Abaheburayi 13:5 - Baibuli Ekibono kya Katonda 2014

⁵ Mulobenga kugonza mpiiya, aye bye muli nabyo bibamalenga. Katonda yakoba ati: “Tirikuvaaku naire era tirikulekulira agho naire.”

Abaheburayi 13:5 ပူးပေါင်းရင်းမြစ်များ

Amainhama 28:15

Bona, ndi n'iwe, ndidha kukukuumanga yoonayoona y'onaajanga, era ndidha kukwiza mu nsi eno; tirikulekulira agho, okutuusa nga mmaze okutuukiriza ebyo bye nkukobye.”

Amainhama 30:31

Labani yaabuuza ati: “Kiki kye mbe nkughe?” Yakobo yairamu ati: “Ozira ky'oidha kumpa. Aye ndidha kwongera okulabirira ebyayo byo, bw'onaaganha kino kye nja okukoba:

Amainhama 31:5

Yabakoba ati: “Mboine nga iseimwe takansagaalira nga bweyakolanga eira. Aye Katonda wa lata wange abairenga ninze buliidho.

1 Bakyabazinga 6:13

Ndidha kubanga ghalala n'abantu bange Abaisiraeli era tiibalekulirenga agho.”

1 Bakyabazinga 8:57

Musengwa Katonda waife abenga ghalala n'ife, nga bwe yabanga aghalala ni badhaadha baife, era alobenga kutuvaaku waire okutulekulira agho.

1 Ebyomubyanda 28:20

Agho Daudi yaakoba mutabane we Solomoni ati: “Guma omwoyo obe mumalirivu, okole omulimo ogwo. Otatyanga era otawangamu maani, kuba Musengwa Katonda wange ali ghalala n'iwe. Talikuvaaku, waire okukulekulira agho, aidha kubanga ghalala n'iwe akusobozese okumaliriza omulimo gwonagwona ogw'okukola ku isinzizo lye.

Zabbuli 10:3

Omukozi w'ebibi yeesaakiriza olw'okwegomba kwe okubi, era omuntu oyo agwidhubanira eby'okufuna, ayogera bubi ku Musengwa Katonda era yaamunhooma.

Zabbuli 119:36

Nhamba okwendanga okukola by'okoba, okusinga okwendanga eby'obufuni.

Zabbuli 37:25

Okuva mu buto, buti nkairiighe, aye tibonangaku nga Musengwa Katonda alekulira agho omutuufu, waire okubona ng'abaana ab'omutuufu basabiriza.

Zabbuli 37:28

Kuba Musengwa Katonda ayenda inho ekituufu kikolebwe, era taja kulekulira agho abo abamutya. Taja kuganha kibi kutuuka ku bantu batuufu ebyanda n'ebyanda aye eizaire ly'ababi lija kuwaagho.

Okuvaayo 2:21

Agho Musa yaabona ng'amaka ag'omusaadha oyo malungi ga kubaamu. Era omusaadha oyo yaamugha mughala we Zippori.

Okuvaayo 20:17

“Muteegwanizanga ndhu dha bantu bandi. Muteegwanizanga baka beene, waire okwegwaniza abairu baibwe abasaadha oba abakazi, waire ente dhaibwe, oba endogoyi dhaibwe, oba ebintu byaibwe ebindi byonabyona.”

Ensambo 23:4

Oteekanulanga olw'okwenda okufuna obukombe, banga mugezi ng'obalirira obulamu bwo.

Isaia 41:10

Otatya, kuba nze ndi ghalala n'iwe. Oteeraliikirira, kuba nze ninze Katonda wo. Ndidha kukuyamba nkughe amaani, era nkulwanirire nkuleetere okughangula.

Isaia 41:17

Abantu bange abaavu n'abali mu bwetaavu, bwe balinoonia amaadhi ni gababula, amamiro ni gatuuka n'okubakala olw'endiwo, nze Musengwa Katonda ndiiramu okusaba kwaibwe nze Katonda wa Isiraeli tiribalekulira agho.

Isaia 42:16

Ndikulemberamu abatulu, naababisa mu ngira dhe bataidhi. Enzikiiza ye balimu ndigifuula butangaavu, naasaania aghali ebikonko, baabita aghatereevu. Ebyo ndibibakolera, era tiribalekulira agho.

Yeremia 6:13

kuba okuviira irala ku basembayo ghansi okutuukira irala ku babbede beene, boonaboona bagwidhubanira bya kufuna mu bukyamu. Waire abalanzi ni bakabona, boona bakupankupania.

Ezekieli 33:31

Olwo nga baidha y'oli bya bulungi ng'abantu bange, era nga bawulira by'obakoba, aye baaloba kubikola. Booleka nga bwe bali n'okugonza okungi, mu bibono bubono bye boogera. Aye ng'emyoyo gyaibwe giri ku bya kufuna.

Matayo 6:19

“Oteebiikiranga bya bukombe mu nsi muno, ebisiisa n'okutalaiga mwe bibyonoonera, n'abaibi mwe basima ni babiiba.

Matayo 6:25

“Kyenva mbakoba nti: muteeraliikiriranga mu bulamu bwaimwe kye munaalya oba kye munaanhwa, waire omubiri gwaimwe kye munaavaala. Obulamu ti bwa mughendo okusinga emere? N'omubiri ti gwa mughendo okusinga eby'okuvaala?

