Hosea 4:11 - Baibuli Ekibono kya Katonda 2014

¹¹ Musengwa Katonda akoba ati: “Omwenge omusu n'oguwoze, gumala mu bantu bange okutegeera.

Hosea 4:11 ပူးပေါင်းရင်းမြစ်များ

Ensambo 20:1

Omuntu anhwa einho omwenge yeereetera okunhoomebwa, yaasoola era yaalwana; era ole yeenayeena atwalirizibwa omwenge aba musiru.

Ensambo 31:4

Lemueli, bakyabazinga tibagwaniire kunhwa inho mwenge, oba okutwalirizibwa einho ebitamiiza ebika.

Ensambo 6:32

Omuntu ayenda ku muka beene tabaamu kategeera. Aba ali bwa kwezikiriza mwene.

Omulangirizi 7:7

Bwenebwene okunhigirizibwa kuleetera omuntu omugezi okukola eby'ekisiru, n'enguzi yaaleetera omuntu okwonooneka.

Isaia 28:7

Bakabona n'abalanzi boona omwenge guboonoine, baatuuka n'okutagala olw'obutamiivu. Abalanzi tibakaategeera ebibalagibwa mu kubonekerwa, ni bakabona tibakaasala bukalamu nsonga dha bantu.

Isaia 5:12

Ebibinuko byaibwe bibaaku endingidi, entongooli, obugoma n'endere, era n'omwenge gw'emizabbibu. Aye tibalowooza ku ebyo Musengwa Katonda by'akola, waire okubifaaku naire.

Yeremia 23:13

Era mboine ekibi abalanzi b'omu Samaria kye baakola: Baalanganga mu liina lya Baali baakiidhamya abantu bange Abaisiraeli.

Hosea 4:12

Beebuuza ku bintu ebyakolebwa mu muti obuti. Omwigo obwigo n'ogubakobera bye benda okumanha. Bali ng'oti mukazi mwenzi: banvaaku nze Katonda waibwe, baadaaliima, baaja baasinza bakatonda abandi.

Hosea 5:4

Ebikolwa byaibwe tibibaganha kukyuka kwira ye Katonda waibwe; kuba batwalirizibwa okusinza ebitali Katonda, baaloba okumanha Musengwa Katonda oyo.

Hosea 7:11

Abaisiraeli bali ng'oti ighemba eisiru eriziramu magezi. Baasooka baayeta ensi Misiri eidhe ebayambe, baamala kabiri baaja baayeta ni Assiria.

Abalevi 10:9

“Iwe ni batabane bo, bwe munaabanga munhweire ku mwenge ogw'emizabbibu, oba ekitamiiza ekindi kyonakyona, mutaingiranga mu Weema ey'Okwagaananirangamu ni Musengwa Katonda. Bwe mulikikola, muja kufa. Eiteeka eryo linaakuumibwanga ab'olulyo lwaimwe enaku dhoonadhoona.

Luka 21:34

“Mwekuume, ti kulwa nga mwemalira bwa mu binhumo, kutamiira na kweraliikirira bya bulamu buno, olunaku lule lwabagwaku nga timwidhi.

1 Samueli 25:36

Abigaili yairayo ye Nabali, yaamwagaana ng'afumbye embaga ey'amaani mu ndhu ye embaga eyo ng'eri ng'oti ya kyabazinga. Yali atamiire inho era nga musangaavu inho. Kale Abigaili yaaloba kumukobera kintu kyonakyona okutuusa bwe bwakya enkyo.