Abalamuzi 9:57 - Baibuli Ekibono kya Katonda 2014

⁵⁷ Katonda era yaabonereza abantu b'omu Shekemu olw'ekibi kyaibwe. Ni Yothamu, mutabane wa Gideoni, kye yakolima kyatuukirira.

Abalamuzi 9:57 ပူးပေါင်းရင်းမြစ်များ

2 Samueli 3:39

Olwaleero luno mpulira nga nziramu maani, waire nga ninze kyabazinga eyasiigibwa omuzigo. Batabane ba Zeruia bano, banfuukire ekizibu. Oyo eyakola ekibi ekyo, Musengwa Katonda agwananga yaamwesasuulizaaku mu nsambo emugwaniire olw'obubi bwe.”

1 Bakyabazinga 16:34

Mu biseera bye yafugiramu, Hieli ow'e Betheli mwe yazimbira obuyaaka ekibuga Yeriko. Bwe yali ng'ataagho omusingi gw'ekibuga ekyo, yaafiirwa mutabane we omuberi Abiramu. Ate bweyali aghangamu endhigi dhaakyo, yaafiirwa mutabane we Segubu, eyali nga n'asembayo obuto. Ebyo byali bityo, okutuukiriza Musengwa Katonda bye yakoba ng'abita mu Yoshua mutabane wa Nuni.

1 Bakyabazinga 2:32

Musengwa Katonda aidha kumubonereza ng'amulanga ebikolwa bye eby'ekitemo, kuba yaita abasaadha babiri nga lata wange Daudi taidhi. Abasaadha abo baali batuufu era nga bali n'ebisaanizo okumusinga, era nga ni bano: Abuneri mutabane wa Neri era omuduumizi w'eigye lya Isiraeli, ni Amasa mutabane wa Yetheri era omuduumizi w'eigye lya Buyudaaya.

Zabbuli 7:17

Neeyanza Musengwa Katonda olw'obutuufu bwe, era nhemba enhembo edhisaaka Musengwa Katonda, oyo Katonda Ali Ghaigulu Yeene.

Zabbuli 94:23

Abo aidha kubabonereza olw'obubi bwaibwe, era aidha kubazikiriza olw'okwonoona kwaibwe; bwenebwene Musengwa Katonda aja kubasaaniagho.

Ensambo 5:22

Ebibi eby'omubi bimufuukira ng'oti lutuula, era bimugema ng'oti n'omutego bwe gugema enhonhi.

Isaia 3:11

Aye ababi bakagwireku! Ebyaibwe bibi, kuba byene bye baakolanga ku bandi, ni byene ebyo bye baidhanga boona okubakolaku.

Yoshua 6:26

Mu kiseera ekyo, Yoshua yaalabula abantu ng'abasikirira ati: “Oyo yeenayeena aligezaaku okwiramu okuzimba ekibuga Yeriko, Musengwa Katonda amukolimire. ‘Era Musengwa Katonda, oyo amwitengaku abaana be boonaboona, okuva ku muberi okutuuka ku esembayo obuto.’

Abalamuzi 1:7

Adonibezeki oyo yaabakoba ati: “Bakyabazinga ensanvu be natemaku ebyala ebisaadha n'ebigere ebisaadha, baasolozanga obukunkumuka bw'emere ghansi gh'emeeza yange. Mpegaano Katonda aneesasuliizaaku olw'ekyo kye nabakola.” Agho baamutwala e Yerusalemu, yaafiira eyo.

Abalamuzi 10:1

Abimeleki bwe yamala okufa, Tola mutabane wa Pua era mwidhukulu wa Dodo, yaidha okununula Isiraeli. Yali wa mu kika kya Issakari, ng'aba mu kiketezo eky'ensozi ekya Efuraimu.

Abalamuzi 9:20

Aye oba nga ti bwekiri, omuliro ka guve mu Abimeleki gusaaniegho ab'omu Shekemu n'ab'e Bethimillo, era omuliro guve mu bantu ab'e Shekemu n'ab'e Bethimillo gusaaniegho Abimeleki.”

Abalamuzi 9:24

Ekyo kyaligho, Abimeleki n'abantu ab'e Shekemu abaamughaganga okwita batabane ba Gideoni ensanvu, beesasuuzibwe olw'omusango gwaibwe ogwo.

Abalamuzi 9:45

Abimeleki yaamala olunaku olwo lwonalwona ng'ali kulwanisa ekibuga ekyo. Yaakigema, yaita abantu baamu, era yaakimenhamenha, yaakimansiramu omuunhu.

Abalamuzi 9:56

Mu nsambo eyo, Katonda yeesasuuliza ku Abimeleki olw'omusango gwe yaiza ku ise ng'aita baganda be ensanvu.