Matayo 6:34

Mulekenga ni kweraliikirira byaidho kuba olwaidho lulyeraliikirira ebyalwo, buli lunaku luli n'ebizibu ebirumala.

Mariko 7:22

omuluulu, omulyakubi, obugwenhufu, obuguya, ensaalwa, okughaayiriza, olunkulu n'obusirusiru.

Luka 3:14

Abaisirukale boona baamubuuza bati: “Ate ife twena tukole ki?” Yaabairamu ati: “Mutanhaganga muntu yeenayeena waire okumughaamirizanga, mube bamativu n'ekyo ekibasasulwa.”

Luka 8:14

Ate eyo eyagwa mu mawa n'abantu abawulira ekibono kya Katonda, aye bwe baja, okweraliikirira, obukombe, n'amasanhu ag'obulamu buno bibafundekeza, era tibaleeta bibala.

Ab'e Roma 1:29

Baidhwire obubi obwa buli nsambo: okukola ebibi, obuluvu, n'eitima. Baidhwire ensaalwa, okutemula abantu, okulwana, obuguya, enge, n'okugeya.

1 Ab'e Korintho 5:11

Kye nali nkoba n'obutakolagananga na muntu yeeyeta waluganda aye ate nga mwenzi, oba nga wa mairu, oba asinza ebitali Katonda, oba omuvumagani, oba omutamiivu, oba omwibi; omuntu ng'oti n'oyo n'okulya mutalyanga naye.

1 Ab'e Korintho 6:10

Era ghazira baibi, oba ab'amairu, oba abatamiivu, oba abavumagani, oba abanhazi, abalingira mu Bwakyabazinga bwa Katonda.

2 Ab'e Korintho 4:9

Abantu batukiriga, aye Katonda tatwerabira. Tukubibwa ghansi, aye tituzikirizibwa.

Ab'Efeso 5:3

Ng'abatuukirivu bwe bandibaire, bino tibigwaine na kwogerebwa mu imwe: okwenda, obudankaanu, n'okwegomba okubi.

Ab'Efeso 5:5

Mumanhire irala kino muti omwenzi, omudankaanu, oba ali n'okwegomba okubi, azira mugabo mu Bwakyabazinga bwa Kurisito era obwa Katonda; kuba okwegomba okubi kwona kuba kusinza bitali Katonda.

Amateeka Agokubiri 31:6

Mube bagumu era bamalirivu. Mutatya bantu abo era batabamalamu maani. Musengwa Katonda waimwe mwene, n'aidhanga okuja n'imwe. Talibavaaku, waire okubalekulira agho.”

Amateeka Agokubiri 31:8

Era Musengwa Katonda mwene n'aidha okukukulemberamu era abenga n'iwe. Talikuvaaku waire okukulekulira agho. Otatya era otawaamu maani.”

Amateeka Agokubiri 4:31

kuba Musengwa Katonda waimwe wa kivunika. Talibalekulira agho waire okubazikiriza, era talyerabira ndagaano ye yakola ni badhaadha baimwe.”

Ab'e Kolosai 3:5

Kale mwite okwegomba okubi okuli mu imwe: obwenzi obudankaanu, okwegomba okw'ensoni, okuwugaawugana, obutaiguta, kuba kino kiri ng'oti kusinza ebitali Katonda.

1 Timotheo 3:3

Ateekwa okuba nga ti mutamiivu, ti mukambwe, aye nga muwombeefu atakanamuka, era azira mairu ga kufuna.

Yoshua 1:5

Ndidha kubanga n'iwe buliidho nga bwe nabanga ni Musa. Tija kukulekulira agho naire. Ezira muntu aja kukughangula, enaku dhoonadhoona dh'olimala ng'oli mulamu ku nsi.

Yoshua 7:21

mu bintu bye twanhaga nabonamu ekivaalo ekiboneka obulungi einho, nga kyakolebwa e Babilonia. Naabonamu ni kilo ng'oti ibiri edha feeza, n'ekitundu ekya kilo ekya zaabu, naabyegomba era naabitwala. Ebintu ebyo mwidha kubyagaana nga nabiziika mu weema yange, nga feeza n'eri ghansi.”

2 Petero 2:14

Bamoga bwenzi bwereere era tibasinwa kukola bibi. Basendasenda abanafu mu kwikiriza. Emyoyo gyaibwe girowooleza bwa mu kufuna. Ba kuzikirira!

2 Petero 2:3

Era olw'amairu gaibwe ag'okufuna, balifuna mu imwe amagoba nga bakozesa ebibono eby'obuguya. Katonda yamala ira okubasalira omusango, era aja kubazikiriza nga bwe yategeka.

Yuda 1:11

Bakagwireku! Kuba bagema engira nga Kaini ye yagema. Olw'okugonza einho empiiya bagwa mu nsobi ya Balaamu. Era nga Kora bwe yakola, boona badheemera ababafuga, era baazikirizibwa nga bwe yazikirizibwa

1 Samueli 10:7

Obumanhiso obwo bwe bunaakutuukaku, iwe kola bukole kyonakyona ky'osobola okukola, kuba Musengwa Katonda ali ghalala n'iwe.

1 Samueli 12:22

Musengwa Katonda, olw'eriina lye eikologho, taja kubalekulira agho imwe, kuba yasiima mwene okubafuula eighanga lye.