1 Ebyomubyanda 28:2 - Baibuli Ekibono kya Katonda 2014

² Agho kyabazinga Daudi yaayemerera, yaakoba ati: “Muwulire bye nkoba, imwe baganda bange era bantu bange. Nayenda inho okuzimbira Esanduuku y'Endagaano ya Musengwa Katonda endhu mw'enaabanga, kibenga ekifo Katonda waife mw'afugira. Era nali ntegeike okuzimba,

1 Ebyomubyanda 28:2 ပူးပေါင်းရင်းမြစ်များ

Amainhama 48:2

Bwe baakobera Yakobo bati: “Omwana wo Yosefu aidhie okukubona,” Yakobo yeekakabya, yaatyama ku buliri.

1 Bakyabazinga 1:47

Ate ekindi, abakungu ba kyabazinga baidhie okweisuusa musengwa waife kyabazinga Daudi, baakoba bati, ‘Tweghemba Katonda wo afuule Solomoni okuba omumanhifu okusinga iwe bw'obaire, era afuule obwakyabazinga bwa Solomoni oyo bube bukologho inho okusinga obubwo bwe bubaire.’ Agho kyabazinga Daudi yeebaliza ku buliri bwe,

1 Bakyabazinga 5:3

“Oidhi nga lata wange, olw'entalo dhe yali n'okulwana n'ensi dh'abazigu edhaali dhimwezungulwire ku ndhuyi dhoonadhoona, tiyaghanga kuzimbira Musengwa Katonda we isinzizo, okutuusa Musengwa Katonda oyo bwe yamusobozesa okughangula abazigu be boonaboona.

1 Ebyomubyanda 17:4

“Ja okobe omugheereza wange Daudi oti Musengwa Katonda akoba ati, ‘Ti niiwe oja okunzimbira endhu ey'okubangamu.

1 Ebyomubyanda 22:14

Nze ku lwange mu bukaluubirivu obungi, nkoze kyonakyona ekisoboka, naateeragho eisinzizo talanta edha zaabu edhighera emitwalo eikumi (100,000) ni talanta edha feeza edhighera akakaire akalamba (1,000,000) n'ekyuma eky'ekikomo, taaku n'ekyuma ekigumu einho, ebitasoboka kupimika olw'obungi bwabyo. Era naataagho n'emiti, n'amabaale. Weena okwo kw'obe oyongereze ebindi.

1 Ebyomubyanda 22:6

Agho yaayeta mutabane we Solomoni, yaamusikirira okuzimbira Musengwa Katonda, Katonda wa Isiraeli eisinzizo.

1 Ebyomubyanda 22:7

Daudi yaakoba Solomoni oyo ati: “Mwana wange, nayenda inho okuzimbira Musengwa Katonda wange eisinzizo okumugheesa ekitiisa.

1 Ebyomubyanda 6:31

Ghaligho abantu Daudi be yataagho okukulira eby'okwemba mu kifo eky'okusinzizaamu Musengwa Katonda, ng'Esanduuku y'Endagaano bamaze okugingiza mu kifo ekyo.

2 Ebyomubyanda 6:7

Solomoni yaayongera okukoba ati: “Lata wange Daudi yali n'ekidhuubo eky'okuzimbira Musengwa Katonda, oyo Katonda wa Isiraeli eisinzizo.

Zabbuli 110:1

Musengwa Katonda yakoba musengwa wange ati: “Tyama ghano ku luuyi lw'omukono gwange omusaadha, okutuusa lwe ndita abazigu bo ghansi gh'ebigere byo.”

Zabbuli 132:14

Yaakoba ati: “Kino n'ekifo kyange ebyanda n'ebyanda; ghano ghe ndidha okubanga, kuba mwene ntyo bwe nhenze.

Zabbuli 132:2

Wo Musengwa Katonda, idhukira ebyo Daudi oyo bye yasuubiza, ebyo bye yeeyama eri iwe Omukologho wa Yakobo.

Zabbuli 22:22

Ndidha kukoberanga abantu bange by'onkoleire; ndidha kukusaakanga nga ndi mu bantu abeesoloiza okukusinza.

Zabbuli 99:5

Musaake Musengwa Katonda waife, mumusinze nga muli mu maiso ag'ekityamo kye eky'obwakyabazinga, kuba mutukuvu!

Isaia 60:13

Abantu balireeta emiti egiva e Lebanoni, emisipuressi, emipulane, n'emyalumugi, baagizimbisa buyaaka eisinzizo lyange okuliwoomya, n'okugheesa ekibuga kyange ekitiisa.

Isaia 66:1

Musengwa Katonda akoba ati: “Eigulu n'ekityamo kyange eky'obwakyabazinga, ate ensi, kwe nta ebigere byange. Kale mulinzimbira ndhu nabaki? Era kifo ki mwe ndiwuumulira?

Okulira 2:1

Ha, Musengwa asungughaire era yeesoomeire okubonereza ekibuga Sioni! Ebintu byamu abantu bye baatwalanga okuba eby'omughendo, abiswire ghansi ng'oti bikaba. Waire ng'ekibuga ekyo n'ekibaire ekityamo eky'obwakyabazinga bwe, Musengwa oyo akirekuliire agho olw'okuba asungughaire.

Ezekieli 43:7

“Iwe omuntu, kino n'ekifo ekibaamu ekityamo kyange eky'obwakyabazinga, ekifo mwe nnaabanga nga ndi mu bantu bange Abaisiraeli okubafuganga ebyanda n'ebyanda. Ka babe abantu beene ab'eighanga Isiraeli oba bakyabazinga baibwe, ghazira aliirayo kabiri kwonoona liina lyange eitukuvu, n'anvaaku kusinza bintu ebitali nze Katonda, oba okuzimbira emirambo gya bakyabazinga ebiidhukizo

Matayo 25:16

Eyafuna talanta eitaanu yaja mangu ago yaadhisuubuza, yaazaazaamu talanta edhindi itaanu.

Ebikolwa by'Abatume 7:49

‘Eigulu n'ekityamo kyange, ate n'ensi, okwo kwe nta ebigere byange. Kale mulinzimbira ndhu nabaki? Oba kifo ki mwe ndiwuumulira?

Amateeka Agokubiri 17:15

Aye mumalanga kukakasa, nga ye muli kutaagho n'oyo Musengwa Katonda y'alonze. Ateekwa okuba nga wa ighanga lyaimwe. Mutagezangaku kutaagho musenze kuba kyabazinga waimwe.

Amateeka Agokubiri 17:20

Bw'anaakolanga atyo, ekyo kinaamuwonianga okwekuluntaza n'okulowooza ati n'asinga Baisiraeli baine. Era kyamuwonia okudaaliimanga n'ava ku biragiro bino. Olwo anaaghangaaliranga ku bwakyabazinga bwe, ni baidhukulu be abalimwiririra boona baabughangaaliraku, mu Isiraeli.”