2 Ebyomubyanda 29:24 - Baibuli Ekibono kya Katonda 2014

²⁴ Bakabona baadhiita, baayugha omusaayi gwadho ku alutaari, ng'ekigheebwayo olw'ebibi by'Abaisiraeli boonaboona, bisobole okubatoolebwaku kuba kyabazinga yalagira okughaayo ekigheebwayo ekyokebwa n'ekigheebwayo olw'ebibi, ku lw'Abaisiraeli boonaboona.

2 Ebyomubyanda 29:24 ပူးပေါင်းရင်းမြစ်များ

2 Ebyomubyanda 30:1

Agho kyabazinga Hezekia yaagheereza obukwenda eri abantu boonaboona ab'omu Isiraeli n'ab'omu Buyudaaya, era yaaghandiikira n'ab'omu kiketezo kya Efuraimu n'ab'omu kya Manasse, ng'abakoba okwidha mu isinzizo e Yerusalemu, bakolere Musengwa Katonda, Katonda wa Isiraeli Ekibinuko eky'Okubitizibwa.

Ezera 6:17

Era ku mukolo ogwo baaghaayo ente enume kikumi (100), entaama enume ebikumi bibiri (200), n'entaama ento ebikumi bina (400). Baaghaayo n'embuzi enume ikumi na ibiri (12), embuzi ndalandala olwa buli kika kya Isiraeli, kibe ng'ekigheebwayo olw'ebibi eby'Abaisiraeli boonaboona.

Ezekieli 45:15

Ku ntaama edhiri mu byayiro mu nsi Isiraeli, mwidha kughangayo entaama ndala ndala ku buli ntaama ebikumi ebibiri (200). Ebyo n'ebinaabanga ebigheebwayo eby'emere ey'empeke, n'ebigheebwayo ebyokebwa, n'ebigheebwayo olw'okutabagana, abantu basoniyibwe ebibi byaibwe. Nze Musengwa Katonda ninze nkobye.

Ezekieli 45:17

Era kyabazinga oyo n'aidha okutangagho ebigheebwayo ebyokebwa byonabyona okuwaagho, n'ebigheebwayo eby'emere ey'empeke, n'ebigheebwayo eby'okunhwa, ku mikolo gino: ku mbaga edh'Ebibinuko eby'Okuboneka kw'Omwezi, ni ku Sabbato, ni ku mbaga edh'ebibinuko ebindi ebyalagirwa mu ighanga Isiraeli. Era aidha kutangagho ebigheebwayo olw'ebibi, n'ebigheebwayo eby'emere ey'empeke, n'ebigheebwayo ebyokebwa, n'ebigheebwayo olw'okutabagana, olw'okusabira abantu b'eighanga Isiraeli basoniyibwe ebibi byaibwe.”

Danieli 9:24

“Katonda yalagira ekiseera kya myaka nsanvu emikuzi musanvu ku bantu bo ni ku kibuga kyo ekitukuvu, memale okwonoona kukomezebwe, n'okukola ebibi kuweegho. Olwo ebyonoono bisoniyibwe, ghairegho okukola amazima ebyanda n'ebyanda, n'okubonekerwa n'obulanzi bituukirizibwe, era n'eisinzizo eitukuvu liiremu okutukuzibwa.

Abalevi 1:4

Omuntu oyo aidha kutanga omukono gwe ku mutwe gwayo, olwo Musengwa Katonda asiimenga omusengo gwe, olw'okutoolebwaku ebibi bye.

Abalevi 14:20

yaakighaayo ku alutaari ghalala n'ekigheebwayo eky'emere ey'empeke. Mu nsambo eyo kabona anaaghangayo omusengo olw'omuntu oyo, era omuntu oyo yaaba mulongoofu.

Abalevi 6:30

Aye omusaayi gwakyo bwe gunaaleetebwanga mu Weema ey'Okwagaananirangamu ni Musengwa Katonda, era ni gukozesebwa mu musengo ogugheebwayo olw'ebibi, olwo tikiiriibwengaku kinaayokebwanga bwokebwe.

Abalevi 8:15

Musa oyo yaagiita, era yaatoolaku omusaayi ogundi yaagusiigisa olwala lwe ku bintu ebiri ng'oti mayiga ga nsolo ebiri ku alutaari ku ndhuyi dhaayo dhoonadhoona okugyawulira Musengwa Katonda. Omusaayi ogwasigalagho gwonagwona, yaagufuka ku ntobo y'alutaari. Mu nsambo eyo yaagyawula ebe eya Musengwa Katonda era yaaghaayo omusengo olw'okugitukuza.

Abalevi 9:15

Aaroni bweyamala ebyo, yaaleeta ekigheebwayo eky'abantu: yaatoola embuzi ey'ekigheebwayo olw'ebibi, yaagiita era yaagighaayo olw'ebibi by'abantu ng'oti ni bweyakola ng'aghaayo olw'ebibi bye.

Abaheburayi 2:17

Mbeeni kye kyava kimugwanira okuba nga baganda be mu byonabyona, memale asobole okugheereza Katonda ng'Omukulu wa Bakabona, ow'ekisa era omwesigwa, asoniyise abantu ebibi byaibwe.