2 Ebyomubyanda 34:4 - Baibuli Ekibono kya Katonda 2014

⁴ Baamenhamenha alutaari edh'omusambwa Baali nga Yosia aligho mwene, baatematema ni alutaari edh'okuniokezebwaku obubbaani edhaali ghaigulu gh'edho. Baamulungula ebifaananie eby'omusambwa omukazi Ashera, n'ebifaananie ebindi ebibaadhe, n'ebyo ebyakolebwa mu kyuma ekisaanuusiibwa, baabisa byafuuka nkungu era enkungu eyo baagimansira ku magombe g'abo abaaghangayo emisengo y'ebifaananie ebyo.

2 Ebyomubyanda 34:4 ပူးပေါင်းရင်းမြစ်များ

1 Bakyabazinga 13:2

Omulanzi oyo, yaavumirira alutaari eyo ng'ajiira ku ebyo Musengwa Katonda bye yamulagira, ati: “Alutaari iwe, alutaari iwe, Musengwa Katonda akoba ati, ‘Bona eno, omwana omulenzi alizaalibwa mu ndhu ya Daudi, ng'eriina lye ni Yosia. Aliitira ku iwe bakabona ab'ebifo ebigulumivu ebisinzibwamu abakuniokerezaaku obubbaani, baaba ng'oti n'omusengo ogugheebwayo. Era amagumba g'abantu galyokerwa ku iwe.’ ”

2 Ebyomubyanda 14:5

Era yaatoola mu bibuga byonabyona ebya Buyudaaya, ebifo ebigulumivu eby'okusinzizaamu, ni alutaari edh'okuniokezaaku obubbaani. Kale, mu biseera bye, obwakyabazinga bwe bwaba mu miraala.

2 Ebyomubyanda 30:14

Baasitukiramu, baatoolagho alutaari dhoonadhoona edhaali mu Yerusalemu, edhaagheerwangaku emisengo n'okuniokezebwangaku obubbaani, baadhisuula mu kaiga Kiduroni.

2 Ebyomubyanda 31:1

Ebyo byonabyona nga biwoire, Abaisiraeli boonaboona abaaligho baaja mu bibuga bya Buyudaaya, baamenhamenha empango edh'amabaale, baasimulagho ebifaananie eby'omusambwa omukazi Ashera n'ebifo ebigulumivu eby'okusinzizaamu, ni alutaari. Baaja baakola batyo mu biketezo ebindi byonabyona ebya Yuda, n'ebya Benjamini, n'ebya Efuraimu, n'ebya Manasse, okutuusa lwe baabizikiriza byonabyona. Agho abantu boonaboona bairayo mu bibuga byaibwe, buli muntu mu kibandha kye.

2 Ebyomubyanda 33:22

Amoni oyo yaakolanga ebibi eri Musengwa Katonda, nga lata we Manasse bye yakolanga. Yaaghangayo emisengo eri ebifaananie byonabyona ise bye yakola, era yaabisinzanga.

2 Ebyomubyanda 33:3

Yaazimba buyaaka ebifo ebigulumivu eby'okusinzizaamu, lata we Hezekia bye yali azikiriiza. Yaateeragho omusambwa Baali alutaari edh'okugusinzizaaku, era yaakola ebifaananie eby'omusambwa omukazi Ashera. Yaasinzanga eby'oku igulu byonabyona era yaafuuka mugheereza waabyo.

2 Ebyomubyanda 34:33

Yosia yaatoola ebyenhinhalwa byonabyona mu kiketezo ky'Abaisiraeli. Olwo yaaleetera Abaisiraeli boonaboona okugheereza Musengwa Katonda waibwe. Era ekiseera kyonakyona kye yamala nga mulamu, abantu tibaalekeraku naire okugheereza Musengwa Katonda, Katonda wa badhaadha baibwe.

2 Ebyomubyanda 34:7

Yaamenhamenha alutaari, yaamulungula ebifaananie eby'omusambwa omukazi Ashera, n'ebifaananie ebindi, yaabisa byafuuka nkungu. Yaatematema n'alutaari dhoonadhoona edhiniokezebwaku obubbaani mu Isiraeli yoonayoona, memale yaira e Yerusalemu.

Zabbuli 18:42

Nabasekula, naabasa ng'oti nkungu etwalibwa empewo, naabatyankirira ng'oti bityanka eby'omu nguudo.

Okuvaayo 23:24

Otakubiranga misambwa gyaibwe makiryaivu, oba okugisinza, oba okukola ebyo beene bye bagikolera. Aye ogizikirizanga, era waamenhamenhanga empango dhaagyo edh'amabaale.

Okuvaayo 32:20

Yaatoola ekifaananie ekyo eky'ente ento enume yaakisaanuusa, yaakisa kyafuuka nsaano. Ensaano eno yaagimansira ku maadhi, yaamala yaaganhwesa Abaisiraeli boonaboona.

Okuvaayo 34:13

Mu kifo eky'okukola nabo endagaano, mumenhemenhegho alutaari dhaibwe, n'ebituuti byaibwe eby'amabaale, era n'ebifaananie bya Ashera, omusambwa gwaibwe omukazi.

Isaia 27:9

Aye Abaisiraeli balisoniyibwa ebibi byaibwe, nga bamaze okumenhamenha alutaari dh'emisambwa n'okusekulasekula amabaale gaadho ni gafuuka ensaano. Era nga bamaze okukomya okuniokezanga obubbaani ku alutaari edho, era nga basaaniizaagho kiisi kamanhiso akooleka omusambwa omukazi Ashera.

Abalevi 26:30

Ndidha kuzikiriza ebifo byaimwe ebigulumivu bye musinzizaamu emisambwa, era mmenheregho irala alutaari dhe muniokezaaku obubbaani olw'emisambwa egyo, n'emirambo gyaimwe ngisuule ku bifaananie eby'emisambwa egyo gye musinza. Mu busungu obungi

Mika 1:5

Ebyo bija kubaagho olw'okuba Abaisiraeli baaloba okugondera amateeka ga Musengwa Katonda, baayonoona. Mukoba muti ogwo musango gw'ani? Musango gwa Samaria ekibuga ekikulu kyene! Era mulowooza muti naani avuunaanibwa olw'Abayudaaya okusinza ebitali Katonda? Ti ni Yerusalemu ekibuga ekikulu kyene!

Amateeka Agokubiri 7:25

Mwokyenga n'omuliro ebifaananie ebibaadhe eby'emisambwa gyaibwe. Muteegwanizanga feeza waire zaabu abiriku, era mutamutwalanga, olwo alobe kubafuukira imwe mutego, kuba okusinza ebitali Katonda kiba ekyenhinhalwa eri Musengwa Katonda.

Amateeka Agokubiri 7:5

Agho ni mubabisenga muti: mumenhemenhenga alutaari dhaibwe, mutemetemenga empango dha bakatonda baibwe edh'amabaale, mwasaageyasaagenga ebifaananie ebibaadhe eby'omusambwa gwaibwe omukazi Ashera, era mwokyenga n'omuliro ebintu byaibwe bye basinza ebitali Katonda.

Amateeka Agokubiri 9:21

Naagema ekintu ekyo eky'ekibi kyaimwe, eyo nga n'ente ento enume ye mwali mukoze, naagisuula mu muliro. Naagikontakonta, naagisekulasekula inho okutuusa lwe yafuuka ng'oti nkungu. Naayugha enkungu yaayo eyo mu kaiga akaalinga nga kakuuluula okuva ku lusozi.