Isaia 13:8 - Baibuli Ekibono kya Katonda 2014

⁸ Abantu baliidhula okutya baaba n'obulumi, ng'oti n'omukazi ali kulumwa okuzaala. Baliringaganaku mu kutya, nga buli muntu ensoni dhimugemye.

Isaia 13:8 ပူးပေါင်းရင်းမြစ်များ

2 Bakyabazinga 19:26

N'abaabirimu kye baava bawaamu amaani, ni batya einho era ni baasaamirira, ni baba ng'oti isubi ery'omu nsiko, era ng'oti isubi erimeze ghaigulu ku ndhu, eriniala nga likaali kukula.

Zabbuli 48:7

Era baaba ng'oti n'amaato ag'e Tarushishi, agamenhebwamenhebwa kiwunga ow'amaani ava e buvandhuba.

Isaia 26:17

Wo Musengwa Katonda, ng'omukazi ali enda bw'ayana ng'ali kulumwa ebisa by'omwana, ni yeegoniola ng'ebiseera bye eby'okuzaala bituuse, twena tutyo bwe twabanga mu maiso go.

Yeremia 13:21

Olyogera ki, ng'abantu be wadhuubanga okuba bakagwa bo bakughangwire era baakufuga? Toliwulira bulumi ng'oti n'obw'omukazi ali kulumwa okuzaala?

Yeremia 30:6

Buti sooka olowooze era weebuuze! Bwenebwene omusaadha asobola okuzaala omwana? Memale lwaki mbona buli musaadha ng'agemereire enda ye ng'oti n'omukazi ali kulumwa okuzaala? Lwaki buli muntu ayakaanhiriire?

Yeremia 4:31

Mpuliire okusinda ng'oti n'okw'omukazi ali kulumwa okuzaala, era naawulira okwana ng'oti n'okw'omukazi ali kuzaala omwana we omuberi. Okwo n'okulira kwa Yerusalemu ali kusika omuuka nga tigwidha, n'ayandhuluza emikono ng'akoba ati: ‘Nkagwireku nze! Abatemo bali kwenda kundhita!’”

Yeremia 46:5

Aye Musengwa Katonda yeebuuza ati: “Kiki kye ndi kubona? Batiire inho era bali kwira einhuma! Abalwani baibwe ab'amaani baghangwirwa, baaziinhuuka embiro nga bagwidhubana, aghazira kulinga na inhuma. Era buli ghantu ghali ntiisa ndhereere!

Yeremia 48:41

Abazigu baligema ebibuga n'ebifo byayo eby'okwewogomamu. Ku lunaku olwo, abalwani ba Moabu ab'amaani baliidhula okutya ng'oti n'omukazi ali kulumwa okuzaala.

Yeremia 49:22

Abazigu balirumba Bozira baakigwaku ng'oti n'enkookooma eyandhulwiza amaghagha gaayo. Ku lunaku olwo, abalwani ba Edomu ab'amaani baliidhula okutya ng'oti n'omukazi ali kulumwa okuzaala.”

Yeremia 49:24

Abantu b'e Damasiko bawoiremu amaani era balumwikegho nga batiire inho. Bali mu bulumi era beeraliikirivu, ng'oti n'omukazi ali kulumwa okuzaala.

Yeremia 50:43

Kyabazinga w'ensi Babilonia aliwulira ebiri kwidha, n'emikono gyamuwaamu amaani; yaawulira obulumi ng'oti bwa mukazi ali kulumwa okuzaala.

Yeremia 51:30

Abalwani Abababilonia ab'amaani baleseeyo okulwana, baasigala bwa mu bifo byaibwe eby'okwewogomamu. Amaani gabawoiremu, baafuuka banafu inho. Emiryango egy'ekibuga abazigu bagimenhiegho, n'endhu dhoonadhoona baadhikunaaniaku omuliro.

Ezekieli 20:47

Koba ekibira ekyo ekiri mu kiketezo ekikalukalu ekyo, kiwulirise nze Musengwa Katonda bye ndikukoba nti: Bona eno, ndikukunaaniaku omuliro gwayokya buli muti gwonagwona ogukulimu, ka gube omubisi oba omukalu. Omuliro gulibbeibbera era tighalibaagho muntu asobola kuguzikiza. Gulyokerera buli muntu, okuva ku luuyi olw'omukono omusaadha olw'e buvandhuba okutuuka ku luuyi olw'omugooda olw'e buvandhuba.

Hosea 13:13

Abaisiraeli abo bali n'omukisa ogw'okuba abalamu. Aye olw'obusiru bwaibwe tibasobola kugukozesa. Bali ng'oti mwana atuuse okuzaalibwa, aye n'aloba okufuluma mu nda ya inhina!

Yoeli 2:6

Abantu bwe badhirengera nga dhija ye bali, batya inho baasiiwuuka n'okusiiwuuka.

Nahumu 2:10

Nineve kizikiriire, kirekeibwa agho kityo, era kiwolongeire. Abantu emyoyo gyabawaamu ira, amagulu gabadhugumira budhugumire, mu mikono muzira maani, n'ensaya dhaabalekuka.

Yoanne 16:21

Omukazi bw'aba ng'aja okuzaala awulira obulumi kuba ekiseera kye kituuse, aye kasita amala okuzaala omwana, aba nga takaidhukira bulumi olw'eisanhu ery'okuzaala omuntu ku nsi.

1 Ab'e Thessalonika 5:3

Abantu balikoba bati: “Ghaligho emiraala era ghazira kabi,” aye balija okubona bati ng'okuzikirira kubatuuseeku. Kulibazindula ng'oti n'ebisa eby'omwana bwe bizindula omukazi ali kumpi okuzaala, era tighaliba gha kuwonera.