Ezekieli 8:3 - Baibuli Ekibono kya Katonda 2014

³ Agho yaagolola ekyaboneka okuba ng'oti n'omukono gwe, yaavuunhia enviiri edh'oku mutwe gwange, yambeedera ku nviiri edho naalengeedhera okwo. Era nga nkaali mu kubonekerwa kwa Katonda okwo, omwoyo gwa Katonda gwambeedera mu mpewo gwantwala e Yerusalemu. Gwantuusa ku mulyango ogwingira mu luya olw'eisinzizo olw'omunda olwali ku luuyi olw'omukono omugooda olw'e buvandhuba. Mu luya olwo n'omwali ekifaananie abantu kye baasinzanga ni basungughaza Katonda einho, ni bamuleetera okuba n'enkikidi.

Ezekieli 8:3 ပူးပေါင်းရင်းမြစ်များ

1 Bakyabazinga 18:12

Aye naaba naakava gh'oli nti, ng'omwoyo gwa Musengwa Katonda gukutwala ye ntaidhi! Agho bwe nnaatuuka ni nkobera Ahabu, aye ate n'atasobola kukubona, aidha kundhita, ate nga nze omugheereza wo ndhisiisa ekitiisa mu Musengwa Katonda okuviira irala mu buto bwange.

2 Bakyabazinga 16:14

Alutaari ey'ekyuma eky'ekikomo eya Musengwa Katonda, yali ghagati gh'alutaari empyaka n'eisinzizo lya Musengwa Katonda. Aye Ahazi yaagitoolagho, yaagita ku luuyi olw'omukono omugooda olw'e buvandhuba w'alutaari ere empyaka.

2 Bakyabazinga 2:16

baamukoba bati: “Bona eno, ife abagheereza bo tuli ghano n'abasaadha amakumi ataanu ab'amaani. Tukweghemba obaganhe baje, baagale musengwa wo. Kisoboka okuba nti omwoyo gwa Musengwa Katonda gwamubbeedie gwamuta ku lusozi, oba mu kiiko.” Elisha yaabairamu ati: “Busa, mutabatuma.”

2 Bakyabazinga 21:7

Yaata mu isinzizo ekifaananie eky'omusambwa omukazi Ashera kye yabaadha. Ate nga eisinzizo eryo Musengwa Katonda lye yakoba Daudi ni mutabane we Solomoni ati: “Mu isinzizo lino eriri mu kibuga Yerusalemu kye nalondamu mu bibuga byonabyona eby'ebika bya Isiraeli, mwe banansinzizanga enaku dhoonadhoona.

Zabbuli 78:58

Basonsoonia Katonda baamusungughaza olw'ebifo byaibwe ebigulumivu bye baasinzizangamu era baamuleetera okuba n'enkikidi olw'ebifaananie ebibaadhe bye baasinzanga.

Okuvaayo 20:4

“Muteekoleranga kibaadhe oba kiwumbe ekifaanana ekintu kyonakyona ekiri ghaigulu ku igulu, oba ghansi ku nsi, oba waire ekiri mu maadhi agali ghansi agh'ensi.

Okuvaayo 20:5

Ebintu ebyo mutabisinzanga, kuba nze Musengwa Katonda waimwe ndi wa nkikidi ku bantu bange. Abo abankyagha mbabonereza, era naabonereza n'abaana baibwe, n'abaidhukulu, okutuukira irala ku luse olwokusatu n'olwokuna.

Okuvaayo 34:14

Mutasinzanga katonda yeenayeena, kuba nze Musengwa Katonda, ayetebwa ‘Nkikidi’, bwenebwene ndi wa nkikidi.

Yeremia 32:34

Baatoola emisambwa gyaibwe egyenhinhalwa, baagita mu isinzizo lyange, baalyonoona.

Yeremia 7:30

“Abantu b'omu Buyudaaya, bakoze ekibi ye ndi, nze Musengwa Katonda. Batoire emisambwa egyenhinhalwa, baagita mu isinzizo lyange, baalyonoona.

