Hosea 3:4 - Baibuli Ekibono kya Katonda 2014

⁴ Mu nsambo ng'oti n'eyo, Abaisiraeli boona balimala ekiseera kireeyi nga bazira kyabazinga waire omukulembeze, nga bazira misengo gye baghaayo waire okuba n'empango dh'amabaale edhisinzibwa, nga bazira bivaalo bakabona bye bakozesa mu kulagula waire okuba n'ebifaananie ebisinzibwa ebyetebwa terafimu.

Hosea 3:4 ပူးပေါင်းရင်းမြစ်များ

Amainhama 31:19

Labani yali ng'ajiire okusala ku ntaama obuviiri, Rakeli yaiba emisambwa gya ise egy'omu maka.

Amainhama 31:34

Rakeli yali atoire emisambwa egy'omu maka egyo, yaagita mu nsawo ey'oku kintu ekityamibwaku ku ngamiya, yaagityamaku. Labani yaayagaaza mu weema mwonamwona, aye yaaloba kugizuula.

Amainhama 49:10

Yuda n'anaagemanga omwigo ogw'obwakyabazinga, era baidhukulu be n'abanaafuganga, okutuusa mwene bwakyabazinga lw'aliidha. Era oyo abantu ye banaawuliranga.

2 Samueli 6:14

Daudi yaakinira Musengwa Katonda n'amaani ge goonagoona, nga yeesibye bwa mu nkende ekivaalo eky'obwakabona ekyakolebwa mu ngoye empegheevu.

2 Bakyabazinga 23:24

Yosia era yaatoolagho mu Yerusalemu ni mu Buyudaaya mwonamwona, abasamize, n'abalogo, n'emisambwa egy'omu maka, n'ebisinzibwa ebitali Katonda, era n'ebintu ebindi byonabyona ebyenhinhalwa. Yaakola ekyo, aghange okuleetera amateeka ago okukakata mu bantu, agaaghandiikibwa mu kitabo Hilikia Omukulu wa Bakabona kye yazuula mu isinzizo.

2 Ebyomubyanda 15:2

Azaria oyo yaaja ewa Asa, yaamukoba ati: “Isebantu kyabazinga, mpulirisa. N'imwe ab'ekika kya Yuda n'ab'ekya Benjamini, mumpulirise. Musengwa Katonda ali ghalala n'imwe, kasita mwena ni muba aghalala naye. Bwe mumunoonia, musobola okumuzuula, aye bwe mumuvaaku, nga yeena abalekulira agho.

Okuvaayo 28:4

Ebivaalo bye babe bakole ni bino: eky'omu kifuba, eky'obwakabona, ekanzu, ekivaalo ekidholige n'empiso n'ewuuzi, ekitambaala eky'oku mutwe, n'olukoma. Baidha kukolera muganda wo oyo Aaroni ni batabane ebivaalo ebitukuvu bampeereze nga bakabona.

Okuvaayo 28:6

“Ekivaalo eky'obwakabona baidha kukikola mu ngoye edha langi ya zaabu, n'edh'eya bbululu, n'edh'eya nakasooma, n'edh'eya kasaayisaayi, era n'engoye empegheevu, nga bakidholiga n'empiso n'ewuuzi.

Okulira 2:9

Endhigi dhaakyo dhaagwa era ebiwumpu byadheebungaku, n'eminhololo egyadhisibanga gyamenhekamenheka. Kyabazinga waamu n'abakungu be bali eyo mu maghanga mu bunhage, era mu kibuga ekyo timukaalimu mateeka. Abalanzi baamu tibakaabonekerwa Musengwa Katonda.

Ezekieli 19:14

Enduli y'omuzabbibu ogwo yaagema omuliro, omuliro ogwo gwayokya ensaga dhaagwo n'ebibala byaku. Tigukaaliku nsaga ngumu dha kutema kukolamu miigo gya bwakyabazinga. Olwo n'olwembo olw'enaku, era baidha kulwembanga buli kaakyeire.

Ezekieli 20:32

Ni bwekiba ekyo kye mulowooza mbu mwenda mube ng'abamaghanga agandi n'abantu ab'omu nsi edhindi, musinze emiti n'amabaale, tikija kubaagho naire.

