1 Timotheo 3:15 - Baibuli Ekibono kya Katonda 2014

¹⁵ Aye bwenaaba nga ndwire, bino binaakumanhisa bwetugwaine okwebisa nga bwe tuli abantu ba Katonda, ekyo nga n'Ekikunsu eky'Abaikiriza mu Kurisito ekya Katonda omulamu, era ng'ekyo n'empango n'omusingi ogw'amazima.

1 Timotheo 3:15 ပူးပေါင်းရင်းမြစ်များ

1 Bakyabazinga 2:2

“Ekiseera kyange eky'okufa ng'abantu boonaboona bwe bali n'okufa, kiri kumpi okutuuka. Kale oba nga wa maani era ogumanga kisaadha.

1 Bakyabazinga 2:4

Era olwo Musengwa Katonda atuukirizenga kye yansuubiza, bwe yankoba ati ku baidhukulu bange n'okunaabanga anaafuganga Isiraeli, kasita baidhukulu bange abo baneegenderezanga okugema bye yalagira n'omutima gwaibwe gwonagwona, era n'omwoyo gwaibwe gwonagwona.

2 Bakyabazinga 19:4

Kyabazinga w'e Assiria yatuma omukungu we omukologho okwidha okudhooga Katonda omulamu. Musengwa Katonda wo agwaine awulire ebyo byonabyona omukungu oyo by'ayogeire, era amubonereze olw'okubyogera.’ Kale ni sabira abo abanaawonagho ni basigala nga bakaaligho.”

1 Ebyomubyanda 22:13

Bw'onaagonderanga Amateeka n'ebiragiro Musengwa Katonda bye yagha Isiraeli ng'abita mu Musa, ebintu byonabyona biidha kukujiiranga bukalamu. Guma omwoyo, otatya, era otawaamu maani.

Zabbuli 42:2

Ng'omuntu ali n'endiwo bw'aba, zeena ntyo bwe nhenda einho okuba iwe Katonda wange gh'oli, Katonda iwe omulamu. Ndituukaku li mu maiso go ni nkubona?

Zabbuli 84:2

Neegomba inho okuba mu isinzizo lya Musengwa Katonda! Zeenazeena ndidhwire eisanhu, nga nhembera Katonda omulamu.

Yeremia 1:18

“Bona eno, olwaleero nkufiire ng'oti n'ekibuga ekyezungulwirwa ebimante ebigumu, oba ng'oti n'empango eyakolebwa mu kyuma ekigumu einho, oba ng'oti n'ekisenge ekyakolebwa mu kyuma eky'ekikomo olwanise bakyabazinga ba Buyudaaya, n'abakungu baayo, ni bakabona baayo, era n'abantu baayo boonaboona.

Yeremia 10:10

Aye iwe Musengwa Katonda, niiwe Katonda mwenemwene, niiwe Katonda omulamu era kyabazinga ow'ebyanda n'ebyanda. Bw'osungughala ensi etengeeta, era amaghanga goonagoona tigasobola kugumira kiruyi kyo.

Yeremia 23:36

Kale ni batakozesanga bibono ebyo, ‘Omugugu gwa Musengwa Katonda,’ kuba oyo alibikozesa yeenayeena, nja kufuula obukwenda bwange bube omugugu gwene omuzito eri omuntu oyo. Abantu bafuulaniafuulania ebibono byange nze Musengwa Katonda waibwe, Afuga amagye.

Danieli 6:26

Ndi kugha ekiragiro nti mu biketezo byonabyona ebiri mu bwakyabazinga bwange, abantu boonaboona batyenga Katonda wa Danieli, bamutengamu ekitiisa. Kuba oyo ni Katonda omulamu, aligho ebyanda n'ebyanda. Obwakyabazinga bwe ghazira asobola kubuzikiriza, n'obukumu bwe tibuliwaagho.

Hosea 1:10

Abaisiraeli baliba bangi inho ng'oti musenho gwa ku nhandha ogutasoboka kubalibwa oba okupimwa. Mperaano Katonda abakoba ati: “Timuli bantu bange,” aye ekiseera kirituuka yaabakoba ati: “Muli baana ba Katonda omulamu.”

Matayo 16:16

Simoni Petero yaamwiramu ati: “Niiwe Kurisito Omwana wa Katonda omulamu.”

Matayo 18:18

“Bwenebwene ka mbakobere: Byonabyona bye munaasibanga ku nsi nga ni mu igulu bisibiibwa ate byonabyona bye munaasimululanga ku nsi nga ni mu igulu bisimulwirwa.

Yoanne 1:17

Kuba, nga Katonda bwe yateeka Amateeka ng'abita mu Musa, ekisa n'amazima abibisa mu Yesu Kurisito.

Yoanne 14:6

Yesu yaamwiramu ati: “Ninze engira, ninze amazima, era ninze obulamu. Ezira atuuka ye Lata okutoolaku ng'abise mu nze.

