2 Bakyabazinga 23:3 - Baibuli Ekibono kya Katonda 2014

³ Kyabazinga Yosia era yaayemerera gha mpango, yaakola endagaano mu maiso ga Musengwa Katonda, nga bw'aidha okugemanga amateeka n'ebiragiro bye n'omutima gwe gwonagwona era n'omwoyo gwe gwonagwona, era atuukirizenga ebiri mu ndagaano eyo, nga bwe byaghandiikibwa mu kitabo ekyo. Abantu boonaboona baakakasa nga bwe baidha okukuumanga endagaano eyo.

2 Bakyabazinga 23:3 ပူးပေါင်းရင်းမြစ်များ

2 Bakyabazinga 11:14

Okuja okulinga ati, ng'abona kyabazinga ayemereire gha mpango, agheemerera kyabazinga ng'empisa bweyali, ng'abafuuyi b'amagwala bamuli kumpi. Era ng'abantu boonaboona bali kusagamba nga bwe bafuuwa amagwala. Agho Athalia yaakanulamu ebivaalo bye olw'okunakughala, nga bw'akoba ati: “Mundiiremu olukwe! Mundiiremu olukwe!”

2 Bakyabazinga 11:17

Yehoiada kabona yaaleetera kyabazinga n'abantu, okukola endagaano ni Musengwa Katonda ekakasa nga bwe baidha okubanga abantu aba Musengwa Katonda. Era yaakola endagaano ghagati gha kyabazinga n'abantu.

2 Ebyomubyanda 15:15

Abantu boonaboona ab'omu Buyudaaya baasangaalira okulayira okwo, kuba baalayira n'omutima gwaibwe gwonagwona. Era kuba baanoonia Musengwa Katonda n'omwoyo gwaibwe gwonagwona baamuzuula, yaabagha emiraala ku ndhuyi dhaibwe dhoonadhoona.

2 Ebyomubyanda 23:13

Okuja okulinga ati, ng'abona kyabazinga ayemereire okumpi n'omulyango gha mpango agheemerera kyabazinga, ng'abaduumizi b'eigye n'abafuuyi ab'amagwala bamuli agho kumpi. Era ng'abantu boonaboona bali kusagamba nga bwe bafuuwa amagwala. N'abembi boona nga bali kukuba ebivuga byaibwe, nga bakulemberamu enhembo. Agho Athalia yaakanulamu ebivaalo bye olw'okunakughala, nga bw'akoba ati: “Mundiiremu olukwe! Mundiiremu olukwe!”

2 Ebyomubyanda 23:16

Agho Yehoiada kabona yaakola endagaano ni kyabazinga, era n'abantu boonaboona aghalala, ekakasa nga bwe baidha okubanga abantu aba Musengwa Katonda.

2 Ebyomubyanda 29:10

“Mperaano nsazeegho okukola endagaano ni Musengwa Katonda, Katonda wa Isiraeli, olwo alekere agho okutwolekeza obusungu bwe obubitiriire.

Ezera 10:3

Kale ni tukole endagaano ni Katonda waife, tutoolegho abakazi abo n'abaana baibwe, nga tujiira ku magezi ge tunaafuna okuva ye iwe musengwa wange, ni y'abo boonaboona abagondera ebiragiro bya Katonda waife oyo. Ekyo twidha kukikola nga tujiira ku mateeka.

Nehemia 10:1

Bano n'abantu abaataaku ebinkumu byaibwe: Nehemia eyali omufuzi era nga mutabane wa Hakalia, ni Zedekia. Bano ni bakabona abataaku ebinkumu byaibwe:

Nehemia 5:13

Era naakunkumula olusibiro lwange nga nkoba nti: “Katonda agwananga yaakunkumula atyo omuntu yeenayeena ataatuukirizenga kisuubizo ky'akoze olwaleero luno, yaamutoola mu ndhu ye ni ku mulimo gwe. Omuntu oyo akunkumulwenga, asigalenga mukaya bekayakaya.” Abantu abaali beesoloiza bairamu buti: “Amiina!” Era baasaaka Musengwa Katonda. Abantu baakola nga bwe baasuubiza.

Nehemia 9:38

“Olw'ebyo byonabyona, kyetuva tuli kukola endagaano enkakafu mu bughandiike. Era abakungu baife, n'Abalevi baife, ni bakabona baife, bagitaireku ebinkumu byaibwe.”

