2 Bakyabazinga 25:7 - Baibuli Ekibono kya Katonda 2014

⁷ Baitira batabane be mu maiso ge ng'alingiriire ati. Era mwene baamutundulamu amaiso, baamusiba mu ndhegere, baamutwala e Babilonia.

2 Bakyabazinga 25:7 ပူးပေါင်းရင်းမြစ်များ

Amainhama 21:16

Yaaja yaatyama ghalaku, mu buleeyi bwa mita nga kikumi. Yaakoba mule ati: “Leka ndobe kubona mwana oyo ng'afa.” Bwe yali ng'atyaime eyo, omwana yaalira.

Amainhama 44:34

Kuba ndituuka ntya eri lata wange, nga omwisuka tali ninze? Tisobola kuguma kubona akabi akalituuka ku lata wange.”

2 Ebyomubyanda 33:11

Kale Musengwa Katonda oyo yaaleeta abaduumizi b'eigye lya kyabazinga ow'e Assiria baalumba Buyudaaya, baagema Manasse n'ebyuma ebiri ng'oti malobo era baamusiba ku ndhegere edh'ekyuma ky'ekikomo, baamutwala e Babilonia.

2 Ebyomubyanda 36:6

Kyabazinga Nebukadinezzari ow'e Babilonia yaidha yaamulwanisa, era yaamala yaamusiba ku ndhegere, yaamutwala e Babilonia.

Zabbuli 149:8

Basibe bakyabazinga abamaghanga ago n'endhegere, n'abakungu baago babasibe n'empingu,

Isaia 22:3

Abakulembeze bo boonaboona baalumuka, era abazigu baamala baabagema nga tibalasiisaaku kasaale waire akalala kati. Abazigu baagema abo boonaboona be baayagaana, waire nga baali balumwike nga batuuse ghala.

Yeremia 21:7

Aye iwe Zedekia, n'abakungu bo, n'abantu abandi abaliwona olutalo n'endwaire eyo n'endhala, nja kubalekera kyabazinga Nebukadinezzari n'abazigu baimwe abandi abendanga okubaita, babageme. Nebukadinezzari oyo aja kubaita aghazira kusonigha waire okusaasira. Nze Musengwa Katonda, ninze nkobye.’ ”

Yeremia 22:30

“Omusaadha ono mumughandiike mu kitabo eky'abaziraku baana, abe ng'oti tabangaku na mwana naire. Era abe ng'oti n'omuntu atalifuna kalungi mu bulamu; kuba taja kubaaku na mwana oba mwidhukulu aja kwiramu kufuga Buyudaaya ng'omusika wa Daudi. Nze Musengwa Katonda, ninze nkobye.”

Yeremia 34:3

Era iwe kyabazinga Zedekia weena toliwona. Balikugema baakutwala ye kyabazinga w'e Babilonia oyo, waayogera naye nga mubonagana maiso ku maiso. Era balimala baakutwala e Babilonia.

Yeremia 37:17

Nga ghabiseeghooku ekiseera, kyabazinga Zedekia yandhetesa bantwale ye yali, era bwenatuukayo yambuuza nga tuli twenka ati: “Ghalighooku obukwenda obuva ye Musengwa?” Nze naamwiramu nti: “Buligho.” Era naamukoba nti: “Iwe baidha kukughaayo eri kyabazinga ow'e Babilonia.”

Yeremia 38:23

Agho naayongeraku kino nti: “Abaisirukale baja kutoola bakazi bo boonaboona n'abaana bo, babatwale e Babilonia. N'iwe mwene toja kubawona, baja kukugema bakugheeyo eri kyabazinga w'e Babilonia, n'ekibuga kino bakyokye omuliro.”

Okulira 2:9

Endhigi dhaakyo dhaagwa era ebiwumpu byadheebungaku, n'eminhololo egyadhisibanga gyamenhekamenheka. Kyabazinga waamu n'abakungu be bali eyo mu maghanga mu bunhage, era mu kibuga ekyo timukaalimu mateeka. Abalanzi baamu tibakaabonekerwa Musengwa Katonda.

Ezekieli 12:11

Bakobe oti ekyo ky'okoze n'akamanhiso k'ebyo ebija okubatuukaku. Balibabinga ewaibwe, baaja mu bunhage.

Ezekieli 7:27

Kyabazinga alirira amaziga, abakungu bawaamu eisuubi, n'abantu boonaboona baadhugumira olw'okutya. Ndibabonereza nga njiira ku bye mwakola, era ndibasalira omusango nga bwe mwagusalira abandi. Olwo mwenamwena mulimanha nga ninze Musengwa Katonda.”

Amateeka Agokubiri 28:34

Enaku eyo ye munaabonanga eidha kubasuulanga bwa iralu.

Amateeka Agokubiri 28:36

“Musengwa Katonda aidha kubatwalanga mu ighanga erindi imwe ni badhaadha baimwe lye mutabangamuuku. Aidha kubatwalanga ghalala ni kyabazinga ye munaabanga nga mutairegho okubafuga. Mu ighanga eryo ye mulisinziza bakatonda abaabaadhibwa mu miti ni mu mabaale.

Abalamuzi 16:21

Abafilisiti baamugema, baamutundulamu amaiso. Era baamutwala e Gaza, baamusibisa endhegere edh'ekyuma eky'ekikomo, baamuta ku mulimo ogw'okuseeranga ku lubengo mu ikomera.