2 Bakyabazinga 11:18 - Baibuli Ekibono kya Katonda 2014

¹⁸ Agho abantu boonaboona baaja baingira mu isabo lya Baali, baalimenhagho. Era baamenhamenha alutaari n'ebifaananie bye. Ni kabona we eyayetebwanga Mattani, baamwitira emberi w'alutaari. Yehoiada kabona yaataagho abakuumi okukuumanga eisinzizo lya Musengwa Katonda.

2 Bakyabazinga 11:18 ပူးပေါင်းရင်းမြစ်များ

1 Bakyabazinga 18:40

Agho Eliya yaabakoba ati: “Mugeme abalanzi ba Baali, ghalobe kubaagho alumukagho waire omulala.” Kale baabagema. Eliya yaabaserengesa ku kaiga Kishoni, yaabaitira eyo.

2 Bakyabazinga 10:21

Yehu yaayetesa mu Isiraeli mwonamwona abantu abasinza Baali. Baidha boonaboona, ghaaloba kubaayo waire omulala asigalayo. Agho baingira mu isabo lya Baali, lyonalyona lyaidhula.

2 Bakyabazinga 10:25

Yehu bwe yamala okughaayo ekigheebwayo ekyokebwa, yaakoba abakuumi n'abaduumizi ati: “Mwingire mubaite, ghalobe kubaagho alumuka kuwona waire omulala.” Kale baasowolayo empiima baabaita, emirambo baagisuula kuliya. Olwo abakuumi n'abaduumizi baingira mu kifo eky'omunda eky'eisabo lya Baali,

2 Bakyabazinga 10:26

baatoolamu empango ya Baali, baagyokya.

2 Bakyabazinga 10:27

Kale baamenhagho empango ya Baali eyo, era baamenhagho n'eisabo lye. Eisabo eryo ghe lyali, baafuulagho ekifo eky'okujangamu okweyamba, era kityo bwe kikaali ni ye buli eno.

2 Bakyabazinga 18:4

Yaatoolagho ebifo ebigulumivu eby'okusinzizaamu, yaamenhagho empango, era yaatematema ebifaananie by'omusambwa omukazi Ashera. Era yaamenhamenha omusota ogw'ekyuma eky'ekikomo Musa gwe yakola n'agweta Nehushitani kuba n'okutuusa mu biseera ebyo, Abaisiraeli baali bakaaguniokeza obubbaani.

2 Bakyabazinga 23:10

Kyabazinga Yosia era yaayonoona ekifo ekyayetebwanga Tofethi, ekyali mu kiiko eky'Abahinnomu. Olwo ghalobenga kubaagho muntu yeenayeena ayokerayo mutabane we oba mughala we, ng'ekigheebwayo ekyokebwa eri omusambwa Moleki.

2 Bakyabazinga 23:14

Kyabazinga Yosia yaamenhamenha empango, era yaatematema n'ebifaananie eby'omusambwa Ashera. Mu bifo byabyo yaidhuzaamu amagumba g'abafu.

2 Bakyabazinga 23:20

Yaitira bakabona ab'omu bifo ebigulumivu eby'okusinzizaamu ku alutaari dhe baagheerezangaku, era alutaari edho yaadhookeraku amagumba g'abafu. Olwamala okukola atyo, yairayo e Yerusalemu.

2 Ebyomubyanda 21:17

Baalumba ensi Buyudaaya baagighangula, baanhaga ebintu byonabyona mu kisaagaati kya kyabazinga. Baanhaga ni bakazi be, n'abaana be boonaboona, okutoolaku Yehoahazi omwana we omulenzi nkoma.

2 Ebyomubyanda 34:4

Baamenhamenha alutaari edh'omusambwa Baali nga Yosia aligho mwene, baatematema ni alutaari edh'okuniokezebwaku obubbaani edhaali ghaigulu gh'edho. Baamulungula ebifaananie eby'omusambwa omukazi Ashera, n'ebifaananie ebindi ebibaadhe, n'ebyo ebyakolebwa mu kyuma ekisaanuusiibwa, baabisa byafuuka nkungu era enkungu eyo baagimansira ku magombe g'abo abaaghangayo emisengo y'ebifaananie ebyo.

2 Ebyomubyanda 34:7

Yaamenhamenha alutaari, yaamulungula ebifaananie eby'omusambwa omukazi Ashera, n'ebifaananie ebindi, yaabisa byafuuka nkungu. Yaatematema n'alutaari dhoonadhoona edhiniokezebwaku obubbaani mu Isiraeli yoonayoona, memale yaira e Yerusalemu.

Okuvaayo 32:20

Yaatoola ekifaananie ekyo eky'ente ento enume yaakisaanuusa, yaakisa kyafuuka nsaano. Ensaano eno yaagimansira ku maadhi, yaamala yaaganhwesa Abaisiraeli boonaboona.

Isaia 2:18

N'ebisinzibwa byonabyona ebitali Katonda biriweekereragho irala.

Amateeka Agokubiri 12:2

Muli n'okuzikiriza ebifo byonabyona, ab'amaghanga ge muja okutwala mwe basinziza bakatonda baibwe: ku nsozi enene, ni ku busozi obutono, ni ghansi mu binsense by'emiti emizibirivu.

Amateeka Agokubiri 12:3

Mumenhemenhengagho alutaari dhaibwe, mutemetemenga empango dha bakatonda baibwe edh'amabaale, mwokyeyokyenga ebifaananie ebibaadhe eby'omusambwa gwaibwe omukazi Ashera, era mwasaageyasaagenga ebintu byaibwe bye basinza ebitali Katonda, byerabirirwenga irala ku nsi.

Amateeka Agokubiri 13:10

Oidha kumukubanga amabaale afe, kuba yagezaaku okukusendasenda ove ku Musengwa Katonda wo, eyakutoola mu Misiri, ye mwakolanga obwiru.

Amateeka Agokubiri 13:5

Aye omulanzi oyo oba omuvuunuzi w'ebirooto oyo, aitibwenga, kuba abakoba kudheemera Musengwa Katonda waimwe, eyabatoola mu Misiri, ye mwakolanga obwiru. Omuntu ng'oti n'oyo aba ali kubadaaliimya okubatoola ku mpisa, Musengwa Katonda waimwe dhe yabalagira okugemanga, ky'anaavanga n'aitibwa, ni mwetoolaku ekibi ekyo.

Amateeka Agokubiri 13:6

“Ni bw'aba muganda wo mwene, oba mutabane wo, oba mughala wo, oba mukazi wo y'oyenda einho, oba mukagwa wo einho, yeena asobola okukusendasenda mu kyama ng'akukoba muje naye musinze bakatonda iwe ni badhaadha bo be mutasinzangaku.

Amateeka Agokubiri 13:9

Mwitenga bwite! Era niiwe obe osookenga okumukuba okutoolereza okumwita, memale abandi boonaboona bamukubenga afe.