1 Bakyabazinga 4:21 - Baibuli Ekibono kya Katonda 2014

²¹ Solomoni yafuga obwakyabazinga obwali mu kiketezo ekiva ku mwiga Eufurate okutuuka ku nsi y'Abafilisiti, n'okutuuka ku nsalosalo ni Misiri. Abantu b'omu biketezo ebyo baamughanga empooza era baamugheerezanga ekiseera kyonakyona kye yamala nga mulamu.

1 Bakyabazinga 4:21 ပူးပေါင်းရင်းမြစ်များ

Amainhama 15:18

Ku lunaku olwo, Musengwa Katonda yaakola endagaano ni Aburamu. Yaakoba ati: “Baidhukulu bo mbaghaire ensi eno yoonayoona okuva ku nsalosalo ya Misiri okutuuka ku mwiga omukologho Eufurate.

2 Samueli 8:2

Bwe yamala yaaghangula Abamoabu. Yaabalambaaza ghansi mu nhiriri isatu. Olwo yaitaku enhiriri eibiri, yaalekagho lulala. Agho Abamoabu baafuuka bagheereza ba Daudi, era nga bamughanga omusolo.

2 Samueli 8:6

Agho Daudi yaata enkambi edh'abalwani mu Aramu eky'e Damasiko, Abasiria baafuuka bagheereza be nga bamugha omusolo. Musengwa Katonda yaaghanga Daudi obughanguzi buli ye yajanga.

1 Bakyabazinga 12:4

“Lata wo Solomoni yatukaluubiriza inho ekibitiriire, yaatukozesa emirimo emikakali era emizito. Aye iwe tugondeze ku bulamu, otukendeereze ku buzito obwo, twidha kukugheerezanga.”

1 Bakyabazinga 3:13

Era nkughaire n'ebindi by'otasabye: obukombe n'ekitiibwa mu bulamu bwo bwonabwona, ghabule kyabazinga owundi yeenayeena ayagayaga n'iwe.

1 Bakyabazinga 4:22

Eby'okulya Solomoni bye yeetaaganga buli lunaku, byabanga kilo enkumi itaanu (5,000) edh'obuwunga obw'engaano obuseereibwa obukalamu, ni kilo omutwalo mulala (10,000) edh'obuwunga obundi,

1 Bakyabazinga 4:24

Solomoni yafuganga ekiketezo kyonakyona eky'e bugwandhuba bw'omwiga Eufurate, okuva ku Tifusha okutuuka e Gaza, ng'afuga bakyabazinga baamu boonaboona. Era yali mu miraala n'ebiketezo byonabyona ebyali bimwezungulwire.

2 Bakyabazinga 17:3

Agho kyabazinga Shalumaneseri ow'e Assiria, yaalumba Hoshea yaamughangula mu lutalo, Era Hoshea oyo yaaghanga Shalumaneseri omusolo.

2 Ebyomubyanda 17:5

Kale Musengwa Katonda yaaleetera obwakyabazinga bwa Yehoshafati okukakata, era abantu b'omu Buyudaaya boonaboona baaleeteranga Yehoshafati oyo omusolo, yaakombaghala era yaaba wa kitiibwa inho.

2 Ebyomubyanda 32:23

Agho abantu kamaala baidha e Yerusalemu nga baleeteire Musengwa Katonda ebirabo, era nga baleeteire ni kyabazinga Hezekia owa Buyudaaya ebintu eby'omughendo. Okuva ku olwo, amaghanga goonagoona gaatanga mu Hezekia oyo ekinhagansi kya maani.

Ezera 4:20

Era bakyabazinga ab'amaani baafuganga Yerusalemu ekyo, era baafuganga n'ekiketezo ekyo kyonakyona ekiri ere ng'osomoike omwiga Eufurate, nga baasolozaamu empooza, n'omusolo, n'ebisale ebindi.

Zabbuli 68:29

ng'oli mu isinzizo lyo e Yerusalemu bakyabazinga ye bakutonerera ebirabo.

Zabbuli 76:11

Imwe abantu mutuukirize eri Musengwa Katonda, oyo Katonda waimwe ebyo bye mweyama; imwe abali mu biketezo ebimwezungulwire mwenamwena mumutonere ebirabo, oyo atiibwa abantu boonaboona.

Okuvaayo 23:31

Nja kutaagho ensalosalo yaimwe eve ku Nhandha Emyufu okutuuka ku nhandha ey'ab'e Filisitia era eve ku irungu etuuke ku mwiga Eufurate. Abantu abo ababa mu biketezo ebyo nja kubata mu ngalo dhaimwe, era mwidha kujanga nga mubabingagho nga bwe munaajanga nga museetayo.

Omulangirizi 2:25

kuba aghazira Katonda naani asobola okulya oba okusanhuka?

Okulira 1:1

Ha, ekibuga ekyaidhulanga abantu kamaala, kyasigalira kweinhamira. Ekibuga ekyateebwangamu ekitiisa ensi yoonayoona, buti kiri ng'oti namwandu! Ekyalinga ng'oti ni muka omufuzi, buti kyafuuka ng'oti mukazi mwiru.

Ezekieli 16:13

Kale waaba nga weenaweena nkudholiige ni zaabu ni feeza, era ng'ovaala engoye empegheevu, n'edha liiri edhaalukibwa obukalamu. Waalyanga emere esinga obulungi, n'omuzigo ogw'ebibala eby'emiti emyoliva, era waanhwanga n'omudheenene ogw'endhuki. Olwo weeyongera okuba omuntu aboneka obulungi einho, waanhirira ng'oti bwa muka kyabazinga.

Amateeka Agokubiri 11:24

Buli kifo kye munaaniinangaku ekigere, kiidha kubanga kyaimwe. Ensalosalo dhaimwe dhinaavanga ku irungu ku luuyi olw'omukono omusaadha olw'e buvandhuba, dhaatuuka ku nsozi dh'e Lebanoni ku luuyi olw'omukono omugooda olw'e buvandhuba. Era dhinaavanga ku mwiga Eufurate mu buvandhuba, dhaatuuka ku Nhandha Eyaghagati mu bugwandhuba.

Yoshua 1:4

Ekiketezo kyaimwe kiidha kuvanga ku irungu okutuuka ku nsozi dh'e Lebanoni, n'okuva ku mwiga omunene Eufurate oguli e buvandhuba, nga mutwaliizaamu ensi yoonayoona ey'Abahitti, mutuuke ku Nhandha Eyaghagati ku luuyi olw'e bugwandhuba.

1 Samueli 10:27

Aye ghaabaagho abantu abazira kye bagasa, abaakoba bati: “Omusaadha oyo alituwonia atya?” Kale baamunhooma, baaloba kumutwalira birabo. Aye mwene yaabaleka buleke.