2 Ebyomubyanda 18:11 - Baibuli Ekibono kya Katonda 2014

¹¹ N'abalanzi abandi boonaboona baalanga batyo, nga bakoba bati: “Ja olumbe Ramothi eky'e Gileadi, oidha kukighangula. Musengwa Katonda aidha kukikugha okighangule.”

2 Ebyomubyanda 18:11 ပူးပေါင်းရင်းမြစ်များ

1 Bakyabazinga 4:13

Benigeberi yaalabirira ekibuga Ramothi eky'omu Gileadi, n'ebyalo bya Yairi mutabane wa Manasse ebiri mu Gileadi, n'ekiketezo ky'e Arugobu mu Bashani; woonawoona ng'ebyo n'ebibuga ebikologho enkaaga ebyezungulwirwa ebimante ebigumu era ebiri n'eminhololo egisiba endhigi dhaabyo egyakolebwa mu kyuma eky'ekikomo.

2 Ebyomubyanda 18:10

Agho owundi ku balanzi abo, eriina lye nga ni Zedekia mutabane Kenaana, yeekolera amayiga mu kyuma ekigumu einho, yaakoba ati: “Musengwa Katonda akoba ati, ‘Amayiga gano g'oidha okukozesa okufula Abasiria okutuusa lw'olibaghangula.’ ”

2 Ebyomubyanda 18:12

Agho omukwenda eyaja okweta Mikaia, yaakoba Mikaia oyo ati: “Bona eno, abalanzi abandi boonaboona balanze bughanguzi eri kyabazinga. Weena ogwaine olange nga beene bwe bakoze, ng'oyogera bikalamu.”

2 Ebyomubyanda 18:5

Agho kyabazinga wa Isiraeli yaasoloza abalanzi ebikumi bina (400), yaababuuza ati: “Nje numbe Ramothi eky'e Gileadi, oba ntakirumba?” Bairamu bati: “Ja okirumbe, Musengwa Katonda aidha kukikugha okighangule.”

Mika 3:5

Abalanzi abaguya badaaliimya abantu nga basuubiza miraala oyo abagha eky'okulya, ate baalanga okwidha kw'olutalo eri oyo azira ky'abaghaire.

Yuda 1:16

Abantu bano buli kaseera baba mu kutolooma olw'obutasiima, bageyigeyi, bajiira ku kwegomba kwa mibiri gyaibwe, beesaaka era baasuutiriza abantu nga bali ni kye babendaku.

Okwolekebwa 19:20

Ekisolo kyagemebwa ghalala n'omulanzi omuguya eyakola ebyewuunhio mu maiso gaakyo. Ebyewuunhio ebyo bye yakozesa okuguya abo abaaganha okuteebwaku akamanhiso k'ekisolo era n'okusinza ekifaananie kyakyo. Ekisolo ekyo ghalala n'omulanzi omuguya, bombi baasuulibwa mu nhandha ey'omuliro n'obunhota bwa salufa nga balamu.