Hosea 14:7 - Baibuli Ekibono kya Katonda 2014

⁷ Baliira ye ndi naabakuumanga nga mbalabirira. Baliba ng'oti nimiro ebaziiza emere, era baamulisa ekimuli ng'oti muzabbibu. Balimanhikana inho ng'oti n'omwenge ogw'emizabbibu ogw'e Lebanoni.

Hosea 14:7 ပူးပေါင်းရင်းမြစ်များ

Zabbuli 138:7

Nze waire mba ghagati mu bizibu, iwe okuuma obulamu bwange, waalwanisa abazigu bange waabalobera okunkola obubi, wantoola ku bazigu bange olw'obukumu bwo.

Zabbuli 85:6

Totwizeemu maani buyaaka, ife abantu bo tusagambenga olw'ebyo by'otukolera?

Zabbuli 91:1

Omuntu asula mu ndhu y'oyo Ali Ghaigulu Yeene, n'akuumibwa oyo Aghanga Ebintu Byonabyona,

Olwembo 2:3

Ng'omuti ogw'ebibala bwe guba n'omuganhulo okusinga emiti egindi egy'omu kibira, n'omugonzi wange atyo bw'abasinga basaadha baine. Nnhumirwa okutyama mu kinsense eky'omuti ogwo, era ebibala byagwo bimpoomera inho.

Olwembo 4:11

Iwe omugole wange, omunwa gwo gudhuudhuula ng'oti guliku mudheenene gwa ndhuki. Olulimi lwo luwoomerera ng'oti luliku bwa mudheenene gwa ndhuki na mata. Ebivaalo byo biwunha ng'oti n'obuwoowo bwonabwona obw'e Lebanoni.

Olwembo 6:11

Agho nze naikirira, naatuuka mu nimiro ey'amaido ag'oku muti, okubona ebibala eby'omu kiiko nga bwe bimuliisa ekimuli, n'okubona oba nga emizabbibu gitaireku ebituutwa, era oba nga emikomamawanga gireese ekimuli.

Isaia 61:11

Bwenebwene ng'eitaka bwe limeza ebimera, era ng'enimiro bw'ekuza bye bagisimbyemu, ni Musengwa Katonda atyo bw'alireetera obutuufu okumeruka mu bantu be, amaghanga goonagoona gaamutaamu ekitiisa.

Ezekieli 17:23

Ndikasimba ku lusozi lwa Isiraeli olusinga kuba luleeyi, kamere kaidheku ensaga era kateeku n'ebibala, kafuuke omuvule omulungi einho. Ensolo edh'omu nsiko edha buli nsambo dhiidhe dhisulenga ghansi ghaagwo, n'enhonhi edha buli ngeri dhizimbenga ebisu byadho ku nsaga dhaagwo.

Hosea 14:5

Ng'amaadhi bwe gagwa ku itaka eikalu ni linoga amaadhi obukalamu, zeena ntyo bwe ndigha Abaisiraeli ebirungi kamaala. Baliba ng'oti kisimbe ekimuliisa ekimuli, era baasimba emizi mu itaka, baagumiragho ng'oti miti emipopulari egy'e Lebanoni.

Hosea 2:21

Mu biseera ebyo nze Musengwa Katonda, ndiwulira okusaba kw'abantu bange Abaisiraeli, naalagira eigulu lyagwisa ku nsi amaadhi.

Hosea 2:22

N'ensi eribaza engaano, n'emizabbibu, n'emyoliva.

Hosea 6:2

Mu nnaku ibiri oba isatu alitwizaamu obulamu, twaba balamu mu maiso ge.

Zekaria 8:12

Baidha kusiganga emere nga bali mu miraala, emizabbibu gibalenga ebibala, eitaka lyeyongerenga okubaaku ebirime, n'amaadhi gagwenga. Ebyo byonabyona ndibigha abantu b'eighanga lino abaawonagho.

Yoanne 11:25

Yesu yaamukoba ati: “Ninze okuzuukira era ninze obulamu. Kiisi aikiriza nze ni bw'afa, aba mulamu

Yoanne 12:24

Bwenebwene, ka mbakobere: emuuma y'engaano bw'etagwa mu itaka n'efa esigala bedengedenge, aye bw'efa ereeta ebibala kamaala.