1 Petero 2:15 - Baibuli Ekibono kya Katonda 2014

¹⁵ Katonda ayenda inho musirise obutamanha obw'abasiru, nga mukola ebikalamu.

1 Petero 2:15 ပူးပေါင်းရင်းမြစ်များ

Yobu 2:10

Aye Yobu yaamukoba ati: “Oli kwogera ng'oti n'abakazi abasirusiru bwe boogera. Obwo, tunaasanhukiranga birungi byonka Katonda by'atugha, twaloba kusanhukira bitunhiga by'atugha?” Mu ebyo byonabyona ebyagwagho Yobu tiyayogera bubi ku Katonda.

Yobu 5:16

Olwo abaavu baaba n'eisuubi, era abakozi ab'ebibi baabula eky'okwogera.

Zabbuli 107:42

Bino abatuufu babibona baasangaala, aye abakozi b'ebibi baabula eky'okwogera.

Zabbuli 5:5

Toyenda na kulinga ku beesaakiriza, era okyagha abakozi b'ebibi.

Ensambo 9:6

Va mu bantu abazira kye baidhi obe mulamu, era weebise mu nsambo eyoleka ng'otegeera.”

Yeremia 4:22

Musengwa Katonda akoba ati: “Abantu bange basiru tibandidhi naire. Basiru ng'oti bwa baana bato; baziramu kutegeera naire. Bakugu mu kukola ebibi, aye tibaidhi kukola birungi.”

Matayo 25:2

Abataanu ku abo baali basiru, ate abataanu nga bagezi.

Matayo 7:26

“Aye buli awulira ebibono byange bino n'atabijiiraku afaanana omusaadha omusirusiru eyazimba endhu ye ku musenho:

Ab'e Roma 1:21

Waire baamanha Katonda aye tibaamwisaamu kitiisa nga Katonda, oba okumwebaza. Aye baira mu kulowooza bitagasa n'emyoyo gyaibwe egizira kye giidhi gyaidhula enzikiiza.

Ab'e Galatia 3:1

Imwe abantu ab'e Galatia abazira magezi, muli baloge? Abantu abainhonholwa obukalamu, ni mubona Yesu Kurisito nga bwe yakomererwa ku musalaba!

Amateeka Agokubiri 32:6

Obwo bwene, mutyo bwe mugwaine okubisa Musengwa Katonda, imwe abantu abasiru era abatategeera? Ti ni iseimwe eyabataagho? Ti n'eyabafuula eighanga?

1 Ab'e Thessalonika 4:3

Katonda ayenda, mube batukuvu, era mulekere irala obwenzi.

1 Ab'e Thessalonika 5:18

era mu byonabyona mweyanzenga. Kuba ekyo Katonda ky'abendaku mu bulamu bwaimwe mu Kurisito Yesu.

1 Timotheo 1:13

Eira namuvumanga, naamukiriga, era naamwogeraku bubi, aye yansaasira, kuba ebyo nabikolanga mu butamanha, nga nkaali kumwikiriza.

Tito 2:8

Kozesanga ebibono ebituufu byene omuntu by'atasobola kubisaamu maiso olwo, abazigu bo baswale olw'okubula ekibi kye basobola okutwogeraku.

Tito 3:3

kuba twena eira twali basiru era abadheemu, nga twadaaliima era nga tufugibwa okwegomba kwaife n'amasanhu aga buli nsambo. Twali ba itima era ab'ensaalwa, ng'abantu batukyagha era nga tukyagha abantu boonaboona.

1 Petero 2:12

Mwebisenga bukalamu nga muli mu bamaghanga agandi. Olwo balobe kuboogeraku bati muli bakozi ba bibi, aye babone nga bye mukola bikalamu era basaake Katonda ku lunaku lw'aliidha.

1 Petero 3:16

Mubenga baamufu mu myoyo gyaimwe, olwo muswazenga abo ababavuma n'ababoogeraku obubi ku mpisa dhaimwe enkalamu edh'Obukurisito.

1 Petero 3:17

Ekisinga bukalamu n'okudaazibwadaazibwa olw'okukola ekituufu, bwe kuba nga n'okwenda kwa Katonda, mu kifo eky'okudaazibwadaazibwa olw'okukola obubi

1 Petero 4:2

Olwo ekiseera ky'amala ng'akaali mu mubiri, yaaba nga takaafugibwa kwegomba kwa mubiri okutoolaku okufugibwa Katonda by'ayenda.

2 Petero 2:12

Aye abantu bano bali ng'oti nsolo busolo edhizira magezi, edhijiira obw'oku butonde edhizaalibwa nga dha kuyiigibwa na kwitibwa. Kiisi kye bataidhi bakivumagana. Boona balizikirizibwa ng'ensolo edh'omu nsiko.

Yuda 1:10

Aye abantu bano bavuma kiisi kye bataidhi, ate ebyo bye baidhi babiidhi bwa mu butonde okufaananaku ensolo edh'omu nsiko. Era byene ebyo n'ebibazikiriza.