Isaia 10:20 - Baibuli Ekibono kya Katonda 2014

²⁰ Mu kiseera ekyo, Abaisiraeli baidhukulu ba Yakobo abalisigalagho nga n'abawoniegho, baliba nga tibakeesiga ighanga eryo eryabaghangula, aye nga mu mazima beesiga Musengwa Katonda, Omutukuvu wa Isiraeli.

Isaia 10:20 ပူးပေါင်းရင်းမြစ်များ

2 Bakyabazinga 16:7

Agho Ahazi yaagheereza abakwenda ye kyabazinga Tigulathi Pileseri ow'e Assiria, ng'akoba ati: “Nze ndi mugheereza wo era mwana wo. Idha omponie kyabazinga wa Siria ni kyabazinga wa Isiraeli abaanumbye.”

2 Bakyabazinga 19:31

Ghaja kubaagho abandi abaliwonagho mu Yerusalemu, abaliva ku lusozi Sioni. Musengwa Katonda amaliriire okutuukiriza ekyo.

2 Ebyomubyanda 14:11

Asa yaasaba Musengwa Katonda we ng'akoba ati: “Wo Musengwa Katonda, ezirayo ali ng'oti niiwe mu kuyamba abanafu n'ab'amaani. Wo Musengwa Katonda waife, tuyambe ife, kuba niiwe ye twesiga era twidhie mu liina lyo okulwanisa eigye lino einene liti. Wo Musengwa Katonda, niiwe Katonda waife. Otaikiriza muntu kukughangula naire.”

2 Ebyomubyanda 28:16

Mu biseera ebyo, kyabazinga Ahazi yaasaba kyabazinga w'e Assiria okumubeera,

2 Ebyomubyanda 28:20

Era kyabazinga Tigulathi Pileseri ow'e Assiria bwe yaidha, tiyayamba Ahazi naire, aye yamukiriga bukirige, yaayongera bwa kumweraliikiriza.

Ezera 9:14

Kale tughanga tutya okwiramu okudheemera ekiragiro kyo ni tufumbiraganwa n'abantu abo abakola ebintu ebyo ebyenhinhalwa? Leero tolitusungughalira n'otuzikiriza ni ghabulagho awonagho naire omulala ati?

Isaia 1:9

Ngoli Musengwa Katonda Afuga Amagye tiyatulekeraghooku bantu batono abaawonagho, twandibaire ng'oti n'ab'e Sodoma, era twafaanana ng'oti n'ab'e Gomorra mu ebyo ebyabatuukaku.

Isaia 11:11

Olunaku olwo bwe lulituuka, Musengwa Katonda aliiramu okukozesa obuyinza bwe, yaiza abantu be abaliba bawoniegho, yaabatoola mu Assiria, ni mu Misiri, ni mu Pathirosi, ni mu Ethiopia, ni mu Elamu, ni mu Shinari, ni mu Hamathi, ni mu biketezo eby'oku nhandha.

Isaia 11:16

Ghalibaagho oluguudo abantu be Abaisiraeli abaliwonagho mwe balibita nga bava mu Assiria, ng'oti ni bwe ghaaligho oluguudo Abaisiraeli mwe baabita nga bava mu Misiri.

Isaia 37:4

Kyabazinga w'e Assiria yatuma omukungu we akulira bakungu baine boonaboona okwidha okudhooga Katonda omulamu. Musengwa Katonda wo agwaine awulire ebyo byonabyona omukungu oyo by'ayogeire, era amubonereze olw'okubyogera.’ Kale ni sabira abo abanaawonagho ni basigala nga bakaaligho.”

Isaia 46:3

Mumpulirise imwe ab'endhu ya Yakobo, imwe mwenamwena Abaisiraeli abaawonagho. Bukyanga muzaalibwa, ninze mbalabirira okuviira irala mu nda dha bainhaimwe.

Isaia 50:10

Buli muntu ata mu Musengwa Katonda ekitiisa, era n'ajiira ku ebyo omugheereza wa Musengwa Katonda oyo by'akoba, ni bw'atambulira mu nzikiiza ng'azira kimulika, yeesigenga bwa Musengwa Katonda oyo, agumirenga ku Katonda oyo.

Isaia 6:13

Era ni bwe ghalisigalagho mu nsi eyo omuntu omulala omulala ku buli bantu eikumi, yeena alizikirizibwa kabiri, yaaba ng'oti n'ekikolo eky'omuti omukologho, ekisigalagho nga gutemeibwagho.” Ekikolo ekyo n'ekiba ensigo kwe gusibukira.

Yeremia 3:23

Okusinza kwe twasinzanga ku busozi, n'okwasiikana kwe twayasiikananga ku nsozi, bwenebwene byali bya kwerimba. Mu butuufu Musengwa Katonda waife ni yenka alokola Isiraeli.’

Yeremia 44:14

Ku bantu b'omu Buyudaaya abaali bawoniegho ni baja okuba mu nsi Misiri, tikulibaaku waire omulala ati aja okuwonagho oba okusigalagho. Tikulibaaku aliirayo mu Buyudaaya ye beegomba okwira babe eyo. Tikulibaaku aliirayo okutoolaku abatono bati, abalirumuka ni bawonagho.”

Hosea 14:3

Ensi Assiria tesobola kutuwonia, n'embalaasi edh'omu lutalo tidhiidha kutuyamba. Era tituliirayo kabiri kweta ebintu bye twekolera n'engalo dhaife, tuti, ‘Katonda waife’; kuba iwe ogemerwa ekisa abo abaziraku babayamba.”

Hosea 5:13

Isiraeli bwe yabona obulwaire bwayo, ni Buyudaaya n'ebona ebibwa byayo, Isiraeli eyo yaatumisa kyabazinga omukologho ow'e Assiria aidhe agiyambe. Aye nga tasobola kuwonia bulwaire obwo waire ebibwa ebyo.

Mika 5:3

Kale Musengwa Katonda aja kulekulira agho abantu be Abaisiraeli okumala entangama, okutuusa omukazi ali kulumwa okuzaala lw'alizaala omufuzi oyo. Olwo Baisiraeli baine baja kwira okuva mu bunhage, beeyimbe ku baganda baibwe abaasigala.

Zefania 3:13

Era abantu abo abaliwonagho mu Isiraeli tibalikola kisobu naire, tibalyogera bya buguya, oba okukozesa olulimi olubuzaabuza. Baidha kubanga bulungi nga bazira kye badhulirira, era nga ghazira kintu kyonakyona kibatiisa.”