Abalevi 14:10 - Baibuli Ekibono kya Katonda 2014

¹⁰ “Ku lunaku olwomunaana anaaleetanga entaama ento enume ibiri, n'entaama enduusi ndala ey'omwaka omulala, dhoonadhoona nga dhiziraku kikyamu kyonakyona. Era anaaleetanga kilo isatu edh'obuwunga bw'engaano obuseereibwa obukalamu, nga butabwirwamu omuzigo ogw'ebibala eby'emiti emyoliva. Era yaaleeta ekitundu kirala kirala ku buli bitundu bisatu ebya lita ey'omuzigo ogw'ebibala eby'emiti emyoliva.

Abalevi 14:10 ပူးပေါင်းရင်းမြစ်များ

Okuvaayo 29:40

Bw'oghaayo entaama esooka, oghaayo ni kilo ey'engaano eseereibwa obukalamu ng'etabwirwamu lita ey'omuzigo omukenenule ogukamwirwa mu bibala eby'emiti emyoliva ebisekwirwa, waateeraku ni lita ey'omwenge ogw'emizabbibu ng'ekigheebwayo eky'ebyokunhwa.

Abalevi 1:10

“Bw'anaabanga ng'aja kughaayo musengo ogwokebwa omulomba, ng'atoola mu ntaama dhe oba mu mbuzi dhe, aidha kughangayo enume eziraku kikyamu kyonakyona.

Abalevi 1:3

Bw'anaabanga ng'aja kughaayo musengo ogwokebwa gwonagwona ni guwaagho ng'atoola mu nte dhe, aidha kughangayo enume eziraku kikyamu kyonakyona. Anaagigheerangayo ku mulyango gw'Eweema ey'Okwagaananirangamu ni Musengwa Katonda, olwo Musengwa Katonda oyo asobole okumusiima.

Abalevi 14:11

Kabona aidha kutwalanga omuntu oyo n'ebintu ebyo emberi w'Eweema ey'Okwagaananirangamu ni Musengwa Katonda.

Abalevi 14:12

Agho kabona anaatoolanga eyindi ku ntaama edho enume ento, ghalala n'ekitundu kirala kirala ku buli bitundu bisatu ebya lita ey'omuzigo ogw'emiti emyoliva, yaabighaayo ng'omutango, yaabiwuuba, bibe ekigheebwayo nga kiwuubibwa mu maiso ga Musengwa Katonda.

Abalevi 14:15

Kabona anaatoolanga ku muzigo ogw'ebibala eby'emiti emyoliva, yaagufuka mu ngalo dhe dheene edh'oku mukono omugooda,

Abalevi 14:21

“Aye bw'anaabanga omwavu atasobola kufuna byaga agho, anaaleetanga entaama ento enume, ebe ekigheebwayo ng'omutango. Enaabanga ekigheebwayo eri Musengwa Katonda nga kiwuubibwa, ekiba ekya kabona. Anaaleetanga kilo ndala ey'obuwunga obw'engaano, obutabwirwamu omuzigo ogw'ebibala eby'emiti emyoliva, era yaaleeta ekitundu kirala kirala ku buli bitundu bisatu ebya lita ey'omuzigo ogw'ebibala eby'emiti emyoliva.

Abalevi 2:1

“Omuntu yeenayeena bw'anaabanga ng'ali kughaayo ekigheebwayo eky'emere ey'empeke eri Musengwa Katonda, emere anaamalanga kugisa bukalamu, yaateeraku n'omuzigo, n'obubbaani.

Abalevi 2:11

“Tighaabengagho kigheebwayo kya mere ya mpeke, ekinaagheebwangayo eri Musengwa Katonda nga kirimu ekizimbulukusa. Mutakozesanga kizimbulukusa waire omudheenene gw'endhuki, mu kigheebwayo eri Musengwa Katonda nga kyokebwa.

Abalevi 2:13

Buli kigheebwayo eky'emere ey'empeke mukitengaku omuunhu, kuba omuunhu n'akamanhiso k'endagaano ghagati waimwe ni Katonda. Mu butuufu, ebigheebwayo byonabyona mubitengaku omuunhu.

