Abalevi 20:2 - Baibuli Ekibono kya Katonda 2014

² akobere Abaisiraeli ati: “Bweghanaabangagho Omuisiraeli oba omusenze yeenayeena eyasenga mu Isiraeli, aghaayo ku baana be okukozesebwa mu kusinza omusambwa Moleki, abantu boonaboona banaamukubanga amabaale yaafa.

Abalevi 20:2 ပူးပေါင်းရင်းမြစ်များ

1 Bakyabazinga 11:7

Agho yaazimba ku lusozi oluli ku luuyi olw'e buvandhuba wa Yerusalemu, ekifo ekigulumivu eky'okusinzizaamu omusambwa Kemoshi ogw'Abamoabu ogwenhinhalwa, n'eky'okusinzizaamu omusambwa Moleki ogw'Abammoni, gwona era ogwenhinhalwa.

2 Bakyabazinga 17:17

Baaghangayo abaana baibwe abalenzi n'abaghala ng'emisengo egyokebwa. Beeraguzanga era baakolanga eby'obulogo, era beegheerangayo irala okukola ebibi, baaleetera Musengwa Katonda okusungughala.

2 Bakyabazinga 23:10

Kyabazinga Yosia era yaayonoona ekifo ekyayetebwanga Tofethi, ekyali mu kiiko eky'Abahinnomu. Olwo ghalobenga kubaagho muntu yeenayeena ayokerayo mutabane we oba mughala we, ng'ekigheebwayo ekyokebwa eri omusambwa Moleki.

2 Ebyomubyanda 28:3

Yaaniokezanga obubbaani mu kiiko kya mutabane wa Hinnomu. Yaatuuka n'okwokyanga batabane be ng'ebigheebwayo, ng'empisa eyenhinhalwa bweyali ey'abamaghanga agandi, Musengwa Katonda be yabinga mu nsi eyo nga Abaisiraeli bali kumpi okutuukayo.

2 Ebyomubyanda 33:6

Yaayokyanga batabane be ng'ekigheebwayo ekyokebwa, yaajanga mu balaguzi ni mu basamize, era yaakolanga eby'obulogo n'eby'emizimu. Yaakolanga inho ebibi eri Musengwa Katonda, yaamuleetera okusungughala.

Zabbuli 106:38

Baayughanga emisaayi egyo egiziraku musango, egy'abaana baibwe abalenzi n'abaghala be baaghangayo ng'emisengo eri ebintu ebyo ab'e Kanaani bye baasinzanga ebitali Katonda. Olwo ensi yaafuuka nnhonoonefu olw'obutemo obwo.

Yeremia 32:35

Era baaja baazimbira omusambwa Baali ebifo ebigulumivu eby'okusinzizaamu, mu kyetebwa Ekiiko ekya mutabane wa Hinnomu, baayokeranga okwo batabane baibwe ni baghala baibwe n'omuliro. Ate nga nze tibalagirangaku kukola kintu kyenhinhalwa ekyo, waire okukirowoozaaku obulowooze mu mwoyo gwange. Kale baaleetera abantu b'omu Buyudaaya okwonoona.”

Yeremia 7:31

Era baaja baazimba ebifo ebigulumivu eby'okusinzizaamu e Tofethi, mu kyetebwa Ekiiko ekya mutabane wa Hinnomu, baayokeranga mu muliro batabane baibwe ni baghala baibwe. Ate nga nze tibalagirangaku kukola kintu ekyo, waire okukirowoozaaku obulowooze mu mwoyo gwange.

Ezekieli 20:26

Naabaleka beeyonoona nga bagheereza eri emisambwa ebigheebwayo, era nga baghaayo y'emisambwa egyo abaana baibwe ababeri bookebwe mu muliro ng'emisengo. Ekyo nakikola nga nhenda mbabonereze era bamanhe nga ninze Musengwa Katonda.

Ezekieli 20:31

Ni ye buli eno mukeeyonoona nga musinza ebitali nze Katonda, mwaghaayo ebigheebwayo byaimwe, era mwaghaayo n'abaana baimwe bookebwe mu muliro ng'emisengo. Memale ng'obwo era imwe abantu ab'eighanga Isiraeli mwidha mbu kuneebuuzaaku? Bwenebwene nze Musengwa Katonda ndayira nti nga bwendi omulamu, tija kubaganha kuneebuuzaaku.

Ezekieli 23:37

Baakola obwenzi era baatemula. Baakola obwenzi nga basinza ebitali nze Katonda, baaghaayo n'abaana baibwe beene be banzaalira, baabookya ng'emisengo eri ebisinzibwa ebyo.

