Hosea 7:7 - Baibuli Ekibono kya Katonda 2014

⁷ Obusungu bwaibwe bwe butumbuka ng'oti muliro mu ziiko, olwo baatemula abafuzi baibwe. Era bajiire nga baita bakyabazinga baibwe mulala mulala, aye ghazira muntu waire omulala ati ansaba kubayamba.”

Hosea 7:7 ပူးပေါင်းရင်းမြစ်များ

1 Bakyabazinga 15:28

Yamwita mu mwaka ogwokusatu ogwa kyabazinga Asa nga n'afuga Buyudaaya. Kale Baasha yaasikira Nadabu oyo ku bwakyabazinga bwa Isiraeli.

1 Bakyabazinga 16:18

Zimuri bwe yabona ng'ekibuga bakighambye, yaingira mu kifo eky'okwewogomamu eky'omu kisaagaati kya kyabazinga. Agho yaakunaania ku kisaagaati ekyo omuliro, ni mwene yeeyokeramu, yaafa.

1 Bakyabazinga 16:22

Abaayenda Omuri baasinza amaani bale abaayenda Tibuni mutabane wa Ginathi. Kale Tibuni yaafa, ate Omuri yaafuuka kyabazinga.

2 Bakyabazinga 10:14

Yehu yaalagira ati: “Mubageme nga balamu.” Baabagema, baabaitira kumpi n'ekiina ekyali agho. Baali abantu amakumi ana na babiri (42), era ghazira waire omulala ku abo Yehu ye yalekagho nga mulamu.

2 Bakyabazinga 10:7

Kale embaluwa ya Yehu bwe yabatuukaku, baatwala abaana abo boonaboona ensanvu baabaita, baata emitwe gyaibwe mu biibo, baagigheereza Yehu e Yezireeli.

2 Bakyabazinga 15:10

Agho Shallumu mutabane wa Yabeshi yaamukolera olukwe, yaamufumitira mu Ibuleamu, yaamwita, era yaafuga mu kifo kye.

2 Bakyabazinga 15:14

Agho Menahemu mutabane wa Gadi, yaava e Tiruza yaaja e Samaria, yaita Shallumu, yaafuga mu kifo kye.

2 Bakyabazinga 15:25

Agho omuduumizi ow'eigye lye ayetebwa Peka, mutabane wa Remalia, yaakola olukwe n'abasaadha amakumi ataanu abaava e Gileadi, yaamwitira e Samaria mu kifo eky'okwewogomamu eky'omu kisaagaati kya kyabazinga. Olwo Peka oyo yaafuuka kyabazinga mu kifo kya Pekahia.

2 Bakyabazinga 15:30

Mu mwaka ogwamakumi abiri (20) nga kyabazinga Yothamu mutabane wa Uzzia n'afuga Buyudaaya, Hoshea mutabane wa Ela yaakola olukwe, yaafumita Peka mutabane wa Remalia, yaamwita. Olwo Hoshea oyo yaafuuka kyabazinga mu kifo kye.

2 Bakyabazinga 9:24

Yehu yaadhuumuula akalaso ke n'amaani ge goonagoona, yaalasa Yoramu akasaale mu mugongo, kaamubita mu mutima, yaagwa mu kigaali kye eky'omu lutalo.

2 Bakyabazinga 9:33

Yehu yaabakoba ati: “Mumusuule ghansi!” Baamusuula ghansi, omusaayi gwe gwasambukira ku kimante ni ku mbalaasi. Era embalaasi dhaamutyankirira.

Yobu 36:13

Abo abatatya Katonda basiba obusungu ku mwoyo. Bw'ababonereza tibamusaba kubayamba.

Zabbuli 14:4

Aye abakozi b'ebibi bano boonaboona, abalya abantu bange ng'oti balya mere, kiki kyene kye bataidhi, ekibalobera okusinza Musengwa Katonda?

Isaia 43:22

Musengwa Katonda akoba ati: “Aye imwe Abaisiraeli baidhukulu ba Yakobo, nze mwamala mwaneesinwa bwesinwe, mwaloba okunsinza.

Isaia 64:4

Okuva eira n'eira ghazira muntu yaali aboineku waire okuwuliraku, oba okulowoozaaku ku Katonda owundi akolera abamusinza ebyewuninkiriza, okutoolaku iwe wenka.

Isaia 64:6

Twenatwena twafuuka ng'oti n'abatali balongoofu, n'ebikolwa byaife byonabyona ebirungi, biri ng'oti n'ekivaalo ekikongeire eiko. Olw'ebibi byaife, twenatwena tuli ng'oti makaba maniavu, era empewo etufuuwa ere yaatutwalikiza irala.

Isaia 64:7

Ghazira aidha y'oli kukusaba ghazira asitukiramu kulumukira y'oli omuyambe. Iwe watwegisaaku era waatulekulira agho mu bibi byaife.

Isaia 9:13

Waire nga Musengwa Katonda Afuga Amagye yabonereza Abaisiraeli, aye era Abaisiraeli abo tibeeneniaku, waire okukyuka okwira y'ali.

Ezekieli 22:30

Nanoonia mu bantu abo aye tyafunamu waire mulala, asobola okuzimba obuyaaka ekimante waire okukuuma mu bifo ekimante ghe kyawomolwa ebituli, asobole okuwonia ensi eyo, ndobe kugizikiriza.

Danieli 9:13

Aye waire akabi ako akaaghandiikibwa mu mateeka ga Musa kaatutuukaku, era titukweghembangaku iwe Musengwa Katonda waife otugemerwe ekivunika, waire okukyuka tuve mu bibi byaife tujiirenga ku mazima go.

Hosea 13:10

Imwe mwaidha mwansaba muti, ‘Tughe kyabazinga, otughe n'abakulembeze.’ Aye mperaano kyabazinga waimwe ali gha abalokole? Abakulembeze baimwe boonaboona bali gha babalwanirire?

Hosea 5:15

Ndiirayo mu kifo kyange ye mba, okutuusa lwe baliikiriza ni baatula ebibi byaibwe era ni baanoonia ye ndi. Bwe baliba mu kudaagadaaga kwaibwe baliinoonia ye ndi.

Hosea 7:10

Okwekuluntaza okw'Abaisiraeli kubalumiriza omusango. Aye waire ng'ebyo byonabyona bibairegho, tibakyukangaku ni baira eri nze Musengwa Katonda waibwe.

Hosea 7:14

Tibansabangaku na mwoyo mulala, aye beetandigira bwa bigwo ku itaka baawowoola ng'oti n'abataidhi Katonda. Era bwebasaba engaano n'omwenge ogw'emizabbibu, beesalasala ku mubiri ng'oti n'abatatya Katonda bwe bakola. Aye nze bandheemera budheemere!

Hosea 8:4

Baataagho bakyabazinga nga tibambuuziiza naku, era baataagho abakulembeze nga tibankobeire naku. Baatoola feeza waibwe ni zaabu waibwe, baamukolamu ebisinzibwa ebitali Katonda, ebija okubaleetera beene okuzikirira.

Mika 2:1

Bakagwireku abantu abo ababa mu buliri bwaibwe ni bakyesa obwire nga bayiiya ebibi bye banaakola. Era obwire olukya buti nga bakola nga bwe baba bayiiyiiza.