Abalevi 23:13

Era ku kigheebwayo ekyo, munaagheerangaku kilo ibiri edh'obuwunga obuseereibwa obukalamu era obutabwirwamu omuzigo ogw'emiti emyoliva, ng'ekigheebwayo eky'eby'okulya. Akawoowo ak'ekigheebwayo ekyo kasangaaza Musengwa Katonda. Era munaaghangayo lita ndala ey'omwenge ogw'emizabbibu, ng'ekigheebwayo eky'ebyokunhwa.

Abalevi 4:32

Omuntu bw'anaaleetanga entaama nga n'ekigheebwayo kye olw'ebibi, eidha kubanga nkazi ng'eziraku kikyamu kyonakyona.

Abalevi 9:1

Ku lunaku olwairaku ng'emikolo egy'okwawulibwa giwoire, Musa yaayeta Aaroni ni batabane be, n'abakulembeze mu Isiraeli,

Okubala 28:20

Ku buli nte mwidha kugheerangaku ekigheebwayo eky'emere ey'empeke, nga kya kilo isatu edh'obuwunga obuseereibwa obukalamu, obutabwirwamu omuzigo. Ate ku ntaama enume enkulu, mugheerengaku ekigheebwayo eky'emere ey'empeke, nga kya kilo ibiri edh'obuwunga obuseereibwa obukalamu, obutabwirwamu omuzigo.

Okubala 6:14

Aidha kughangayo ye Musengwa Katonda ensolo isatu edhiziraku kikyamu kyonakyona, dhino: entaama ento enume ey'omwaka omulala ebe ekigheebwayo ekyokebwa; n'entaama ento enduusi ebe ekigheebwayo olw'ebibi; era n'entaama enume ebe ekigheebwayo olw'okutabagana.

Okubala 7:43

Ekigheebwayo kye kyalimu bino: Sowaani ndala nga yakolebwa mu feeza era ng'ezitogha kilo ndala na kitundu, bbakuli ndala eyakolebwa mu feeza era ng'ezitogha guraamu lunaana, ng'ojiira ku mbala entongole ey'eisinzizo. Sowaani ni bbakuli ebyo yaabiidhuza emere eseereibwa obukalamu ng'etabwirwamu omuzigo. Ekyo nga n'ekigheebwayo eky'emere ey'empeke.

Matayo 8:4

Yesu yaamukoba ati: “Bona nti tokoberaku muntu, aye ja weeyandhule ewa kabona era ogheeyo ekirabo Musa kye yalagira, kwe banaakakalisa.”

Mariko 1:44

era yaamukoba ati: “Bona nga ghazira y'okoberaku, aye ja busimbalaala weeyandhule ewa kabona, ogheeyo ekirabo olw'okuwona kwo nga Musa bwe yalagira, memale boonaboona bakakase.”

Luka 5:14

Yaamusikirira obutakoberaku muntu yeenayeena, aye aje yeeyandhule ye kabona, agheeyo ekirabo olw'okuwona kwe, nga Musa bwe yalagira, ng'okwo kwe bali n'okukakalisa.

Yoanne 1:29

Ku lunaku olwairirira, Yoanne yaabona Yesu ng'aidha y'ali yaakoba ati: “Mubone Entaama Ento eya Katonda etoolagho ebibi eby'ensi!

Yoanne 6:33

kuba omugaati Katonda gw'agaba, n'omuntu oyo ava mu igulu era n'agabira ensi obulamu.”

Yoanne 6:51

Ninze omugaati oguleeta obulamu, ogwava mu igulu. Omuntu yeenayeena bw'alya ku mugaati guno aja kuba mulamu ebyanda n'ebyanda. Omugaati gwe ndighaayo olw'obulamu obw'ensi eno, n'omubiri gwange gwe nja okughaayo ku lw'ensi eno ebe n'obulamu.”

1 Petero 1:19

Kyali omusaayi gwa Kurisito ogw'omughendo einho, ali ng'oti n'entaama ento eziraku kamogo waire kimyamya.