1 Bakyabazinga 22:8 - Baibuli Ekibono kya Katonda 2014

⁸ Kyabazinga wa Isiraeli yaakoba Yehoshafati ati: “Ghakaaligho omuntu ye tusobola okubitamu okwebuuzaaku ku Musengwa Katonda. Oyo ni Mikaia, mutabane wa Imula. Aye timwenda naire, kuba talangangaku bikalamu ku nze, okutoolaku ebibi.” Yehoshafati yaakoba ati: “Kyabazinga, otakoba otyo.”

1 Bakyabazinga 22:8 ပူးပေါင်းရင်းမြစ်များ

Amainhama 37:8

Baganda be baamubuuza bati: “Olowooza oti iwe olifuuka kyabazinga waife, era waatufuga?” Kale beeyongera okumukyayira irala olw'ebirooto bye, n'olw'ebibono bye.

1 Bakyabazinga 18:4

era Yezebeli bwe yaita abalanzi ba Musengwa Katonda, Obadia oyo yaatwala abalanzi kikumi yaabagisa mu mpuku mu bikunsu bibiri eby'abantu ataanu ataanu. Era yaabafuniranga emere n'amaadhi.

1 Bakyabazinga 19:10

Eliya yairamu ati: “Enkikidi engemye ku lulwo, iwe Musengwa Katonda Afuga Amagye, kuba Abaisiraeli baamenha endagaano ye wakola nabo. Baamenhagho alutaari dho, era baita abalanzi bo. Nze zenka, ninze nsigairegho, ate zeena bali kwenda kundhita.”

1 Bakyabazinga 19:14

Eliya yairamu ati: “Enkikidi engemye ku lulwo, iwe Musengwa Katonda Afuga Amagye, kuba Abaisiraeli baamenha endagaano ye wakola nabo. Baamenhagho alutaari dho, era baita abalanzi bo. Nze zenka, ninze nsigairegho, ate zeena bali kwenda kundhita.”

1 Bakyabazinga 21:20

Ahabu bwe yabona Eliya, yaamukoba ati: “Ongwikiriiza, omuzigu wange iwe?” Eliya yaamwiramu ati: “Yii, nkugwikiriiza, kuba weegheereireyo irala mu kukola ebibi mu maiso ga Musengwa Katonda.

1 Bakyabazinga 22:13

Agho omukwenda eyaja okweta Mikaia, yaakoba Mikaia oyo ati: “Bona eno, abalanzi abandi boonaboona balanze bughanguzi eri kyabazinga. Weena ogwaine olange nga beene bwe bakoze, ng'oyogera bikalamu.”

1 Bakyabazinga 22:18

Kyabazinga Ahabu owa Isiraeli yaakoba Yehoshafati ati: “Tyakukobeire nti taidha kulanga bikalamu ku nze, okutoolaku ebibi!”

1 Bakyabazinga 22:27

mubakobe muti, ‘Kyabazinga alagiire ati omusaadha oyo mumute mu ikomera, era mumughenga emere n'amaadhi nga mumupimiraku bupimire, okutuusa nga ndhize bukalamu.’ ”

1 Bakyabazinga 22:7

Aye Yehoshafati yaakoba ati: “Ghano ghaziraghooku mulanzi wa Musengwa Katonda wundi tumwebuuzeeku?”

1 Bakyabazinga 22:9

Agho kyabazinga wa Isiraeli yaayeta mulala ku bakungu be, yaamukoba ati: “Ja mangu oleete ghano Mikaia mutabane wa Imula.”

2 Bakyabazinga 9:22

Yoramu bwe yabona Yehu, yaamubuuza ati: “Yehu, oidhie lwa miraala?” Yehu yairamu ati: “Miraala ki egisobola okubaagho, ng'okusinza ebitali Katonda n'obulogo ebya inhoko Yezebeli bikaaligho ebingi bityo?”

2 Ebyomubyanda 36:16

Aye baayeeyereza abakwenda ba Katonda baanhooma bye yabakoba, era baasekerera abalanzi be, okutuusa lwe baaleetera Musengwa Katonda oyo okubasungughalira ekibitiriire, nga tibakaasobola kuwona.

Zabbuli 34:21

Aidha kuleetera omukozi w'ebibi okufa olw'ebibi bye, era abo abakyagha abantu abatuufu abasalire omusango gubasinge.

Ensambo 15:12

Omuntu omunhoomi tayenda kunenezebwa, era taghanga kuja kwebuuzaaku ku bamusinga magezi.

