweta ati ‘Baaba’ oba ati ‘Maama’, ng'obukombe bw'e Damasiko n'ebintu byonabyona Samaria bye yanhaga, byamala ira okutwalibwa kyabazinga w'e Assiria.”

Hosea 1:4

Musengwa Katonda yaakoba Hosea ati: “Mutuume eriina ‘Yezireeli,’ kuba esigaireyo ekiseera kitono mbonereze kyabazinga wa Isiraeli olw'obutemo dhaadha we Yehu bwe yakolera e Yezireeli. Nja kulekeza ab'oku nda ya Yehu okufuga obwakyabazinga bwa Isiraeli.

Hosea 1:6

Gomeri yaatoola enda kabiri, yaazaala omwana mughala. Musengwa Katonda yaakoba Hosea ati: “Mutuume eriina ‘Tasaasirwa,’ kuba nze tikaasaasira Baisiraeli, waire okubasonigha.

Hosea 10:14

Kale ni olutalo luliidhira abantu baimwe, n'ebifo byaimwe eby'okwewogomamu byazikirizibwa. Kiriba ng'oti bwe kyali mu lutalo kyabazinga Shalumani mwe yazikiririza ekibuga Betharubeli, ni bakuba ghansi abakazi ghalala n'abaana baibwe, ni babamanhiangula okutuusa okufa.

Hosea 3:4

Mu nsambo ng'oti n'eyo, Abaisiraeli boona balimala ekiseera kireeyi nga bazira kyabazinga waire omukulembeze, nga bazira misengo gye baghaayo waire okuba n'empango dh'amabaale edhisinzibwa, nga bazira bivaalo bakabona bye bakozesa mu kulagula waire okuba n'ebifaananie ebisinzibwa ebyetebwa terafimu.

Hosea 8:8

Abaisiraeli boona bafuuse ng'oti n'abamaghanga agandi, era tibakaali na mugaso ng'oti n'entamu emenheike.

Hosea 9:11

Kale ni ekitiibwa kya Isiraeli kirigulukagho ng'oti nhonhi edhiguluka. Tighalibaagho mukazi azaala, waire ali nda, waire atoola nda.

Amosi 8:14

Abo abalayira emisambwa egy'e Samaria nga bakoba bati, ‘Wo katonda ow'e Dani omukulu.’ Oba bati, ‘Wo katonda ow'e Beerisheba omulamu,’ baja kugwa era balobe kwirayo kusituka.”