Amosi 4:10 - Baibuli Ekibono kya Katonda 2014

¹⁰ “Era ninze eyabasindikira ebibamba okubagwaku, ng'ebyo ebyagwa ku Bamisiri. Naita abaisuka baimwe mu lutalo era abazigu baaja n'embalaasi dhaimwe. Era naidhuza enhindo dhaimwe ekivundu eky'emirambo woonawoona ghe mwasimba weema dhaimwe. Aye era mwaloba okwira ye ndi.

Amosi 4:10 ပူးပေါင်းရင်းမြစ်များ

2 Bakyabazinga 10:32

Mu kiseera ekyo, Musengwa Katonda yaatoolera okukendeeza ku nsi Isiraeli. Hazaeli kyabazinga wa Siria yaaghangula ekiketezo kya Isiraeli kyonakyona:

2 Bakyabazinga 13:3

Obusungu bwa Musengwa Katonda bwatumbukira ku Isiraeli ng'oti muliro, yaaleetera Hazaeli kyabazinga wa Siria ni mutabane we Benihadadi okubaghangulanga emikuzi egighera.

2 Bakyabazinga 13:7

Yehoahazi tiyasigazaagho igye lirimu balwani baswika mu makumi ataanu (50) ab'oku mbalaasi, oba ebigaali eby'omu lutalo ebiswika mu ikumi (10), waire abaisirukale abaswika mu mutwalo omulala (10,000) ab'oku bigere kuba kyabazinga wa Siria yazikiriza abandi boonaboona, yaabatyankirira ng'oti nkungu ey'omu kifo ghe bakubira engaano.

2 Bakyabazinga 8:12

Hazaeli yaabuuza ati: “Musengwa Katonda wange, lwaki oli kulira?” Elisha yairamu ati: “Lwa kuba ndidhi ebiinoino by'olikola ku Baisiraeli. Olikuma omuliro ku bifo byaibwe eby'okwewogomamu, waita abaana baibwe abaakaisuka, era waabaagamu abakazi baibwe abali enda.”

Okuvaayo 10:27

Aye era Musengwa Katonda yaaleetera kyabazinga okukalanguka omwoyo, yaaloba kutya era yaaloba kubaleka ni baja.

Okuvaayo 10:3

Kale Musa ni Aaroni baaja bangira mu kisaagaati kya kyabazinga, baamukoba bati: “Musengwa Katonda, Katonda w'Abaheburayi akoba ati, ‘Olirekera li okuloba okumpulira? Leka abantu bange baje bansinze.

Okuvaayo 14:4

Mu kiseera n'ekirala ndidha kumukalangusa omwoyo alobe kutya, atoolere okubabinga ng'ayenda okubagema, aye kye nja okukola kyabazinga n'abalwani be kija kumpeesa ekitiisa, era Abamisiri balimanha nga ninze Musengwa Katonda.” Abaisiraeli baakola nga Musengwa Katonda bweyabakoba.

Okuvaayo 15:26

Musengwa Katonda yaabakoba ati: “Bwe muliba abawulize obulungi bwene, nga mukola ebyo ebituufu ye ndi, era nga mugondera amateeka gange n'ebiragiro, tija kubabonereza na bulwaire ku obwo bwe nasindikira Abamisiri. Kuba ninze Musengwa Katonda abawonia endwaire.”

Okuvaayo 8:19

Abalogo baakoba kyabazinga bati: “Ago maani ga Katonda.” Aye omwoyo gwa kyabazinga gwasigala nga mukalangufu ogutatya, era tiyawulira nga Musengwa Katonda bweyakoba.

Okuvaayo 9:12

Aye era Musengwa Katonda yaaleetera kyabazinga okukalanguka omwoyo, yaaloba kutya era yaaloba kuwulira nga Musengwa Katonda bweyali amaze okukobera Musa.

Okuvaayo 9:17

Weetwala ng'owa ghaigulu einho, waaloba kuleka bantu be ni baja.

Isaia 34:3

Abantu abaliitibwa tibaliziikibwa, aye balisigala bw'agho ekiwunha kyagema woonawoona, n'ensozi dhaakuuluula bwa musaayi gwaibwe.

Isaia 50:11

Imwe mwenamwena abasala enkwe okuzikiriza banaimwe, mumanhe nti imwe beene niimwe mulyezikiriza mu nkwe dhaimwe dheene. Ekyo Musengwa Katonda mwene n'alikireetera okuba kityo, era mulifiira mu bulumi.

Isaia 9:12

Abasiria baliva e buvandhuba n'Abafilisiti baava e bugwandhuba, baayasamya eminwa gyaibwe okumira Isiraeli. Aye waire ng'ebyo bimaze okubaagho, obusungu bwa Musengwa Katonda oyo bulisigala nga bukaaligho. Era alisigala ng'akaagalwire omukono gwe okubabonereza.

Isaia 9:13

Waire nga Musengwa Katonda Afuga Amagye yabonereza Abaisiraeli, aye era Abaisiraeli abo tibeeneniaku, waire okukyuka okwira y'ali.

Isaia 9:17

Kale ni, Musengwa Katonda talireka abaana baibwe abaakaisuka kuwonagho, waire okusaasira banamwandu baibwe oba abaana baibwe bamulekwa; kuba abantu boonaboona tibatya Katonda, bakola ebibi era boogerayogera eby'ekisiru. Aye waire ng'ebyo bimaze okubaagho, obusungu bwe bwidha kusigala nga bukaaligho. Era asigale ng'akaagalwire omukono gwe okubabonereza.

Yeremia 11:22

Musengwa Katonda oyo Afuga Amagye akoba ati: “Abantu abo ndidha kubabonereza. Abaisuka baibwe baidha kufiira mu lutalo, n'abaana baibwe baidha kulambuka ndhala.