Ezekieli 23:39

Ku lunaku lwene lwe baitiraku abaana baibwe ni babaghaayo ng'emisengo eri ebisinzibwa byaibwe ebyo, era ni ku lwene olwo lwe baidhiraku mu isinzizo lyange ni balyonoona.

Abalevi 17:13

“Omuisiraeli oba omusenze yeenayeena eyasenga mu Isiraeli, bw'anaayiiganga ensolo oba enhonhi eikirizibwa okuliibwa, anaafukanga omusaayi gwayo yaagughembaku eitaka.

Abalevi 17:15

“Buli muntu k'abe Omuisiraeli oba omusenze, bw'anaalyanga ensolo efiire yeene oba eitiibwa ensolo edh'omu nsiko, aidha kubanga n'okwoza ebivaalo bye era n'okunaaba omubiri mu maadhi. Aye era aidha kusigalanga nga tiimulongoofu okutuusa eigulo.

Abalevi 17:8

“Era bakobe oti, ‘Omuisiraeli oba omusenze yeenayeena eyasenga mu Isiraeli, bw'anaaghangayo ekigheebwayo ekyokebwa oba omusengo,

Abalevi 18:21

Otaghangayo waire omulala ku baana bo, okukozesebwa mu kusinza omusambwa Moleki, n'ovumagania eriina lya Katonda wo. Ninze Musengwa Katonda.

Abalevi 20:1

Musengwa yaalagira Musa

Abalevi 20:27

“Omusaadha oba omukazi omusamize, oba omulogo, anaitibwanga. Anaakubwanga amabaale yaitibwa. Mwene n'anaabanga yeereeteire okwitibwa.”

Abalevi 24:14

“Oyo omusaadha eyakoliime, mumutwale mu kifo aghazira weema dha bantu. Era abo boonaboona abaamuwuliire, bate emikono gyaibwe ku mutwe gwe, okukakasa nti yakoliime, memale olwo abantu boonaboona bamukube amabaale afe.

Abalevi 24:16

Omuisiraeli yeenayeena oba omusenze anaavumanga eriina lya Musengwa Katonda, abantu boonaboona bamukubanga amabaale yaafa.

Abalevi 24:23

Agho Musa ng'amaze okukobera ebyo Abaisiraeli, baatwala oyo eyakolima mu kifo aghazira weema dha bantu, baamukuba amabaale yaafa. Mu nsambo eyo Abaisiraeli baakola nga Musengwa Katonda bweyakoba Musa.

Ebikolwa by'Abatume 7:43

Mwabbeedanga ntindi ya Moleki na muunienie ya musambwa Refani, ebisinzibwa ebyo ebitali Katonda bye mwakola ni mubisinzanga. Kale ni ndidha kubabinga mbatuumye ni Babiloni.’

Amateeka Agokubiri 12:31

“Mutasinzanga Musengwa Katonda waimwe mu nsambo beene ye basinzaamu bakatonda baibwe, kuba bwe baba nga bali kusinza bakatonda baibwe, bakola buli kyenhinhasa Musengwa Katonda era ky'atayenderaku irala. Bookya n'abaana baibwe mu muliro, ng'emisengo eri bakatonda baibwe.

Amateeka Agokubiri 17:2

“Ghasobola okubaagho, mu kindi ku bibuga byaimwe, omusaadha oba omukazi yaakola ekibi, ng'amenha endagaano ya Musengwa Katonda waimwe.

Amateeka Agokubiri 18:10

Mu imwe mutabangamu muntu waire omulala ati ayokya mutabane we oba mughala we mu muliro ng'amughaayo ng'omusengo, oba akola eby'obulaguzi, oba akola eby'obulogo,

Amateeka Agokubiri 21:21

Agho abasaadha boonaboona ab'omu kibuga ekyo, baidha kumukubanga amabaale bamwite. Mu nsambo eyo munaabanga nga mwetoiremu ekibi ekyo. Agho Abaisiraeli boonaboona bwe banaawuliranga ekibairegho, baidha kutyanga.”

Amateeka Agokubiri 22:21

baidha kufulumyanga omughala oyo ku mulyango gw'endhu ya ise, abasaadha ab'omu kibuga ky'ewaibwe bamukube amabaale bamwite; kuba yakola eky'ensoni mu Isiraeli, yaaba n'omusaadha ate ng'akaali mu ndhu ya ise. Mutyo bwe muneetoolangaku ekibi ekyo.