2 Ebyomubyanda 33:14 - Baibuli Ekibono kya Katonda 2014

¹⁴ Ebyo nga biwoire, Manasse yaazimba ekimante eky'okuliya ku kyetebwa Ekibuga kya Daudi ku luuyi lwa Gihoni olw'e buvandhuba mu kiiko, okutuuka aghaingirirwa mu gwetebwa Omulyango ogw'Ebyenhandha, n'okutuukira irala mu kitundu ekyetebwa Ofeli ekiri mu kibuga ekyo. Yaakizimba yaakituusa ghaigulu inho. Era yaata n'abaduumizi b'eigye mu bibuga ebindi ebyezungulwirwa ebimante ebigumu mu Buyudaaya.

2 Ebyomubyanda 33:14 ပူးပေါင်းရင်းမြစ်များ

1 Bakyabazinga 1:33

kyabazinga yaabakoba ati: “Muje n'abakungu bange, mutyamye mutabane wange Solomoni ku nhumbu yange yeene, y'abe avuge. Olwo muserengete e Gihoni,

1 Bakyabazinga 1:45

Era Zadoki kabona ni Nathani omulanzi, bamusiize omuzigo e Gihoni, abe kyabazinga, era baavaayo baaja mu kibuga nga basagamba, olwo ekibuga kyabaamu okuwowoigana. Kale ni okwo n'okwasiikana kwe muwuliire.

2 Ebyomubyanda 17:19

Abo n'abaagheerezanga kyabazinga, nga tobaliireeku abo be yata mu Buyudaaya mwonamwona, mu bibuga ebyezungulwirwa ebimante ebigumu.

2 Ebyomubyanda 27:3

Yaazimba omulyango ogw'eitale ogw'eisinzizo lya Musengwa Katonda, era yaakola inho ku kuzimba ekimante ekigumu eky'oku kibuga Yerusalemu, mu kitundu ekyetebwa Ofeli.

2 Ebyomubyanda 32:30

Era Hezekia mwene oyo, n'eyasemba omweta ogw'amaadhi ogw'eitale, ogw'ensulo ya Gihoni. Yaasimagho ogundi ogwaleetera amaadhi ago okukuuluulira ku luuyi olw'e bugwandhuba bw'ekibuga kya Daudi. Hezekia oyo ebintu byonabyona byamujiiranga bukalamu.

2 Ebyomubyanda 32:5

Agho kyabazinga yaazimba n'omwoyo mulala ekimante eky'oku kibuga ekyali kimenheibwagho, era yaakizimbaku n'ebituuti ebirengererwaku. Yaazimba n'ekimante ekindi kuliya ku ekyo. Yaalongoosa mu Kibuga kya Daudi, ekifo kye baidhuzaamu eitaka olw'okwekuuma abazigu, ekyayetebwanga Millo, kyaba kigumu inho. Yaakola eby'okulwanisa kamaala n'engabo kamaala inho.

Nehemia 12:39

Bwe twava agho, twatuuka ku gwetebwa Omulyango Ogwa Efuraimu, era twaja twatuuka ku gwetebwa Omulyango Omukaire. Era tweyongerayo twatuuka ku gwetebwa Omulyango ogw'Ebyenhandha, ni ku kyetebwa Ekituuti ekya Hananeli, era ni ku kyetebwa Ekituuti Ekyekikumi. Bwe twava agho twatuuka ku gwetebwa Omulyango gw'Entaama, olwo twatuuka ku gwetebwa Omulyango Ogwabakuumi, era twakoma agho.

Nehemia 3:3

Batabane ba Hassena baazimba ogwetebwa Omulyango ogw'Ebyenhandha. Baasimbagho emyango gyagwo, baataamu endhigi dhaamu, era endhigi edho baadhitaaku eminhololo n'ebisiba ebindi.

Isaia 32:14

Kuba ekisaagaati kya kyabazinga balikirekulira bw'agho, n'ekibuga ekyali kikubyeku abantu kyasigala agho kityo. Ensozi n'ebituuti ebirengererwaku, birifuuka bwa mpuku ebyanda n'ebyanda, endogoyi edh'omu nsiko dhaazaanhiranga omwo, n'ebyayo by'abantu byalyanga omwo eisubi.

Zefania 1:10

Era Musengwa Katonda akoba ati: “Ku lunaku olwo, ghaja kubaagho okulira gha Mulyango ogwetebwa ogw'Ebyenhandha ogw'ekibuga Yerusalemu, era ghabeegho okuwowoola mu Kiketezo Ekiyaaka eky'ekibuga ekyo, era ghabeegho okugwa okw'amaani mu nsozi.