Ab'Efeso 6:19 - Baibuli Ekibono kya Katonda 2014

¹⁹ Zeena munsabire, bwe naabanga nga ndhogera, mpeebwe eby'okwogera, era mbyogere nga titya, nga mmanhisa abantu ekyama eky'Amawulire Amalungi.

Ab'Efeso 6:19 ပူးပေါင်းရင်းမြစ်များ

Ebikolwa by'Abatume 13:46

Aye Paulo ni Barunaba, baayogera nga bagumu, baakoba bati: “Kibaire kigwaine okusooka okukobera imwe ekibono kya Katonda. Aye nga bwe mukirobye era ni mwesaliragho beene nga bwe mutagwaine kufuna bulamu obutawaagho, kale twidha kubaleka tuje y'abamaghanga agandi

Ebikolwa by'Abatume 14:3

Eyo baamalayo entangama nga boogera ebya Musengwa nga bagumu. Musengwa yaakakasa bye baayogera ku kisa kye, ng'abakozesa obumanhiso n'ebyewuunhio.

Ebikolwa by'Abatume 18:26

Yaatoolera okwogera mu sinagoga nga tatya. Aye Purisikilla ni Akwila bwe baamuwulira, baamutwala baayongera okumwinhonhola bukalamu Engira ya Katonda.

Ebikolwa by'Abatume 19:8

Agho Paulo yangira mu sinagoga yaayogeranga nga tatya okumala emyezi esatu. Yaatakananga nabo ng'agezaaku okubaikirizisa ebigema ku Bwakyabazinga bwa Katonda.

Ebikolwa by'Abatume 2:4

era boonaboona baidhula Mwoyo Mutukuvu baatoolera okwogera mu nnimi edhindi, nga Mwoyo bwe yabaghanga okwogera.

Ebikolwa by'Abatume 28:31

Yaabakoberanga eby'Obwakyabazinga bwa Katonda era yaabeegeresanga ebigema ku Musengwa Yesu Kurisito nga ghazira amulobera.

Ebikolwa by'Abatume 4:13

Bwe baabona obugumu bwa Petero ni Yoanne, nga bamaze okumanha bati baali bantu abataasoma era ababuliidho, beewuunhia inho era baabategeera bati baali baba ni Yesu.

Ebikolwa by'Abatume 4:29

Mperaano ni, Musengwa, bona okutiisatiisa kwaibwe, era gha abagheereza bo okwogera ekibono kyo n'obugumu bwonabwona.

Ebikolwa by'Abatume 4:31

Bwe baamala okusaba, ekifo ghe baali beesololeiza kyatengeesebwa, boonaboona baidhula Mwoyo Mutukuvu, baayogera ekibono kya Katonda nga bagumu.

Ebikolwa by'Abatume 9:27

Aye Barunaba yaamugemaku yaamutwala y'Abatume yaabakobera nga Saulo bwe yali mu ngira n'abona Musengwa era Musengwa n'ayogera naye. Era yaabakobera nga Saulo bwe yayogera nga tatya e Damasiko mu liina lya Yesu.

Ebikolwa by'Abatume 9:29

Yaayogeranga era yaatakananga n'Abayudaaya aboogera Olugureki, aye baayenda okumwita.

Ab'e Roma 15:30

Aboluganda, mbeeghemba ku bwa Musengwa waife Yesu Kurisito era n'olw'okugonza kwa Mwoyo Mutukuvu mweyimbe ghalala ninze mu kunsabira.

Ab'e Roma 16:25

Ka tusaake Katonda oyo asobola okubagha amaani mu kwikiriza agava mu Mawulire Amalungi agagema ku Yesu Kurisito ge nkobera abantu. Ekyo n'ekyama ekyagisibwa okuva eira n'eira.

1 Ab'e Korintho 1:5

Kuba olw'okuba mu Kurisito, Katonda yabafuula abakombe mu bintu byonabyona, mu ndhogera ni mu kumanha.

1 Ab'e Korintho 2:7

Aye mbakobera amagezi ag'ekyama kya Katonda amagise, ge yataagho ng'ensi ekaali kutondebwa olw'okutugheesa ekitiisa.

1 Ab'e Korintho 4:1

Agho ni mukimanhe nga tuli bagheereza ba Kurisito abaateebwagho okuba abakuumi ab'amazima g'ekyama kya Katonda.

2 Ab'e Korintho 1:11

Mwena mutubeere nga mutusabira, ng'abantu kamaala bwebatusabira Katonda n'atugha enkabi, era abantu kamaala ni batwebalizaaku Katonda olw'enkabi dhe tufuna olw'okusaba kwaibwe.

2 Ab'e Korintho 3:12

Nga bwe tuli n'obwesige oti n'obwo, tuli bagumu inho.

2 Ab'e Korintho 6:11

Bakagwa baife ab'e Korintho, tubakobeire byonabyona nga bwe biri, ghazira kiri mu myoyo gyaife kye tubagisiisa.

2 Ab'e Korintho 7:4

Mbeesiga inho era muneesiimisa inho. Mu kudaazibwadaazibwa kwaife kwonakwona nsigala nga nkaali mugumu era naasagamba inho.

2 Ab'e Korintho 8:7

Mperaano musinga abandi mu byonabyona mu kwikiriza, mu kwogera, mu kumanha, mu kufuba kwonakwona era ni mu kutugonza. Kale twenda mubasinge ni mu mulimo guno ogw'okugaba.

Ab'Efeso 1:9

yatumanhisa ekyama eky'ebyo bye yayenda, bye yali yategeka eira okutuukiririza mu Kurisito.

Ab'Efeso 3:9

Era n'okumanhisa abantu boonaboona ebifa ku ntegeka, Katonda eyatonda byonabyona ye yali agisiiza okumala ebyanda.

Ab'e Kolosai 2:2

Kino nkikola bairemu amaani mu myoyo gyaibwe era babe mu kugonzania, bamanhire irala era bategeerere irala ekyama kya Katonda. Ekyama ekyo nga ni Kurisito.

Ab'e Kolosai 4:3

Ate twena mutusabire, Katonda atusobozese okukobera abantu ekibono kye, tubamanhise ekyama ekiri mu Kurisito ekyansibisa mu ikomera.

1 Ab'e Thessalonika 2:2

Waire twali tumaze okudaazibwadaazibwa era n'okuswazibwaswazibwa bwe twali e Filippi, nga bwe mwidhi, twaguma ku lwa Katonda waife twabakobera Amawulire ge Amalungi mu kutakanizibwa okunene.

1 Ab'e Thessalonika 5:25

Aboluganda, mutusabire.

2 Ab'e Thessalonika 3:1

Ekisembayo baganda bange, mutusabirenga ekibono kya Musengwa kyeyongere okusansaana amangu, ate abakiwulira bakiteemu ekitiisa ng'oti bwe kyali mu imwe.

1 Timotheo 3:16

Bwenebwene ekyama eky'endhikiriza yaife kikologho: “Yaboneka nga muntu mwene, yaakakasibwa Mwoyo, yabonebwa bamalaika. Yaalangirirwa mu maghanga, yaikirizibwa mu nsi yoonayoona, era yaatwalibwa mu igulu mu kitiisa.”

Filemoni 1:22

Ekindi kye nsaba, ntegekeraayo agh'okusula ng'omugeni, kuba ndi kusuubira nti Katonda aidha kwiramu okusaba kwaimwe mwenamwena andhize ye muli.

Abaheburayi 13:18

Mutusabirenga, kuba tukakasa nga tuli n'omwoyo omunaabuufu era nga twenda okukola obukalamu mu buli kintu.