Yoanne 18:37

Pilato yaamukoba ati: “Ekikoba oli kyabazinga?” Yesu yaamwiramu ati: “Okyogeire, ndi kyabazinga. Kino kye nazaalirwa, era ekyandeeta mu nsi ni kino: okumanhisa amazima. Oyo yeenayeena ow'amazima, awulira eiroboozi lyange.”

Yoanne 6:69

Twidhi era twikiriza nga niiwe Omutukuvu wa Katonda.”

Ebikolwa by'Abatume 1:2

okutuusa ku lunaku lwe yatwalibwa mu igulu, ng'amaze okugha Abatume be yali alonze ebiragiro ku bwa Mwoyo Mutukuvu.

Ebikolwa by'Abatume 14:15

“Basaadha imwe, lwaki mukola ebyo? Twena tuli bantu buntu nga imwe. Tubaleeteire Amawulire Amalungi, musobole okuleka ebyo ebitaganhula, mwire ye Katonda omulamu eyakola eigulu, n'ensi, n'enhandha ni byonabyona ebibirimu.

Ab'e Roma 3:2

Kugasa inho mu buli nsambo. Ekisooka, Abayudaaya Katonda be yasooka okugemya ekibono kye.

Ab'e Roma 9:26

Mu kifo gheene ghe bayeterwa ‘Abatali bange’, agho gheene ghe balyeterwa abaana ba Katonda omulamu.”

1 Ab'e Korintho 10:32

Mutakolanga kintu ekireetera Abayudaaya, oba abamaghanga agandi, oba Ekikunsu eky'Abaikiriza mu Kurisito ekya Katonda okugwa mu kibi.

1 Ab'e Korintho 3:16

Timwidhi nga muli isinzizo lya Katonda, era nga Mwoyo wa Katonda aba mu imwe?

2 Ab'e Korintho 3:3

Kyeyoleka nga muli oti mbaluwa eva ye Kurisito, ife ye twaleeta, etaaghandiikibwa na bwino aye eyaghandiikibwa ni Mwoyo wa Katonda omulamu. Era etaaghandiikibwa ku bipande bya mabaale, aye eyaghandiikibwa ku bipande eby'emyoyo gy'abantu.

2 Ab'e Korintho 6:16

Eisinzizo lya Katonda liisania litya n'ebyo ebisinzibwa ebitali Katonda? Kuba ife, niife eisinzizo lya Katonda Omulamu, era nga Katonda mwene bw'akoba ati: “Ndidha kubanga mu bantu bange, era mu abo mwe naatambuliranga Ndidha kubanga Katonda waibwe, boona baidha kubanga bantu bange.”

2 Ab'e Korintho 6:7

Twogera amazima n'amaani ga Katonda, era twakozesa obutuufu ng'eky'okulwanisa kyaife mu kulumba ni mu kwetaasa.

Ab'e Galatia 2:9

Yakobo, Petero ni Yoanne, abaabonekanga okuba nga n'abakulembeze, baakibona nga Katonda yangemya omulimo omukulu guno. Kale baatugema mu ngalo, nze ni Barunaba, ng'akamanhiso akooleka nga tuli bakozi banaibwe ku mulimo n'omulala. Era twaisania ife tuje mu bamaghanga agandi, ate beene baje mu bakekete.

Ab'e Galatia 3:1

Imwe abantu ab'e Galatia abazira magezi, muli baloge? Abantu abainhonholwa obukalamu, ni mubona Yesu Kurisito nga bwe yakomererwa ku musalaba!

Ab'Efeso 4:21

Nkakasa nga mwamuwuliraku, era imwe ng'ababe, mwayegeresebwa amazima agali mu Yesu.

Amateeka Agokubiri 31:23

Agho Musengwa Katonda yaataagho Yoshua mutabane wa Nuni ng'omukulembeze wa Isiraeli, yaamukoba ati: “Ba mugumu era mumalirivu. Kuba niiwe oidha okutuusa Abaisiraeli mu nsi ye nasuubiza, era ndidha kubanga ghalala n'iwe.”

Amateeka Agokubiri 5:26

Naani mu bantu boonaboona, eyaali awuliireku amamiro ga Katonda omulamu ng'ali kwogera mu muliro ghagati, nga ife bwe tuwuliire, aye omuntu oyo n'asigala ng'akaali mulamu?

Ab'e Kolosai 1:5

olw'ebyo bye musuubira, ebyabakuumirwa mu igulu. Bino mwabiwuliraku mu bibono eby'amazima, Amawulire Amalungi.

1 Ab'e Thessalonika 1:9

kuba abantu abo beene bwe baba batughayaku bakoba nga bwe mwatusangaalira einho bwe twali mu imwe. Era nga bwe mwakyuka okuva ku bisinzibwa ebitali Katonda ni mwira ku kugheereza Katonda mwene omulamu.