Ezekieli 1:1

Ku lunaku olwokutaanu mu mwezi ogwokuna, mu mwaka ogwamakumi asatu (30), nze Ezekieli kabona mutabane wa Buzi, mu biseera ebyo nali mba ghalala ni banhage banange agho kumpi n'omwiga ogwetebwa Kebari mu Babilonia. Agho eigulu lyaghembuka era naabonekerwa Katonda.

Ezekieli 10:3

Mu kiseera ekyo, bikerubi byali byemereire ku luuyi olw'omukono omusaadha olw'e buvandhuba olw'eisinzizo. Omuntu oyo bwe yangira mu isinzizo, ekire kyagema woonawoona mu luya olw'omunda.

Ezekieli 11:1

Agho omwoyo gwa Katonda gwambeeda gwantwala ku mulyango ogw'eisinzizo lya Musengwa Katonda ogulingiriire ku luuyi olw'e buvandhuba. Okuja okulinga nti nga mbona abasaadha abiri na bataanu nga bali agho gha mulyango. Nga mu abo mulimu ni Yaazania mutabane wa Azzuri, ni Pelatia mutabane wa Benaia, bombi abaali bakulembeze b'abantu.

Ezekieli 11:24

Agho omwoyo gwa Katonda gwambeeda nga ndi mu kubonekerwa okwo, gwandhizaayo y'abaali mu bunhage e Babilonia. Olwo bye nabona mu kubonekerwa byakoma agho.

Ezekieli 2:9

Naja okulinga nti, nga mbona omukono ogusonse ye ndi. Era okuja okwetegereza nga mbona gugemye enzingo ey'ekitabo erimu ebighandiikiibwaku.

Ezekieli 3:12

Agho omwoyo gwa Katonda gwambeeda, ekitiisa kya Musengwa Katonda kyasituka nga kiva mu kifo kyakyo, era naawulira emugongo wange omuvuuma oguli ng'oti kugugumuka kwa musisi ow'amaani einho.

Ezekieli 3:14

Omwoyo gwa Katonda gwambeeda gwantwala, naaja nga ndiku obusungu n'enaku, era amaani ga Musengwa Katonda gandidhaku mangi inho.

Ezekieli 37:1

Agho amaani ga Musengwa Katonda gandidhaku, era omwoyo gwa Musengwa Katonda oyo gwantwala gwandhisa mu kiiko ekyali kiidhwire amagumba.

Ezekieli 40:2

Era nga ndi mu kubonekerwa, Katonda yambeeda yantwala mu nsi Isiraeli, yandhisa ku lusozi oluleeyi, olwaliku ekyaboneka ng'oti kibuga, nga kiri agho emberi wange.

Ezekieli 43:5

Era omwoyo gwa Musengwa Katonda oyo gwambeeda gwantwala mu luya olw'omunda. Okuja okulinga nti nga mbona okumesunkana okw'ekitiisa kya Musengwa Katonda kubunie eisinzizo.

Ezekieli 43:8

kuba bakyabazinga baazimba ebisaagaati byaibwe eby'obwakyabazinga nga baliinaania emiryango gyabyo n'endhigi dhaabyo kumpi n'emiryango n'endhigi eby'eisinzizo lyange. Olwo nga kimante bumante n'ekitwawula nze nabo. Baayonoona eriina lyange eitukuvu olw'ebyenhinhalwa bye baakola. Kyenava ni mbazikiriza n'obusungu.

Ezekieli 5:11

“Agho ni, nze Musengwa Katonda ndayira nti nga bwendi omulamu, bino bye nkoba ku imwe ab'omu Yerusalemu: mwayonoona eisinzizo lyange nga mulikoleramu ebibi byaimwe byonabyona ebyenhinhalwa. Kale ndibatirimbula, naaloba kusaasiraku naire omulala ati oba okumugemerwa ekivunika.

