1 Bakyabazinga 2:32 - Baibuli Ekibono kya Katonda 2014

³² Musengwa Katonda aidha kumubonereza ng'amulanga ebikolwa bye eby'ekitemo, kuba yaita abasaadha babiri nga lata wange Daudi taidhi. Abasaadha abo baali batuufu era nga bali n'ebisaanizo okumusinga, era nga ni bano: Abuneri mutabane wa Neri era omuduumizi w'eigye lya Isiraeli, ni Amasa mutabane wa Yetheri era omuduumizi w'eigye lya Buyudaaya.

1 Bakyabazinga 2:32 ပူးပေါင်းရင်းမြစ်များ

Amainhama 4:11

Buti okolimiirwa era ghazira ky'okaafuna kuva mu itaka eryasaimya omunwa, ni linhwa omusaayi gwa muganda wo y'oise.

Amainhama 42:22

Reubeni yaabakoba ati: “Nze tinabakoba nti omwana mutamukolaku kabi, aye imwe ni muloba kuwulira? Mpegaano kye tuva tuli kubonerezebwa olw'okufa kwe.”

Amainhama 9:6

Omuntu yakolebwa mu mboneka ya Katonda: Kale ole bw'anaitanga omuntu, yeena aidhanga kwitibwa.

2 Samueli 1:16

Daudi yaakoba Omuamaleki oyo ati: “Niiwe mwene oweereeteire okufa, kuba omunwa gwo gwene n'ogughaire obudhulizi obukulumiriiza, ng'okoba oti, ‘Naita omuntu wa Musengwa Katonda eyasiigibwa omuzigo.’ ”

2 Samueli 17:25

Abusalomu yali nga yalonda Amasa okukulira amagye ng'aira mu kifo kya Yoabu. Amasa oyo yali mutabane w'omusaadha eyayetebwanga Ithura Omuishimaeli, eyali afumbiirwa Abigaili mughala wa Nahashi, era muganda wa Zeruia eyazaala Yoabu.

2 Samueli 3:29

Yoabu n'ab'endhu ya ise boonaboona, n'ababe bavunaanibwenga omusango ogwo. Mu buli luse olw'ab'endhu eyo mugwananga mwabaamu ali n'endwaire ey'okutoonha okuva mu bitundu eby'ekyama, oba ali n'endwaire ey'ebigenge, oba omulema azira ky'aghanga, oba aitibwa mu lutalo, oba abulwa emere.”

2 Samueli 3:37

Agho abantu ba Daudi boonaboona n'Abaisiraeli boonaboona, baakitegeera ku lunaku olwo ng'okwita Abuneri mutabane wa Neri tiyali ntegeka ya kyabazinga.

2 Samueli 3:39

Olwaleero luno mpulira nga nziramu maani, waire nga ninze kyabazinga eyasiigibwa omuzigo. Batabane ba Zeruia bano, banfuukire ekizibu. Oyo eyakola ekibi ekyo, Musengwa Katonda agwananga yaamwesasuulizaaku mu nsambo emugwaniire olw'obubi bwe.”

2 Samueli 4:11

Memale obwo imwe abantu ababi mutyo, abajiire ni mwita Ishiboshethi omuntu aziraku musango mu buliri bwe, mudhuuba muti tiibavunaane kusingagho ni mbazikiriza kuva ku nsi?”

1 Bakyabazinga 2:44

Kyabazinga era yaakoba Shimei ati: “Oidhi bukalamu mu mwoyo gwo ebibi byonabyona bye wakola lata wange Daudi. Kale Musengwa Katonda ky'anaava n'akubonereza.

1 Bakyabazinga 2:5

“Ate era oidhi Yoabu mutabane wa Zeruia kye yankola, bwe yatemula abaduumizi b'eigye lya Isiraeli ababiri Abuneri mutabane wa Neri, ni Amasa mutabane wa Yetheri. Yabatemulira mu biseera eby'emiraala, ng'abeesasuulizaaku olw'abantu abaitibwa mu ntalo. Mu nsambo eyo yandeetera okuvunaanibwa ogw'okwita abantu abaziraku musango.

1 Bakyabazinga 8:32

wuliranga ng'oli eyo mu igulu era olamulenga abagheereza bo. Era bonerezanga aliku omusango nga bw'agwaniire, ate weedheerezenga aziraku musango, omusasulenga ng'ojiira ku butuufu bwe.

2 Ebyomubyanda 21:13

Aye weebisanga bubi nga bakyabazinga ba Isiraeli bwe baakolanga, waaleetera abantu b'omu Yerusalemu n'ab'omu Buyudaaya boonaboona okuva ku Musengwa Katonda, ng'oti ni Ahabu n'ab'endhu ye bwe baaleetera Abaisiraeli okuva ku Musengwa Katonda oyo. Era okwo waayongeraku n'eky'okwita baganda bo, abaana ba lata wo mwene, abaali abantu abakalamu okusinga n'iwe.

2 Ebyomubyanda 21:14

Kale ni bona eno, Musengwa Katonda aidha kuleeta endwaire embi einho egeme abantu bo, n'abaana bo, ni bakazi bo, era aidha kuzikiriza n'ebintu byo byonabyona.

Zabbuli 7:16

Entegeka dhe edh'okukola ebibi dhimwiriraku mwene, era obukambwe bwene bw'akozesa n'obumutaaku enguma.

Zabbuli 7:17

Neeyanza Musengwa Katonda olw'obutuufu bwe, era nhemba enhembo edhisaaka Musengwa Katonda, oyo Katonda Ali Ghaigulu Yeene.

Ezekieli 17:19

Musengwa Katonda kyava n'akoba nti: “Bwenebwene ndayira nti nga bwendi omulamu, ndimwesasulizaaku olw'okunhoomoola kye yeeyama ye ndi, n'amenha endagaano yange.

Okubala 32:23

Aye bwemutaakole mutyo, mukimanhe nti munaaba mukoze ekibi eri Musengwa Katonda, era nga bwenebwene muja kubonerezebwa olw'ekibi ekyo.

Abalamuzi 9:24

Ekyo kyaligho, Abimeleki n'abantu ab'e Shekemu abaamughaganga okwita batabane ba Gideoni ensanvu, beesasuuzibwe olw'omusango gwaibwe ogwo.

Abalamuzi 9:57

Katonda era yaabonereza abantu b'omu Shekemu olw'ekibi kyaibwe. Ni Yothamu, mutabane wa Gideoni, kye yakolima kyatuukirira.

1 Samueli 15:28

Samueli yaamukoba ati: “Musengwa Katonda akukanwireku obwakyabazinga bwa Isiraeli olwaleero, yaabugha muliraanwa wo akusinga obulungi.