1 Timotheo 3:14

Ndi kukughandiikira bino nga nsuubira okwidha amangu y'oli.

1 Timotheo 3:16

Bwenebwene ekyama eky'endhikiriza yaife kikologho: “Yaboneka nga muntu mwene, yaakakasibwa Mwoyo, yabonebwa bamalaika. Yaalangirirwa mu maghanga, yaikirizibwa mu nsi yoonayoona, era yaatwalibwa mu igulu mu kitiisa.”

1 Timotheo 3:2

Omulabirizi tateekwa kubaaku ni kye bamwogeraku. Ateekwa okuba n'omukazi mulala, ateekwa okuba nga yeefuga, ataamu amagezi mu by'akola, yeebisa bukalamu, asangaalira abageni, ate aidhi okwegeresa.

1 Timotheo 3:5

Kuba omuntu ataghanga kufuga maka ge, asobola atya okulabirira Ekikunsu eky'Abaikiriza mu Kurisito ekya Katonda?

1 Timotheo 4:10

Kye tuva ni tufaabiikana era ni tufuba einho, lwa kuba eisuubi lyaife liri mu Katonda omulamu Omulokozi w'abantu boonaboona, aye okusingira irala ow'abo abaikiriza.

1 Timotheo 6:16

Ni yenka atafa era aba mu butangaavu obutaseetekaku, ghazira yaali amuboine, era ghazira aghanga kumubona. Aisibwengamu ekitiisa era afugenga ebyanda n'ebyanda. Amiina.

2 Timotheo 2:19

Aye omusingi gwa Katonda mugumu era gughandiikiibwaku ebibono ebikoba biti: “Musengwa aidhi ababe,” era ni biti “Kiisi ayatula eriina lya Musengwa ateekwa okuva mu bibi.”

2 Timotheo 2:20

Mu ndhu enkologho timubaamu bibya bya zaabu na feeza byonka, aye mubaamu n'eby'omuti n'eby'eitosi ebindi bikozesebwa ku mirimo egy'ebbeeyi, ate ebindi byakozesebwa ku mirimo egyabuliidho.

Abaheburayi 10:21

Nga bwe tuli ni kabona omukulu, akulira enhumba ya Katonda,

Abaheburayi 12:22

Aye imwe mwidhie ku lusozi Sioni era mu kibuga kya Katonda omulamu, Yerusalemu eky'omu igulu, eyeesololeiza bamalaika olukunkumuli.

Abaheburayi 3:12

Kale aboluganda, mwegendereze ghalobe kubaagho naire mulala ku imwe aba na mwoyo mubi era ogutaikiriza, n'ava ku Katonda omulamu.

Abaheburayi 9:14

Oba ng'ekyo kityo bwekiri, memale omusaayi gwa Kurisito tigulisingagho inho kututukuza ni tugheereza Katonda omulamu ku lwa Kurisito aziraku kimyamya, eyeeghaayo ye Katonda mu maani ga Mwoyo atawaagho?

Yoshua 3:10

Bwe munaaja nga mweyongerayo emberi, mwidha kumanha nga Katonda oyo omulamu ali n'imwe, kuba aidha kuja ng'abingagho Abakanaani, Abahitti, Abahivi, Abaperizzi, Abagirigashi, Abamori n'Abayebusi.

1 Petero 2:5

Mwidhe y'ali nga muli ng'oti n'amabaale amalamu, abazimbemu endhu ey'omwoyo. Mube bakabona abatukuvu abagheereza emisengo egy'omwoyo egisiimibwa Katonda, nga mubita mu Yesu Kurisito.

1 Petero 4:17

Ekiseera eky'okusalirwa omusango kituuse era abantu ba Katonda beene n'abaja okusooka okusalirwa. Kale oba nga aja kusooka n'ife, memale leero kiriba kitya n'abo abaloba okuwulira Amawulire Amalungi agava ye Katonda?

Okwolekebwa 7:2

Era naabona malaika owundi ng'ali kuniinaniina okuva e buvandhuba, ng'ali n'ekitaaku akamanhiso ka Katonda omulamu. Yaayeta n'amaani bamalaika abana abaali bagheereibwa obukumu okuzikiriza obukalu n'enhandha ku nsi.

1 Samueli 17:26

Daudi yaabuuza abantu abaali beemereire okumpi naye, ati: “Kiki kye baja okukolera omuntu anaita Omufilisiti oyo, n'atoola ku Isiraeli ekyobeera ekyo? Obwo katyo Omufilisiti oyo atali mukekete naani, yeena okunhooma eigye lya Katonda omulamu?”

1 Samueli 17:36

Nze omugheereza wo, nga bwembairenga nga ndhita empologoma n'ensolo enkambwe, era ntyo bwe ndidha okwita n'Omufilisiti oyo atali mukekete, anhoomye amagye ga Katonda omulamu.”