Amainhama 15:17 - Baibuli Ekibono kya Katonda 2014

¹⁷ Endhuba bweyamala okugwa enzikiiza ng'egemye, mangu ago agho ghaabonekagho olugyo oluliku amanda nga gali kunioka omwosi, era ghaabonekagho n'engada edhiri kwaka; bino byombi byabita ghagati gh'ebitundu bire eby'ensolo.

Amainhama 15:17 ပူးပေါင်းရင်းမြစ်များ

Amainhama 15:10

Aburamu yaaleeta ensolo edho ye Katonda, yaadhibaagamu ghabiri, yaata ebitundu ebyo ku ndhuyi ibiri ng'abirinzagainia. Aye enhonhi tiyadhibaagamu ghabiri.

2 Samueli 22:9

Omwosi gwamuva mu nhindo, ate enimi edh'omuliro n'amanda agaaka, byamuva mu kanwa.

1 Bakyabazinga 18:38

Agho Musengwa Katonda yaasindika omuliro gwaika, gwayokya ekigheebwayo ekyo n'enku n'amabaale n'eitaka, era gwakaza amaadhi agaali mu lukokonko.

1 Ebyomubyanda 21:26

Era yaazimbira agho Musengwa Katonda alutaari yaaghaayo ebigheebwayo ebyokebwa n'ebigheebwayo olw'okutabagana. Yaasaba Musengwa Katonda, era Musengwa Katonda oyo yaamwiramu ng'asindika omuliro ku alutaari nga guva mu igulu.

Okuvaayo 19:18

Olusozi Sinai lwaidhula omwosi, kuba Musengwa Katonda yalwikaku ng'ali mu muliro. Era omwosi ogwaluvangaku okuja ghaigulu nga guli ng'oti n'oguva mu kifo aghookerwa ebiwumbe olusozi lwonalwona lwatengeeta bubi inho.

Okuvaayo 20:18

Abantu boonaboona bwe baawulira okutyabuka okw'olukuba n'okuvuga okw'endeka, ni babona n'okumyansa okw'olukuba, n'olusozi nga luli kunioka omwosi, baatya inho baadhugumira era baayemerera ere ghalaku.

Isaia 62:1

Ku lwa Sioni nze tiidha kusirika, ku lwa Yerusalemu tiidha kuwuumula naire, okutuusa nga kimaze okununulwa, n'obughanguzi bwakyo bwayaka ng'oti muliro.

Yeremia 11:4

Endagaano eno nagikola ni badhaadha baibwe, bwe nabatoola mu nsi Misiri, ye baabanga ng'oti n'abali mu muliro ogw'amaani ogusaanuusa ekyuma ekigumu einho. Naabakoba okungonderanga n'okukolanga kiisi kye nalagira olwo babenga bantu bange, nze mbenga Katonda waibwe.

Amateeka Agokubiri 4:20

Aye imwe yabagemaku, yaabatoola e Misiri ye mwabanga ng'oti n'abali mu muliro ogw'amaani ogusaanuusa ekyuma ekigumu einho. Yaabafuulira irala abantu be nga bwe muli mpegaano.

Abalamuzi 13:20

Enimi edh'omuliro bwe dhaava ku alutaari, ni dhitumbukira ghaigulu, malaika wa Musengwa Katonda yaajiira mu nnimi edho ghaigulu, nga Manoa ni mukazi we babona. Agho Manoa ni mukazi we baakuba amakiryaivu, baakutama n'ebyeni byatuuka ku itaka.

Abalamuzi 6:21

Agho malaika wa Musengwa Katonda yaagalula omwigo gwe yali nagwo mu ngalo, yaagukontesa ghansi ghaagwo ku mamba ni ku migaati egitazimbulukusiibwa. Omuliro gwava mu ibaale, gwayokya emamba n'emigaati. Agho malaika wa Musengwa Katonda yaabulagho.