Okuvaayo 24:3

Agho Musa yaaja yaakobera abantu ebyo byonabyona Musengwa Katonda bye yamukoba era n'ebiragiro. Era abantu boonaboona bairamu n'omwoyo mulala bati: “Ebyo byonabyona Musengwa Katonda by'atukobye twidha kubikola.”

Omulangirizi 8:2

Ogonderanga ekiragiro kya kyabazinga olw'ekirayiro kye walayira.

Yeremia 34:15

Ghano dhuuzi imwe mwakola ekyansanhusa, mwakyusa ekirowoozo, mwalangirira okulekula Baisiraeli banaimwe abairu babe ba idembe, era mwakola endagaano mu maiso gange mu isinzizo lino eryange lyene.

Yeremia 34:8

Kyabazinga Zedekia yaisania n'abantu ab'omu Yerusalemu ku ky'okulekula abairu babe ba idembe.

Yeremia 4:2

era ni muba abatuufu nga mulayira mu mazima era nga muli beesimbu, muti, ‘Nga Musengwa Katonda bw'ali omulamu.’ Olwo amaghanga gaidha kunsabanga ngaghe enkabi, era gampenga ekitiibwa.”

Yeremia 50:5

Balibuuza engira eja e Sioni, era baasimba mu ngira eyo nga bakoba bati, ‘Mwidhe tweyimbe ku Musengwa Katonda, tukole naye endagaano ey'ebyanda n'ebyanda, ye tutaja kumenhagho naire.’

Amateeka Agokubiri 10:12

Musa yaayongera okukoba Abaisiraeli ati: “Mpegaano ni, imwe Abaisiraeli, Musengwa Katonda waimwe ky'ayenda mukole ni kino: Mumutyenga era mujiirenga ku ebyo byonabyona by'abalagira. Mumugonzenga era mumusinzenga n'omutima gwaimwe gwonagwona, n'omwoyo gwaimwe gwonagwona,

Amateeka Agokubiri 11:13

“Kale ni mufubenga okutuukiriza ebiragiro, bye mbaghaire olwaleero. Mugonzenga Musengwa Katonda waimwe, mumugheerezenga n'omutima gwaimwe gwonagwona, n'omwoyo gwaimwe gwonagwona.

Amateeka Agokubiri 13:4

Mujiirenga ku Musengwa Katonda waimwe by'abalagira, era mumutyenga. Mumuwulirenga era mukuumenga ebiragiro bye. Mumusinzenga era mubenga beesigwa y'ali

Amateeka Agokubiri 29:1

Eno n'endagaano Musengwa Katonda ye yalagira Musa okukola n'Abaisiraeli mu nsi Moabu, ng'eyongerwa ku ndagaano Musengwa Katonda ye yakola nabo ku lusozi Sinai.

Amateeka Agokubiri 4:45

Kuno n'okulamba, n'amateeka, n'ebiragiro, Musa bye yakobera Abaisiraeli bwe baava mu Misiri.

Amateeka Agokubiri 6:1

Agho Musa yaakoba Abaisiraeli ati: “Gano n'amateeka, n'ebiragiro, n'okulamba, Musengwa Katonda waimwe bye yandagira okubeegeresa. Mubituukirizenga mu nsi ye muli kumpi okwingiramu okutwala, ere nga musomoike omwiga Yorudani.

Amateeka Agokubiri 6:5

Mugonzenga Musengwa Katonda, oyo Katonda waimwe, n'omutima gwaimwe gwonagwona, n'amaani gaimwe goonagoona.

Amateeka Agokubiri 8:19

Bwe mulyerabira Musengwa Katonda, ni mujiira ku bakatonda era ni mubasinza, mbalabula olwaleero nti timuliroba kuzikirira.

Abaheburayi 12:24

Mwidhie ye Yesu eyakwania endagaano empyaka. Mwidhie y'omusaayi ogumansirwa, ogwogera ebikalamu okusinga ogwa Abeli.

Abaheburayi 13:20

Nsaba Katonda ow'emiraala, eyazuukiza Musengwa waife Yesu, eyafuuka Omwayi w'entaama omukulu, olw'okuyugha omusaayi gwe ogwataagho endagaano etawaagho,