2 Bakyabazinga 23:13 - Baibuli Ekibono kya Katonda 2014

¹³ Kyabazinga Yosia yaayonoona ebifo ebigulumivu eby'okusinzizaamu ebyali ku lwetebwa Olusozi olw'Okwonoona oluli ku luuyi olw'e buvandhuba wa Yerusalemu. Ebifo ebyo, kyabazinga Solomoni owa Isiraeli yali abizimbiire ebifaananie eby'emisambwa egyenhinhalwa: ekindi nga kya musambwa omukazi Ashera ogw'Abasidoni, ekindi kyaba kya musambwa Kemoshi ogw'Abamoabu, n'ekindi kyaba kya musambwa Moleki ogw'Abammoni.

2 Bakyabazinga 23:13 ပူးပေါင်းရင်းမြစ်များ

1 Bakyabazinga 11:33

Ndidha kukola ntyo, kuba Solomoni oyo yanvaaku yaasinza omusambwa omukazi Ashitorethi ogw'Abasidoni, n'omusambwa Kemoshi ogw'Abamoabu, n'omusambwa Milikomu ogw'Abammoni. Yandheemera yaakola ebibi, yaaloba kugema mateeka na biragiro byange, nga lata we Daudi bwe yakolanga.

1 Bakyabazinga 11:5

Solomoni yaasinza omusambwa omukazi Ashitorethi ogw'Abasidoni, n'omusambwa Milikomu ogw'Abammoni, ogwenhinhalwa.

1 Bakyabazinga 11:7

Agho yaazimba ku lusozi oluli ku luuyi olw'e buvandhuba wa Yerusalemu, ekifo ekigulumivu eky'okusinzizaamu omusambwa Kemoshi ogw'Abamoabu ogwenhinhalwa, n'eky'okusinzizaamu omusambwa Moleki ogw'Abammoni, gwona era ogwenhinhalwa.

Nehemia 13:26

Naabakoba nti: “Timwidhi nga Solomoni kyabazinga wa Isiraeli, abakazi ng'oti n'abo n'abaamuleetera okwonoona? Mu maghanga goonagoona tiyabaayooku kyabazinga eyali ng'oti ni ye, era Katonda we yamwenda inho yaamufuula kyabazinga wa Isiraeli yoonayoona. Aye ate abakazi abamaghanga agandi baamuleetera yeena okwonoona.

Isaia 44:19

Omuntu akola ekisinzibwa ekitali Katonda, taidhukira waire okwefumintirizaaku mule ati: “Ekitundu ky'omuti ogwo nkikumiisa omuliro naagufumbisa emere, era naatalikaku n'emamba naagirya. Memale obwo ekitundu kyagwo ekisigairegho ate kye nnaafuula ekisinzibwa ekyenhinhalwa, era ni nkikubira n'amakiryaivu, ate nga kiti buti?”

Yeremia 11:13

Abantu b'omu Buyudaaya bali ni bakatonda kamaala, abaagayaga n'obungi bw'ebibuga byaibwe. N'abantu b'omu Yerusalemu baazimba alutaari edhaagayaga n'obungi bw'enguudo dh'omu kibuga omwo. Alutaari edho nga dha kuniokezaaku bubbaani eri omusambwa Baali ogwenhinhalwa.”

Yeremia 48:13

Olwo Kemoshi katonda w'Abamoabu, alitoolera okugemya Abamoabu abo ensoni, ng'oti ni Betheli ekifo Abaisiraeli kye beesiganga, bwe kyagemya Abaisiraeli abo ensoni.

Yeremia 48:16

Akabi akali kwidhira Moabu kali kumpi, okuzikirira kwayo kuseese.

Yeremia 48:7

Iwe Moabu, eira weesiganga amaani go n'obukombe bwo, aye mpegaano weena baja kukughangula; era katonda wo ayetebwa Kemoshi, baidha kumutwala mu bunhage, ghalala ni bakabona be n'abakungu be.

Zefania 1:5

Nja kuzikiriza abo abaaniina ghaigulu ku ndhu okusinza ebintu eby'oku igulu, n'abo boonaboona abansinza nze Musengwa Katonda, kabiri ni bamala balayira omusambwa Moleki.

Okubala 21:29

Mukagwireku imwe ab'e Moabu! Muzikiriire imwe abasinza omusambwa Kemoshi! Omusambwa ogwo gulese batabane baimwe baafuuka ekiyiigibwa, ate baghala baimwe baafuuka abanhage ba Sihoni kyabazinga ow'Abamori.

Abalamuzi 10:6

Agho Abaisiraeli kabiri baakola ebibi ye Musengwa Katonda, nga basinza emisambwa, Baali ni Ashitarothi. Era baasinza bakatonda b'Abasiria, n'ab'Abasidoni, n'ab'Abamoabu, n'ab'Abammoni, n'ab'Abafilisiti. Abaisiraeli abo, baava ku Musengwa Katonda, baalekera agho okumusinza.

Abalamuzi 11:24

Iwe twala ebyo byonabyona omusambwa gwo Kemoshi, bye gukugha okuba ebibyo. Aye ife twidha kutwala ebyo byonabyona Musengwa Katonda waife by'atoola ku bandi n'atugha.

Abalamuzi 2:13

Baava ku Musengwa Katonda, baagheereza emisambwa egyetebwa Baali ni Ashitarothi.

1 Samueli 12:10

Agho badhaadha baimwe baalirira Musengwa Katonda, nga bakoba bati: ‘Twakola ebibi, kuba twava ku Musengwa Katonda twagheereza emisambwa Baali ni Ashitarothi. Aye mperaano tukweghemba otuwonie abazigu baife, twidha kukugheerezanga.’

1 Samueli 7:4

Kale Abaisiraeli baatoolagho ebifaananie by'emisambwa Baali ni Ashitarothi, baagheereza Musengwa Katonda yenka.