2 Ebyomubyanda 31:5 - Baibuli Ekibono kya Katonda 2014

⁵ Ekiragiro ekyo bwe kyamala okulangirirwa, baaleeta mu bungi ebisooka okukungulwa, ku ngaano, ni ku mwenge ogw'emizabbibu, ni ku muzigo ogw'ebibala eby'emiti emyoliva, ni ku mudheenene ogw'endhuki, ni ku birime byonabyona. Era baaleeta mu bungi n'ekintu kirala kirala ku buli bintu ikumi ku ebyo bye baali nabyo.

2 Ebyomubyanda 31:5 ပူးပေါင်းရင်းမြစ်များ

Nehemia 12:44

Ku lunaku olwo baataagho abantu ab'okulabiriranga amaterekero omwateebwanga ebigheebwayo eby'eisinzizo bino: ebirime ebisooka okukungulwa, n'ekintu ekirala ekirala ku buli bintu ikumi omuntu by'afuna. Era mu materekero omwo, mwe baasololezanga emigabo egyagheebwanga bakabona n'Abalevi okuva mu misiri egya buli kibuga, ng'Amateeka bwe galagira. Abayudaaya baakola batyo kuba baasanhukira inho ensambo bakabona n'Abalevi ye baagheerezangamu Katonda,

Nehemia 13:12

Olwo Abayudaaya boonaboona baatoolera okuleeta mu materekero ekitundu ekirala ekirala ku buli bitundu eikumi omuntu by'afuna eky'engaano, n'omwenge ogw'emizabbibu, n'omuzigo ogw'ebibala eby'emiti emyoliva.

Nehemia 13:31

Era naakola entegeka abantu okuleetanga enku mu biseera ebituufu, edh'okwokya ebigheebwayo ku alutaari. Era n'okuleetanga ebigheebwayo byaibwe eby'ebirime ebisooka okukungulwa. Naasaba nti: “Wo Katonda wange, oteerabiranga ebyo bye nkoze. Nkweghemba ompenga ebirungi.”

Okuvaayo 22:29

“Oidha kundeeteranga ebigheebwayo ku birime by'osooka okukungula, ni ku muzigo ogw'emiti emyoliva gy'okamula, ni ku mwenge gw'emizabbibu gw'okunha. Era oidha kumpanga omwana omulenzi anaasookanga okuzaalibwa.

Okuvaayo 23:19

“Emere ye musookanga okukungula mu misiri gyaimwe mugireetanga mu ndhu yange nze Musengwa Katonda waimwe, mwagighaayo. “Mutafumbiranga mamba ya mbuzi nto oba ya ntaama nto, mu mata ga inhaayo.”

Okuvaayo 34:22

“Buli makungula lwe ganaatuukanga mwidha kukolanga Ekibinuko eky'Amakungula ag'engaano esooka. Era ku nkomerero ey'omwaka mwidha kukolanga ekibinuko eky'Entindi eky'okusololeza ebirime mu byagi.

Okuvaayo 34:26

“Emere ye musookanga okukungula mu misiri gyaimwe, mugireetanga mu ndhu yange nze Musengwa Katonda waimwe, mwagighaayo. “Mutafumbiranga mamba ya mbuzi nto, oba ya ntaama nto mu mata ga inhaayo.”

Okuvaayo 35:5

Buli muntu atoole ekigheebwayo akighe Musengwa Katonda. Kiisi ali n'omwoyo omugabi aleetere Musengwa Katonda ekigheebwayo, nga ku bino: zaabu, feeza, n'ekyuma eky'ekikomo.

Ensambo 3:9

Oghanga Musengwa Katonda ekitiisa ng'omugha ebisinga bulungi ku by'ofuna byonabyona, era ng'omugha ku byonabyona ebisooka okukungulwa eby'omu misiri gyo.

Abalevi 27:30

“Ekitundu ekirala ekirala ku buli bitundu eikumi eby'ebirime ebikungulwa mu nsi, kya Musengwa Katonda, ka kibe kya nsigo oba eky'ebibala eby'emiti.

Okubala 18:12

“Nkughaire ebirime ebisinga bulungi ebisooka okukungulwa Abaisiraeli bye bampa, era nga ni bino: omuzigo ogw'ebibala eby'emiti emyoliva, omwenge ogw'emizabbibu n'emere ey'empeke.

Okubala 18:13

Era nkughaire ebibala ebisooka okwenga mu misiri gyaibwe gyonagyona bye bandeetera nze Musengwa Katonda. Buli muntu yeenayeena ow'omu ndhu yo nga mulongoofu, anaabanga wa idembe okubiryaku.

Okubala 18:8

Agho Musengwa Katonda yaakoba Aaroni ati: “Era bona eno, nkughaire ebyo byonabyona ebirekebwagho nga tibyokeibwa ku bigheebwayo ebitukuvu Abaisiraeli bye bampa nze Musengwa Katonda. Mbikughaire iwe ni batabane bo ng'omugabo gwe munaafunanga ebyanda n'ebyanda.

Ab'e Roma 8:23

Aye ti bitonde byonka, aye n'ife beene abali ni Mwoyo ng'ekirabo kya Katonda ekisookera irala mu birabo ebindi, tusinda mu myoyo gyaife nga tuteegerera Katonda okutufuula abaana be n'okununula emibiri gyaife.

1 Ab'e Korintho 15:20

Aye mu butuufu bwene Kurisito yazuukira mu bafu okukakasa ng'abafu balizuukira

Yakobo 1:18

Olw'okwenda kwe mwene yatutonda n'ekibono eky'amazima, olwo tutwale ekifo ekisooka mu bitonde bye.

Okwolekebwa 14:4

N'abo abatukuvu abateeyonoona na bakazi, baasigala nga beegha. N'abo abanonereza Entaama Ento buli y'eja era abaanunulwa mu bantu, baaba ng'oti bibala ebisooka okukungulwa ebigheebwayo eri Katonda n'eri Entaama Ento.