Ezekieli 7:20

Ebyamadholobera byaibwe ebyabonekanga obulungi era nga bibeeyagaza, baabigheesaamu bwa bifaananie ebyenhinhalwa ebiziramu muganhulo naire. Kale ni, Musengwa Katonda kyaviire n'abireetera okubafuukira ebitali birongoofu.

Ezekieli 8:5

Katonda oyo yankoba ati: “Iwe omuntu, lingirira ku luuyi olw'omukono omugooda olw'e buvandhuba.” Agho naalingirira ku luuyi olw'omukono omugooda olw'e buvandhuba. Era okuja okulinga nti nga mbonayo ekifaananie abantu kye baasinzanga ni basungughaza Katonda einho, ni bamuleetera okuba n'enkikidi. Kyali agho gha mulyango ogw'oku luuyi olw'omukono omugooda olw'e buvandhuba, okumpi ni alutaari.

Ezekieli 9:2

Naja okulinga nti, nga mbona abasaadha mukaaga nga bali kuviira mu mulyango ogw'eisinzizo ogw'eitale, ogulingiriire ku luuyi olw'omukono omugooda olw'e buvandhuba. Buli muntu yali agemye mu ngalo ky'aja okwitisa. Baali n'omuntu owundi eyali avaire engoye empegheevu, era ng'ali n'ebintu eby'okughandiikisa. Abantu abo boonaboona bangira, baayemerera gha mbali gh'alutaari ey'ekyuma eky'ekikomo.

Danieli 10:10

Naja okuba agho ng'omukono gungemaku okunsitusa, naaba ku bivu byange nga nsimbye amakono gange ghansi, era nga ndi kudhugumira.

Danieli 10:18

Agho kabiri yangemaku era naayongera okufuna amaani.

Danieli 5:5

Baaja okulinga bati nga babona omukono ogw'omuntu oguli kughandiika ku seminti ye baakuba ku kimante eky'ekisaagaati kya kyabazinga. Omukono ogwo gwali guli kughandiika gha mberi gh'ekikondo eky'entaala, era kyabazinga yaabona bukalamu nga guli kughandiika.

Ebikolwa by'Abatume 8:39

Bwe baava mu maadhi, Mwoyo wa Musengwa yaatwala Filipo. Omulaawe tiyairayo kumubona aye yeeyongerayo mu lugendo lwe nga musangaavu.

Amateeka Agokubiri 32:16

Baamuleetera okuba n'enkikidi, nga basinza emisambwa, baamusungughaza nga bakola ebyenhinhalwa.

Amateeka Agokubiri 32:21

Bandeetera okuba n'enkikidi nga basinza ebitali nze Katonda, bansungughaza nga beesiga ebisinzibwa ebitali nze Katonda. Kale, zeena ndidha kubasaaliza nga numirwa abatali bantu bange. Ndidha kubasungughaza nga ngonza eighanga ery'abaziramu magezi.

Amateeka Agokubiri 4:24

kuba Musengwa Katonda waimwe ali ng'oti muliro oguzikiriza buli kiri mu ngira yaagwo, era enkikidi emugema ku lw'abantu be.

Amateeka Agokubiri 5:9

Ebintu ebyo mutabisinzanga, kuba nze Musengwa Katonda waimwe ndi wa nkikidi ku bantu bange. Abo abankyagha mbabonereza, era naabonereza n'abaana baibwe n'abaidhukulu, okutuukira irala ku luse olwokusatu n'olwokuna.

Amateeka Agokubiri 6:15

Bwe mulisinza bakatonda abandi, obusungu bwa Musengwa Katonda bulibatumbukiraku ng'oti muliro bwabasaaniagho, kuba Musengwa Katonda waimwe oyo aba mu imwe, enkikidi emugema ku lw'abantu be.

Yoshua 24:19

Aye Yoshua yaakoba abantu ati: “Timusobola kugheereza Musengwa Katonda, kuba oyo ni Katonda omutukuvu era Katonda ow'enkikidi. Taja kubasonigha kwonoona kwaimwe oba ebibi bye mukola.