Hosea 8:7 - Baibuli Ekibono kya Katonda 2014

⁷ Nga bwe baasiga empewo era balikungula kiwunga ow'amaani. Engaano nga tetaireeku bifaaganda, terivaamu mere naire. Aye ni bweyanditaireku ebifaaganda n'ebala, era abagwira n'abandigiriire.

Hosea 8:7 ပူးပေါင်းရင်းမြစ်များ

Amainhama 41:23

N'obufaaganda obw'engaano musanvu bwavaayo nga butono, buniavu era nga bubabwirwa empewo eva mu irungu.

2 Bakyabazinga 15:19

Agho Puli kyabazinga w'e Siria, yaalumba Isiraeli. Menahemu yaagha Puli oyo kilo emitwalo amakumi asatu n'ena (340,000) edha feeza, olwo Puli oyo aghange okuyamba Menahemu okukakata ku bwakyabazinga.

2 Bakyabazinga 15:29

Mu biseera Peka bye yafugiramu Isiraeli, ghaabaagho kyabazinga Tigulathi Pileseri ow'e Assiria yaidha yaagema ebibuga Iyoni, ni Abeli Bethi Maaka, ni Yanoa, ni Kedeshi, ni Hazori, n'ebiketezo eby'e Gileadi, n'eby'e Galilaaya, n'eby'e Nafutali. Era yaatwala n'abantu mu Assiria nga banhage.

Yobu 4:8

Nze mboine ng'abantu abakola ebikolwa ebibi, bakungulamu bibi.

Ensambo 22:8

Omuntu asiga mu bantu obutakola mazima alikungula obuzibu obutaloodheka era alirekera agho okutuntuza baine.

Omulangirizi 5:16

Ekyo kyona kya nnaku inho, omuntu okuja ng'azira k'ali nako nga bwe yaidha. Olwo magoba ki g'aba afunie mu kufaabiikana kwe ng'oti n'abinga empewo okugigema?

Isaia 17:11

Aye ebisimbe ni bwe bimereragho ku lunaku lwene lw'obisimbye mu nimiro edho, ni byanizaagho enkyo ly'olunaku lw'obisimbiireku, era tighalibaagho bikungulwa naire, okutoolaku okugemwa obw'enaku n'okulumizibwa okutakoma.

Isaia 55:2

Lwaki mumalira empiiya dhaimwe ku ebyo ebitali mere? Lwaki mufaabiikanira ebyo ebitabaigusa? Mumpulirise bukalamu kye nkoba, olwo musobole okulyanga ebyo ebisinga kuba birungi, era mubenga basangaavu.

Isaia 66:15

Bona, Musengwa Katonda aliidhira mu muliro ng'ali n'ebigaali eby'omu lutalo ebiziinhuuka ng'oti kiwunga, ng'aidha okwolesa obusungu bwe obubitirivu, n'okubonereza ng'akozesa enimi edh'omuliro.

Yeremia 12:13

Abantu bange baasiga engaano, aye baakungula mawa. Baafaabiikana inho, aye baaloba kufunamu muganhulo. Baaswala olw'obutabaagho ke bafunamu, kuba obusungu bwange obubitirivu bwabalemeesa.”

Okulira 5:2

Ebintu ebyaife bye twagheebwa, kabiri byamala byagheebwa bantu bandi be tutaidhi; abantu abamaghanga agandi buti n'abali mu ndhu dhaife.

Hosea 2:9

Kale ni ndimutoolaku engaano yange n'omwenge ogw'emizabbibu mu biseera eby'amakungula. Era naamutoolaku n'engoye empegheevu, n'edho edhaakolebwa mu buviiri bw'entaama, dhe yavaalanga n'awona okuba amadu.

Hosea 7:9

aye tibaidhi ng'okwetabula n'abamaghanga agandi kubaleetera okuwaamu amaani, n'eighanga lyaibwe lyatuuka ku kuzikirira.

Hosea 9:16

Abaisiraeli bali ng'oti kisimbe kye batemye emizi ni gikala, ni kitataaku bibala. Boona tibalizaala baana. Aye era ni bwebandizaire, nandiise abaana baibwe abo abagonzi.”

Nahumu 1:3

Musengwa Katonda alwagho okusungughala, era ali n'obuyinza obutaloodheka. Musengwa Katonda taleka muntu aliku musango nga tamubonereiza. Musengwa Katonda gh'atambulira ghabaagho kiwunga n'empewo eyeezungulula n'amaani. Era ebire, n'ebiba enkungu ebigere bye ye bisiikuula ng'ali kutambula.

Haggai 1:6

Mwasiga bingi aye mwakungula bitono. Muli n'emere ey'okulya aye tebamala kubaigusa. Muli n'omwenge ogw'okunhwa aye tigubamala ndiwo! Muli n'engoye edh'okuvaala aye tidhibamala kusuugha. Abakozi empeera ye bafuna tebamala mu byetaago byaibwe.

Ab'e Galatia 6:7

Muteesubaghanga: Katonda, ghazira asobola kumusirughaza. Kiisi muntu ky'asiga ky'alikungula.

Ab'e Galatia 6:8

Kuba asiga mu kwegomba kw'omubiri gwe, mu mubiri alikungula kufa aye asiga mu Mwoyo wa Katonda, mu Mwoyo oyo alikungula obulamu obutawaagho.

Amateeka Agokubiri 28:33

Ab'eighanga erindi balinhaga emere ye mwafaabiikana okulima ku itaka lyaimwe era ni bye mwadaagirira ebindi byonabyona, aye nga imwe babatuntuza butuntuze na kubabisa bubi.