Abalamuzi 20:26 - Baibuli Ekibono kya Katonda 2014

²⁶ Agho abalwani ba Isiraeli boonaboona baaniinaniina baaja e Betheli, baalirira eyo. Baaba eyo mu maiso ga Musengwa Katonda olunaku olwo, nga ghazira ke bali kulya naire okutuusa eigulo. Baaghaayo ye Musengwa Katonda oyo ebigheebwayo ebyokebwa, n'ebigheebwayo olw'okutabagana.

Abalamuzi 20:26 ပူးပေါင်းရင်းမြစ်များ

Amainhama 28:19

Yaatuuma ekifo ekyo eriina Betheli. Aye ng'ekibuga ky'eyo mu kusooka kyali kyetebwa Luzi.

2 Samueli 3:35

Agho abantu boonaboona baajanga beegayirira Daudi alye ku mmere omusana ogwo. Aye Daudi yeefuugha ng'akoba ati: “Katonda agwananga yambonereza inho, bwe nkombanga ku mmere oba ekintu ekindi kyonakyona ng'endhuba ekaali kugwa.”

2 Ebyomubyanda 20:3

Yehoshafati yaatya, yaasaba Musengwa Katonda ng'amweghemba, era yaalangirira ghabeegho okusiiba mu Buyudaaya mwonamwona.

Ezera 8:21

Agho naalangirira okusiiba nga tuli eyo ku mwiga Ahava. Naakoba twewombeeke mu maiso ga Katonda waife nga tumusaba atukulembere mu lugendo lwaife, era atukuume n'abaana baife ni byonabyona bye twali nabyo.

Yeremia 36:9

Mu mwezi ogwomwenda ogw'omwaka ogwokutaanu nga Yehoiakimu ni kyabazinga wa Buyudaaya, baalangirira ekisiibo olw'okusaba Musengwa Katonda. Abantu boonaboona ab'omu Yerusalemu, n'abo boonaboona abaidha nga bava mu bibuga eby'omu Buyudaaya ebindi, baasiiba.

Yoeli 1:14

Mulangirire ghabeegho okusiiba, mwete abantu beesoloze ghalala. Musoloze abakulembeze n'abantu boonaboona ab'omu Buyudaaya, baidhe mu isinzizo lya Musengwa Katonda waimwe, mumulirire amaziga, ababeere.

Yoshua 24:1

Agho Yoshua yaayeta ebika eby'Abaisiraeli byonabyona byesololeza e Shekemu. Yaaja ng'ayeta abakulu ab'ebika, abakulu ab'ebikunsu, n'abakulembeze mu Isiraeli, baidha baayemerera aghali Esanduuku ey'Endagaano ya Musengwa Katonda.

Yoshua 7:6

Agho Yoshua n'abakulu ab'ebikunsu mu Isiraeli baayuza ebivaalo byaibwe, beeyala wa mberi gh'Esanduuku y'Endagaano ya Musengwa Katonda, era beeyugha enkungu mu mitwe, baaba agho okutuusa eigulo. Ebyo byonabyona baabikola olw'okunakughala.

Abalamuzi 20:18

Abaisiraeli beesitula baaniinaniina okuja e Betheli, baabuuza Katonda bati: “Kika ki ekibe kisooke okulumba Ababenjamini?” Yaabairamu ati: “Ekika kya Yuda n'ekibe kisooke.”

Abalamuzi 20:23

Agho baaniinaniina okuja mu kifo ye basinziza, baalirira mu maiso ga Musengwa Katonda okutuusa eigulo. Baabuuza Musengwa Katonda bati: “Twiremu kabiri okulumba baganda baife Ababenjamini tubalwanise?” Musengwa Katonda yairamu ati: “Muje mubalwanise.”

Abalamuzi 20:25

N'Ababenjamini boona baava mu kibuga Gibea okubalwanisa omukuzi ogwokubiri. Ku mukuzi guno baita Abaisiraeli omutwalo mulala na kanaana (18,000), abalwani beene abaziramu ntete.

Abalamuzi 21:2

Agho Abaisiraeli baaja e Betheli, baatyama eyo mu maiso ga Musengwa Katonda okutuusa eigulo. Baawowoola nga balira amaziga kamaala,

Abalamuzi 21:4

Ku lunaku olwairaku ku nkyo, abantu baazimba alutaari, baaghaayo ebigheebwayo ebyokebwa n'ebigheebwayo olw'okutabagana.

1 Samueli 11:4

Abakwenda bwe baatuuka e Gibea ekya Saulo, baakobera abantu ebibono ebyo. Agho abantu boonaboona baalira inho amaziga.

1 Samueli 7:6

Kale beesololeza e Mizipa, baasena amaadhi baagafuka agho mu maiso ga Musengwa Katonda, ng'ekigheebwayo. Baasiiba ku lunaku olwo, era baakoba bati: “Twakola ekibi ye Musengwa Katonda.” Eyo e Mizipa, Samueli ye yalamuliranga Abaisiraeli.