Yeremia 15:3

‘Nze Musengwa Katonda ndidha kubataaku eby'okubazikiriza bina: olutalo lwidha kubaita, embwa dhiyuzeyuze emirambo gyaibwe, enhonhi dhibamoodhogole, n'ensolo edh'omu nsiko dhibakankamire okubamalagho.

Yeremia 16:4

Baja kufanga endwaire embi einho, era ghazira aja kubalira waire okubaziika. Emirambo gyaibwe gija kubanga ku itaka okwo ng'oti mmungo ya busa. Baja kwitibwanga mu ntalo oba balambukenga endhala bafe, n'emirambo gyaibwe giriibwenga enhonhi n'ensolo dh'omu nsiko.

Yeremia 18:21

Wo Musengwa Katonda, kale ni leka abaana baibwe balambuke endhala bafe, obaleke bafiire mu ntalo. Abakazi baibwe ka babuleku abaana era babe banamwandu. Abasaadha ka bafe endwaire ya kawumpuli, abaisuka baitibwe mu ntalo.

Yeremia 48:15

Omuzigu azikiriiza ensi Moabu n'ebibuga byayo. Abaisuka baayo abasingayo okuba ab'amaani babaise. Ninze kyabazinga ayetebwa Musengwa Katonda Afuga Amagye, ninze nkobye.

Yeremia 49:26

Ku lunaku olwo abazigu baliitira abaisuka b'omu kibuga ekyo mu nguudo dhaakyo, n'abaisirukale baakyo boonaboona baabazikiriza.

Yeremia 5:3

Wo Musengwa Katonda, bwenebwene iwe onoonia mazima. Wabakuba aye baaloba kuwulira, waabatyankatyanka kwenda kubazikiriza, aye baaloba kweiraku. Baakalangusa emyoyo gyaibwe okusinga n'olubaale baaloba kwenenia naire.

Yeremia 6:11

Obusungu obungi kye buviire ni bungema ng'oti n'obubwo. Era bumbitiriireku tikaasobola kubufuga.” Agho Musengwa Katonda yankoba ati: “Obusungu obwo bumalire ku baana abato mu nguudo, ni ku baisuka abeesoloiza. Abasaadha ni bakazi baibwe baja kutwalibwa, n'abantu abakulu n'abakaire einho boona batwalibwe.

Yeremia 9:22

Emirambo gy'abantu gija kusigala bw'agho gityo, ng'oti mmungo dha busa mu nimiro, era ng'oti binhwa bya ngaano bye bakesiisa ni baleka obwagho, ni ghabulagho omuntu abitoolagho.”

Hosea 11:5

Baliirayo e Misiri, kyabazinga w'e Assiria yaabafuga, kuba baaloba okwira ye nze.

Yoeli 2:20

Ndidha kutoolagho eigye ery'enzige edhaava ku luuyi olw'omukono omugooda olw'e buvandhuba. Edhindi ndidha kudhibingira mu irungu ezira bantu: edho edhiri mu bikunsu ebikulembeiremu ndidha kudhisindika mu Nhandha Eyomuunhu. Ate edho edhiri mu bikunsu eby'einhuma ndidha kudhisindika mu Nhandha Eyaghagati. Ndidhizikiriza olw'ebibi bye dhaabakola, era emirambo gyadho giriwunha inho.

Abalevi 26:16

ndibabonereza nti: ndireeta entiisa mu imwe. Omusuudha ogw'amaani n'endwaire edhitawonezeka biribatulughaza amaiso, byaleetera obulamu bwaimwe okuja nga buwaagho. Mulisiga ensigo aye tidhiribagasa, kuba abazigu baimwe balibaghangula baalya bye musize.

Abalevi 26:25

Ndidha kubaleeteranga entalo okubabonereza olw'okumenha endagaano yange n'imwe. Era bwe muneesololezanga aghalala mu bibuga byaimwe okwewonia, ndidha kubasindikangamu obulwaire obubi, muwalirizibwenga okweghaayo eri abazigu baimwe.

Amosi 4:6

“Ninze eyabasindikira endhala mu bibuga byaimwe byonabyona, emere yaabula buli ghantu woonawoona. Aye era mwaloba okwira ye ndi.

Amosi 8:3

Ku lunaku olwo, edhibairenga enhembo dhe bembera mu isinzizo, dhirifuuka maliro. Ghalibaagho emirambo kamaala inho, nga giri kusuulibwa buli ghantu mu kasirise.” Musengwa Katonda atyo bw'akoba.

Haggai 2:17

Nasindikanga empewo ensu yaavulusa ebirime byaimwe byonabyona, era naasindikanga n'omugozi gwabifungalaza, aye era mwaloba okwenenia.

Amateeka Agokubiri 28:21

Aidha kubasindikiranga kawumpuli abeesibengaku, okutuusa lw'anaabamalangagho mwenamwena okubaita, mu nsi ye muli kuja okwingiramu okutwala.

Amateeka Agokubiri 28:22

Musengwa Katonda aidha kubasindikiranga endwaire edhitawonezeka, n'omusuudha, n'okuzimba, n'okwokerera okungi. Aidha kubasindikiranga endoboozi, n'okuvuluka kw'ebirime. Ebyo byonabyona biidha kubeesibangaku okutuusa lwe munaazikiriranga.

Amateeka Agokubiri 28:60

Era aidha kwiramu okubalwazanga endwaire embi edh'e Misiri, dhibeesibengaku nga tidhiwona.

Amateeka Agokubiri 7:15

Musengwa Katonda aidha kubakugiranga endwaire dhoonadhoona dhirobe kubagema. Taidha kubasindikiranga ndwaire mbi dhe mwabona nga muli e Misiri. Aye aidha kudhisindikiranga abo ababakyagha.