Ezekieli 21:21

Kyabazinga ow'e Babilonia oyo ayemereire ghale engira dhombi ghe dhaagaananira. Olw'okwenda okuzuula engira y'anaagema, ali kusuula obulaso ghansi, yeeraguza ku misambwa, era yaakebera eini ery'ensolo y'aghaireyo ng'omusengo.

Ezekieli 21:31

Ndibamaliraku obusungu bwange, ekiruyi kyange kyabatumbukiraku ng'oti muliro, era naabaghaayo mu ngalo edh'abantu abakambwe ng'oti nsolo, abali n'obumanhirivu mu kuzikiriza.

Danieli 11:31

Abaisirukale be balija baayonoona eisinzizo n'ebifo byalyo eby'okwewogomamu, baalireetera okuba nga ti irongoofu. Balirekeza abantu okughaayo ebigheebwayo ebyokebwa ebya buli lunaku, baataagho Ekyenhinhalwa Ekizikiriza.

Danieli 12:11

“Okuva abantu lwe balirekera okughaayo ebigheebwayo ebyokebwa ebya buli lunaku, ng'Ekyenhinhalwa Ekizikiriza kimaze okuteebwagho, ghalibaagho enaku lukumi na bibiri na kyenda (1,290).

Danieli 9:27

Omufuzi oyo alikola endagaano ey'amaani n'abantu kamaala okumala emyaka musanvu, era ghagati gh'emyaka egyo alirekeza okughaayo emisengo n'ebigheebwayo. Ole akola ogw'okuzikiriza alitaagho ku ntwiko y'eisinzizo Ekyenhinhalwa Ekizikiriza, okutuusa enkomerero eyategekerwa oyo azikiriza bw'erituuka.”

Hosea 13:10

Imwe mwaidha mwansaba muti, ‘Tughe kyabazinga, otughe n'abakulembeze.’ Aye mperaano kyabazinga waimwe ali gha abalokole? Abakulembeze baimwe boonaboona bali gha babalwanirire?

Hosea 13:11

Nabagha bakyabazinga nga ndiku obusungu, era naamala naababatoolaku nga ndiku ekiruyi.

Hosea 2:11

Ndirekeza ebintu byonabyona ebimuleetera okusagamba: embaga edh'ebibinuko bye byonabyona eby'Okuboneka kw'Omwezi, n'edha Sabbato, n'edh'ebibinuko bye ebindi byonabyona ebyalagirwa.

Abalevi 8:7

Yaavaaza Aaroni esaati n'ekanzu, yaamusiba olukoma mu nkende, yaamuvaaza n'ekivaalo eky'obwakabona, yaakisiba n'olusibiro lwakyo olwalukibwa obukalamu, yaakimunhweza mu nkende.

Zekaria 10:2

Abantu beebuuza ku misambwa, ni ku balaguzi, ni ku bavuunuzi b'ebirooto, aye bye babairamu bya buguya byereere era bizira kye bibayamba naire. Kale ekyo kyaleetera abantu okutambulatambula eyo batyo ng'oti ntaama edhibuze. Olwo baadaazibwadaazibwa olw'okubulwa omukulembeze.

Zekaria 13:2

Nditoola mu nsi Isiraeli ebisinzibwa ebitali Katonda, ghalobe kubaagho muntu abiidhukira waire okwidhukira amaina gaabyo. Nditoolagho n'abo boonaboona abeeyeta abalanzi, era naatoola ni mu bantu omwoyo ogwenda okusinza ebitali Katonda.

Luka 21:24

Abandi balibaita n'empiima, abandi balitwalibwa mu maghanga goonagoona nga banhage, era Yerusalemu kiriniinirirwa abamaghanga agandi okutuusa enaku edh'abamaghanga agandi lwe dhiriwaaku.

Yoanne 19:15

Bale baayasiikana bati: “Twala ere! Twala ere! Mukomerere ku musalaba!” Pilato yaabakoba ati: “Mwenda nkomerere kyabazinga waimwe ku musalaba?” Bakabona Abakulu baamwiramu bati: “Ife tuzira kyabazinga, okutoolaku Kaisari.”

