Isaia 13:2 - Baibuli Ekibono kya Katonda 2014

² “Mughanike bendera ey'olutalo ku lusozi oluziraku isubi naire. Mukaabuke mwete abaisirukale, mubaghemye n'emikono baje ku miryango gy'ekibuga ekirimu abakungu, bakirumbe bakingire.

Isaia 13:2 ပူးပေါင်းရင်းမြစ်များ

Zabbuli 60:4

Ofuuyiire endeka abo abakutya balumuke bawone okuzikirira.

Isaia 10:32

Olwaleero omuzigu aidha kuba e Nobu, ali kwesoomera Olusozi Sioni nga yeesumba ekibuga Yerusalemu.

Isaia 11:12

Musengwa Katonda alighanikira amaghanga bendera, yaagamanhisa nga bw'ali kusoloza abantu abaabingibwa mu Isiraeli ni mu Buyudaaya, abatoole eyo ye baabasansaaniza mu ndhuyi eina edh'ensi.

Isaia 11:15

Musengwa Katonda alikozesa empewo ye ebabula yaakaza ekikono ky'enhandha y'e Misiri; era yaasonka omukono gwe ku mwiga Eufurate, yaagwawulamu obwiga musanvu, abantu bwe basobola okusomoka nga tibabozeeku naire.

Isaia 18:3

Mubakobe muti, ‘Imwe abantu mwenamwena abali mu nsi, mwekalirisenga mubone nga bendera esimbiibwa ku lusozi, era mutegenga kutu muwulire ng'eigwala lifuuye.’

Isaia 19:16

Olunaku olwo bwe lulituuka, Abamisiri baliba bati inho ng'oti bakazi. Balitya era baadhugumira, bwe balibona nga Musengwa Katonda Afuga Amagye agalwire omukono okubabonereza.

Isaia 31:9

Kyabazinga waibwe alitya inho yaalumuka. N'abakungu baibwe baalumuka, era nga bali mu kabuguutano ako, baalekulira agho bendera dhaibwe edh'omu lutalo.” Musengwa Katonda oyo abantu ye basinziza mu Sioni, era ye bookera emisengo mu Yerusalemu, atyo bw'akobye.

Isaia 5:26

Musengwa Katonda alikola akamanhiso okweta abamaghanga agali eghala. Alibafuuyira endeka baava ensi y'ekoma, baidha amangu geene ago nga balumuka embiro.

Yeremia 50:2

“Langirira amawulire gano ogakobere amaghanga! Ghanika bendera osansaanie amawulire gano! Otagakweka ng'oti kyama! Aye koba bukobe oti, ‘Babiloni bakigemye! Omusambwa gwakyo Merodaki baguswaziiza, baaguleetera okutya einho. Ebifaananie by'ekibuga ekyo baabimenhiemenhie, n'ebisinzibwa byakyo ebitali Katonda baabizikiriza!’

Yeremia 50:41

Bona, ghaligho abantu abaliidha nga bava mu nsi eri ku luuyi olw'omukono omugooda olw'e buvandhuba; eighanga ery'amaani ni bakyabazinga kamaala baliva eghala einho beetegekera okulwana olutalo.

Yeremia 51:12

Mughanike ebendera muje mulumbe ekimante ekyezungulwire ekibuga Babiloni. Mwongere ku baisirukale abali kukikuuma babe bangi. Muteegho abakuuma omusana n'abakuuma obwire, era muteegho n'abeeteeze okuzinduukiriza abazigu.” Musengwa Katonda atuukiriiza ekyo kye yeesoomera okukola abantu b'omu Babilonia.

Yeremia 51:25

Iwe Babilonia, oli ng'oti lusozi oluzikiriza ensi yoonayoona. Aye nze Musengwa Katonda mwene ndikukolaku. Ndigolola omukono gwange naakumaniangulamaniangula, naakuleka ng'oli bwa ivu, ng'oti n'olusozi lwe bookiikya omuliro.

Yeremia 51:58

Ekimante eky'oku kibuga Babiloni ekikologho balikigwisa ghansi, n'emiryango gyakyo emireeyiriri baligyokya omuliro. Emirimo abantu gye baakolanga gyabadaakiza bwereere, n'amaghanga bye gaakola bya kwokebwa muliro. Nze Musengwa Katonda Afuga Amagye, ninze nkobye.”