Abalamuzi 17:4 - Baibuli Ekibono kya Katonda 2014

⁴ Agho Mika bwe yairiza inhina ebitundu bya feeza ebyo, inhina yaatoolaku ebitundu ebikumi bibiri, yaabigha omugheesi w'ebintu bya feeza, yaabaadha ekifaananie yaakisiigaku feeza oyo. Ekifaananie ekyo baakita mu ndhu ya Mika.

Abalamuzi 17:4 ပူးပေါင်းရင်းမြစ်များ

Isaia 30:22

Olwo mulitoola ebifaananie byaimwe ebibaadhe bye mwalimbyaku feeza, n'ebyo bye mwakola mu zaabu, mwabisuula ere ng'ebintu ebitali birongoofu, nga mukoba muti: “Muje ere, era timwiranga!”

Isaia 44:13

Ate omubaadhi apima omuti n'olukoba, yaagulambaku n'ekalaamu. Yaagulanda n'eranda, era yaagulambaku n'ekyuma ekipima, yaagukolamu ekifaananie ekirungi kyene ekiri ng'oti muntu, eky'okuteebwa mu isabo.

Habakkuku 2:18

Muganhulo ki oguli mu musambwa omuntu gw'abaadha oba n'agukola mu kyuma ekisaanuuse? Omusambwa ogwo gwegeresa buguya bwereere. Omuntu afuna ki mu kwesiga ekintu ky'akoze mwene n'akyeta katonda, ekintu ekitaghanga na kwogera?

Amateeka Agokubiri 27:15

‘Omuntu yeenayeena anaakolanga ekifaananie ekibaadhe, oba ekisaanuusiibwa mu kyuma, memale n'akitaagho n'akisinza, akolimirwenga! Kuba okusinza ebitali Katonda kiba ekyenhinhalwa ye Musengwa Katonda.’ Olwo abantu boonaboona baliiramu bati, ‘Amiina.’

Abalamuzi 17:3

Agho yairiza inhina ebitundu bya feeza ebyo. Inhina yaakoba ati: “Ka mpeeyo feeza ono abe wa Musengwa Katonda, ku lw'omwana wange, bamusaanuuse asiigibwe ku kifaananie ekibaadhe. Kale ni, feeza ono nja kumukwiriza.”

Abalamuzi 17:5

Omusaadha oyo Mika, yali n'eisinzizo erirye. Agho yaatunga ekivaalo eky'obwakabona era yaakola ebintu ebyetebwa terafimu. Yaayawula owundi ku batabane, yaafuuka kabona we.

Abalamuzi 18:17

Agho abasaadha abataanu abaakeeta ku lule, baingira mu ndhu, baatoolamu ekifaananie ekibaadhe, n'ekivaalo eky'obwakabona, n'ebintu ebyetebwa terafimu, n'ekifaananie ekikoleibwa mu kyuma ekisaanuusiibwa. Baakolanga ebyo, nga kabona ayemereire ku mulyango ghalala n'abasaadha olukaaga (600) abagemye eby'okulwanisa.