Abaheburayi 10:26

Bwe twonoona nga tugendereire ng'ate tumaze okukoberwa amazima, ghaba nga tighakaaligho musengo gwa kugheebwayo olw'ebibi.

Abalamuzi 17:5

Omusaadha oyo Mika, yali n'eisinzizo erirye. Agho yaatunga ekivaalo eky'obwakabona era yaakola ebintu ebyetebwa terafimu. Yaayawula owundi ku batabane, yaafuuka kabona we.

Abalamuzi 18:14

Abasaadha bale abataanu abaaja okukeeta ensi y'e Laishi, baakoba banaibwe bati: “Mubaire mwidhi nga mu ndhu dhino mulimu ekifaananie ekibaadhe, ekisiigiibwaku feeza omusaanuuse? Era mubaire mwidhi nga mu ndhu dhino mulimu n'ekivaalo eky'obwakabona, era mwabaamu n'ebintu ebyetebwa terafimu? Kale ni mulowooze ku kye mugwaniire okukola.”

Abalamuzi 8:27

Gideoni yaakola mu zaabu oyo ekisinzibwa ekitali Katonda, yaakita mu kibuga kye ekiri mu Ofura. Abaisiraeli boonaboona baava ku Katonda, baajangayo okukisinza, kyafuuka omutego eri Gideoni n'ab'omu maka ge.

1 Samueli 14:3

Era Saulo oyo yali ng'ali ghalala ni Ahiya mutabane wa Ahitubu era muganda wa Ikabodi. Ikabodi oyo nga mutabane wa Finehasi, ate Finehasi oyo yaaba mutabane wa Eli kabona wa Musengwa Katonda e Shilo. Ahiya oyo yali avaire ekivaalo eky'obwakabona. Abantu tibaamanha nga Yonathani ajiire.

1 Samueli 15:23

Obudheemu kuba kukola kibi ng'oti n'okweraguza bwe kuba, n'okwekuluntaza kuba kukola kibi ng'oti n'okusinza ebitali Katonda bwe kuba. Nga bwe waloba okukola Musengwa Katonda kye yakulagira, Musengwa Katonda yeena alobye okukuleka ku bwakyabazinga.”

1 Samueli 2:18

Samueli yali ng'agheereza mu maiso ga Musengwa Katonda ng'akaali mwisuka, ng'avaala ekivaalo eky'obwakabona ekyakolebwa mu lugoye olughegheevu.

1 Samueli 21:9

Agho kabona oyo yairamu ati: “Ghaligho ghano empiima ya Goliathi Omufilisiti ye waitira mu kiiko ky'e Ela. Empiima eyo eri einhuma w'ekivaalo eky'obwakabona, nga nzingirire mu lugoye. Oba oyenda okutwala eyo, gitwale, kuba ghaziragho yindi okutoolaku eyo.” Daudi yaamukoba ati: “Mpa eyo, ezirayo yindi eri ng'oti n'eyo.”

1 Samueli 22:18

Agho kyabazinga yaakoba Doegi ati: “Iwe kyuka oite bakabona abo.” Era Doegi Omuedomu yaagwa ku bakabona yaabaita. Ku lunaku olwo yaita bakabona kinaana na bataanu abaavalanga ebivaalo eby'obwakabona ebyakolebwa mu ngoye empegheevu.

1 Samueli 23:6

Abiathari mutabane wa Ahimeleki bwe yalumuka ni yeeyimba ku Daudi e Keila, yaja n'ekivaalo eky'obwakabona.

1 Samueli 23:9

Daudi yaakitegeera nga Saulo ali kutegeka okumukola akabi. Kale yaakoba Abiathari kabona ati: “Leeta ghano ekivaalo eky'obwakabona.”

1 Samueli 30:7

Daudi oyo yaakoba Abiathari kabona mutabane wa Ahimeleki ati: “Ndeetera ekivaalo eky'obwakabona.” Abiathari yaaleeta ekivaalo eky'obwakabona eri Daudi.