Amosi 2:6 - Baibuli Ekibono kya Katonda 2014

⁶ Musengwa Katonda akoba ati: “Abantu Abaisiraeli bakoze ebibi emikuzi kamaala. N'olw'ensonga eyo nteekwa buteekwe okubabonereza kuba batunda abantu abatuufu mu bwiru, olw'obutasobola kusasula mabandha agababandhibwa. Era baatunda abaavu, olw'obutasobola kusasula waire omughendo ogugula omuyimbo gw'engaito.

Amosi 2:6 ပူးပေါင်းရင်းမြစ်များ

2 Bakyabazinga 18:11

Kyabazinga w'e Assiria yaakukumba abantu ab'omu Isiraeli yaabatwala mu Assiria. Abandi yaabata mu kibuga Hala, abandi kumpi n'omwiga Habori mu kiketezo ky'e Gozani, ate abandi mu bibuga eby'Abamedi.

2 Bakyabazinga 18:12

Ekibuga Samaria baakighangula kuba Abaisiraeli baaloba okugondera Musengwa Katonda waibwe, baamenha endagaano ye yakola nabo, era baadheemera byonabyona Musa omugheereza we bye yalagira, baaloba kubiwulirisa oba okubigondera.

Isaia 10:2

Mulemesa abanaku okusalirwa emisango mu mazima, mwalemya abaavu okukolerwa ebituufu bye bagwaniire, mwanhaga ebintu bya banamwandu, n'ebya bamulekwa mwabinhaagaana.

Isaia 29:21

Katonda alizikiriza abo abaghaayiriza banaibwe emisango gye batakoze, n'abo abayamba abaizi ab'emisango ni batabonerezebwa, era n'abo abaguya ni balemesa omutuufu okusalirwa omusango mu mazima.

Ezekieli 22:13

“Kale bona eno, ndikubonereza n'amaani olw'obunhazi bwo n'obutemo bwo.

Yoeli 3:3

Baakubira obululu ku bantu bange, baaghaayo abalenzi okusasulira abakazi bamalaaya, era baaghaayo abaghala okubagulamu omwenge, era baagunhwa.

Yoeli 3:6

Mwatoola abantu b'omu Buyudaaya n'ab'omu Yerusalemu mu nsi yaibwe, mwabatwaliriza eghala, mwabaguza Abagureki.

Zekaria 11:5

Abo abadhigula, baja baadhiita era ghaaloba kubaagho ababonereza. Abo abadhitunda bakoba bati, ‘Musengwa Katonda asaakibwe, tufuuse bakombe!’ Era abaayi baadho tibadhisaasira naire.”