Ensambo 29:10

Abatemo bakyayira irala omuntu aziraku musango, aye abeesimbu balabirira omuntu oyo.

Ensambo 9:8

Otanenianga muntu yeekuluntaza, aja bwa kukukyagha. Aye onenianga muntu mugezi, kuba oyo aja kukusiima.

Isaia 3:11

Aye ababi bakagwireku! Ebyaibwe bibi, kuba byene bye baakolanga ku bandi, ni byene ebyo bye baidhanga boona okubakolaku.

Isaia 30:10

Bakoba ababoni bati, ‘Mulekere agho okubonekerwa’ baakoba n'abalanzi bati, ‘Mutalanga bituufu bye mubonekeirwa. Aye mulange ebyo ebitunhoonha, ebitali bituufu naire era eby'obuguya.

Isaia 49:7

Musengwa Katonda Omutukuvu era Omununuzi wa Isiraeli, yeeyongera yaayogera n'omugheereza w'abafuzi oyo abantu ye banhooma einho, n'amaghanga ye gakyagha. Yaamukoba ati: “Bakyabazinga balikubona ng'osibwirwa, baasituka baakutaamu ekinhagansi, n'abakungu boona balikubona baakukubira amakiryaivu; kuba Musengwa Katonda omwesigwa era Omutukuvu wa Isiraeli n'eyakulonda.”

Yeremia 18:18

Agho abantu beeteesa bati: “Mwidhe tubeeku ni kye tukola Yeremia ono. Ni bwetunaamutoolagho, tituja kubula bakabona ba kutugalagiranga, era tituja kubula bagezi ba kwebuuzangaku, waire okubulwa abalanzi abatukobera obukwenda bwa Katonda. Ka tumuteeku emisango, era tulekere okuwulirisanga by'akoba.”

Yeremia 20:10

Mpulira nga boonaboona boogera obwama bati: “Entiisa egemye buli ghantu. Ka tumwogereku bubi, tumuseeghe mu b'obuyinza!” Bakagwa bange beene n'abakoba batyo, nga baguniriire okubona bwe ngwa. Era nga bakoba bati: “Oba katyo tunaamusalira amagezi twamugemya, olwo twamwesasulizaaku.”

Yeremia 36:23

Agho Yehudi bwe yamalanga okusoma ebitundu ebibiri oba ebina ku nzingo y'ekitabo eyo, nga kyabazinga abisalaku n'akambe akatono, ng'abisuula mu muliro. Yaakola atyo okutuusa enzingo y'ekitabo yoonayoona bweyawaagho okuya.

Yeremia 38:4

Agho abakungu baaja ye kyabazinga, baamukoba bati: “Omusaadha ono bamwite bwite, kuba ensambo y'ali kwogeramu emala mu baisirukale amaani abali mu kibuga kino, era n'abantu abandi abakaasigaire mu kibuga kino. Tali kukolerera bulungi bwa bantu bano, aye ali kubaitaitana bwitaitane.”

Amosi 5:10

Abantu imwe, mukyagha omuntu abatakania olw'okusaliriza mu mbuga dh'amateeka. Era n'omuntu ayogera amazima abasina.

Mika 2:11

“Abantu bano benda omulanzi aja ng'abakobera obukwenda obwidhwire okuguya, ng'abakoba ati, ‘Mwidha kufunanga omwenge ogw'emizabbibu n'ebitamiiza ebindi.’

Mika 2:7

Odhuuba oti Abaisiraeli Musengwa Katonda yatukolimira? Oba oti okuguminkiriza kwe kwakendeera? Mbo bwenebwene Musengwa Katonda aghanga okukola ebintu oti n'ebyo? Buliidho tayogera na kivunika n'abo abakola obulungi?”

Zekaria 11:8

Ghaabaagho abaayi basatu abankyagha ni bandeetera okubeesinwa. Kale naababinga mu mwezi mulala guti.

Matayo 10:22

Abantu boonaboona balibakyagha olw'eriina lyange. Aye oyo alyekalangula okutuusa ku nkomerero, alirokolwa.

Yoanne 17:14

Nze nabakoba ekibono ekyo, era ensi yaabakyagha, kuba ti ba nsi ng'oti ninze bwe ntali wa nsi.

Yoanne 7:7

Ensi tesobola kubakyagha, aye nze enkyagha, kuba mpa obudhulizi ku bikolwa byayo ebibi.

Ab'e Galatia 4:16

Olwo mperaano nfuuse muzigu waimwe olw'okubakobera ekituufu?