Habakkuku 2:6 - Baibuli Ekibono kya Katonda 2014

⁶ Aye abantu abo abaghangulwa baja kuyeeyereza abo ababaghangula, era babanhoome nga babakoba bati: “Mukagwireku! Mubaire munhaganga ebitali byaimwe era mwebungaku emisingo gy'abo be muwola. Aye ebyo muja kubirekera li?”

Habakkuku 2:6 ပူးပေါင်းရင်းမြစ်များ

Zabbuli 94:3

Wo Musengwa Katonda, ababi balituusa li, bwenebwene balituusa li okweyagala?

Ensambo 22:16

Omuntu atuntuza omwavu ng'ayenda okweyongeraku obukombe, oba n'agha abakombe ebirabo, amala mwene yaayavughala.

Isaia 10:13

Kyabazinga oyo yeesuuta ati, “Ebyo nze nabikola lwa maani gange, na lwa magezi gange, kuba ndi mugezigezi. Namala okutoolagho ensalosalo edh'amaghanga, naanhagulula eby'obukombe byago, naadhooga abantu baago, naabatoola ku bityamo eby'obwakyabazinga ng'oti nte nume etyankirira isubi.

Isaia 44:20

Omuntu oyo ali ng'oti n'ole alya eivu. Aba yeerimbye era ng'adaaliimye, nga takaasobola kuwonia bulamu bwe, waire okwebuuzaaku mule ati: “Ekifaananie kye ngemye mu ngalo dhange ti kya buguya bwereere?”

Isaia 5:8

Mukagwireku imwe abagula endhu nga mwongereza ku dhe muli nadho, ni mugula n'enimiro okwongereza ku dhe muli nadho, okutuusa nga ghazira ghe mutaguze, olwo ensi mugibeemu mwenka.

Isaia 55:2

Lwaki mumalira empiiya dhaimwe ku ebyo ebitali mere? Lwaki mufaabiikanira ebyo ebitabaigusa? Mumpulirise bukalamu kye nkoba, olwo musobole okulyanga ebyo ebisinga kuba birungi, era mubenga basangaavu.

Yeremia 17:11

Omuntu afuna eby'obukombe mu bukupankupania, aba ng'oti n'enhonhi egonera amagi g'etaabiika; kuba eby'obukombe ebyo bimuwaaku mangu ng'akaali na kukairigha, olwo ku nkomerero ya byonabyona yaasigala agho nga musiru.

Yeremia 29:22

Era abantu abaatoolebwa e Yerusalemu ni batwalibwa e Babilonia mu bunhage, bwe banaayendanga okukolimira omuntu, baidha kukobanga bati, ‘Musengwa Katonda agwananga yaakukola kye yakola Zedekia ni Ahabu, kyabazinga ow'e Babilonia be yayokya mu muliro ni bafa.’

Yeremia 50:13

Olw'obusungu bwange, ezira muntu aliirayo kubanga mu nsi Babilonia, erisigala agho etyo ng'eri bifulukwa byereere. Abantu boonaboona abaligibitangamu baligyezindukanga era baatya einho olw'okuzikirizibwa kwayo.

Ezekieli 32:21

Eyo mu nsi ey'abafu, abantu ab'amaani abaalwaniranga ku luuyi olw'Abamisiri abo, baliboogeraku bati, ‘Bona, abatatya Katonda abaitirwa mu lutalo baabo baise eno ghansi, era balambaire baasirika aghazira kwesegenhia naire!’

Mika 2:4

Olunaku olwo bwe lulituuka, abantu balibayiiyaamu olwembo olw'okubayeeyereza, era beeriza amaziga nga bakoba bati: Ee, ebintu nga bitufiiririire! Musengwa Katonda atutoireku eitaka lyaife, yaaligabira abo abaatutwala mu bunhage.”

Habakkuku 1:15

Abababilonia abo bagema abantu ng'oti n'ole bw'agemya ebyenhandha ku irobo baabaghaluza ng'oti n'ole bw'aghaluza ebyenhandha mu katimba akatono oba mu katimba akanene ka kokota. Era bwe bamala beeseka baasagamba olw'obungi bw'abo be bagemiisa.

Habakkuku 2:12

Mukagwireku, imwe abazimba ekibuga mu ebyo bye mufuna mu kutemula, era ni mukibeesaagho mu ebyo bye mufuna mu kukola ebibi.

Habakkuku 2:13

Bona eno, Musengwa Katonda Afuga Amagye n'eyaleetera amaghanga ge mwaghangula, gakola emirimo emikalangufu, aye nga bye bakola bija kwokebwa bwokebwe. Era Musengwa Katonda oyo n'agaleetera okufaabiikana nga tigaja kuganhulwa naire.

Okubala 23:18

Agho Balaamu yaayogera ebibono eby'obulanzi bino, ati: “Balaki, idha owulire, ntegera kutu, iwe mutabane wa Zippori.

Okubala 23:7

Agho Balaamu yaayogera ebibono eby'obulanzi bino, ati: “Balaki kyabazinga wa Moabu yandheta okuva mu Aramu, mu nsozi edh'omu buvandhuba: Yankoba ati, ‘Idha onkolimirire aba Yakobo idha ovumirire Abaisiraeli abo.’

Luka 12:20

Aye Katonda yaamukoba ati, ‘Musiru iwe! Obwire bwaleero omwoyo gwo guja kukutoolebwaku, olwo ebyo by'otegeike bija kuba by'ani?’

1 Petero 4:7

Enkomerero ey'ebintu byonabyona eri kumpi. Agho ni mubenga beetegefu era musabenga.