1 Bakyabazinga 2:15 - Baibuli Ekibono kya Katonda 2014

¹⁵ Adoniya yaakoba ati: “Oidhi bukalamu nga ninze eyali ow'okusikira obwakyabazinga, era ng'abantu boonaboona mu Isiraeli ekyo kye baali basuubira. Aye muganda wange yaafuuka kyabazinga, kuba Musengwa Katonda atyo bwe yayenda.

1 Bakyabazinga 2:15 ပူးပေါင်းရင်းမြစ်များ

2 Samueli 12:24

Agho Daudi yaagumya mukazi we Bathisheba, yaaba naye mu buliri yaatoola enda, yaazaala omwana mulenzi. Daudi yaatuuma omwana oyo eriina Solomoni. Musengwa Katonda yaagonzanga inho omwana oyo,

2 Samueli 15:13

Ghaabaagho omukwenda eyaja n'akobera Daudi ati: “Abaisiraeli bakuviireku baize ku luuyi lwa Abusalomu.”

2 Samueli 15:6

Abusalomu yaakolanga atyo ku buli Muisiraeli yeenayeena eyaidhanga ye kyabazinga okumumalira ensonga dhe. Mu nsambo eyo yaaleetera Abaisiraeli okukyuka, baamwikiririzaamu.

2 Samueli 16:18

Hushai yaamwiramu ati: “Busa, ndidha kubanga ku luuyi olw'oyo Musengwa Katonda y'alonze, era n'abantu bano boonaboona Abaisiraeli ye balonze. Kale nze ndidha kubanga ghalala n'iwe.

2 Samueli 3:3

Owokubiri yaaba Kileabu, inhina nga ni Abigaili namwandu wa Nabali ow'e Karumeli. Owokusatu yaaba Abusalomu, inhina nga ni Maaka, mughala wa Talumai eyali kyabazinga wa Geshuri.

2 Samueli 3:4

Owokuna yaaba Adoniya, inhina nga ni Haggithi. Owokutaanu yaaba Shefatia, inhina nga ni Abitali.

2 Samueli 7:12

Enaku dho bwe dhiriwaaku n'ofa, n'oja okweyimba ku badhaadha bo abaafa, ndikusikiza omulala ku baana bo beene be weezaalira, naamutaagho okuba kyabazinga era naaleetera obwakyabazinga bwe okukakata.

1 Bakyabazinga 1:25

Olwaleero luno lwene, ajiire yaaghaayo bino ng'omusengo: ente enume, ente entototo empiite ensavu n'entaama. Era ayese batabane bo boonaboona, ni Yoabu omuduumizi w'eigye, ni Abiathari kabona. Era bali eyo bali kulya era baanhwera mu maiso ge, nga bwe bakoba bati, ‘Ghangaala, kyabazinga Adoniya!’

1 Bakyabazinga 1:38

Agho Zadoki kabona, ni Nathani omulanzi, ni Benaia mutabane wa Yehoiada, ni bale abaakuumanga kyabazinga Abakerethi n'Abapelethi, baatyamya Solomoni ku nhumbu ya kyabazinga Daudi, yaagivuga era baaja naye e Gihoni.

1 Bakyabazinga 1:39

Nga bali eyo, Zadoki kabona yaaja mu Weema ey'Okwagaananirangamu ni Musengwa Katonda, yaatoolayo eiyiga ery'ensolo lye baatangamu omuzigo, yaatoolamu omuzigo, yaagusiiga Solomoni. Olwo baafuuwa eigwala, era abantu boonaboona baakoba bati: “Ghangaala kyabazinga Solomoni.”

1 Bakyabazinga 1:5

Agho Adoniya mutabane wa kyabazinga Daudi, ye yazaala mu mukazi ayetebwa Haggithi, yeekuluntaza ng'akoba mule ati: “Ninze ndidha okuba kyabazinga.” Era yeetegekerayo ebigaali eby'omu lutalo, n'abavuzi b'embalaasi, n'abasaadha amakumi ataanu ab'okumukuumanga.

1 Bakyabazinga 2:14

Era yaakoba ati: “Ndi ni kye nhenda okukukoba.” Bathisheba yaakoba ati: “Kyogere.”

1 Bakyabazinga 2:16

Kale, mpegaano ndi kukusaba ekintu kirala, era nkweghembye otakiinhima.” Bathisheba yaamukoba ati: “Kyogere.”

1 Bakyabazinga 2:22

Kyabazinga Solomoni yairamu inhina ati: “Lwaki oli kusabira Adoniya, Abishagi Omushunemi abe mukazi we? Musabire n'obwakyabazinga bwona, kuba ni mukulu wange, ate nga Abiathari kabona ni Yoabu mutabane wa Zeruia bali ku luuyi lwe.”

Ensambo 21:30

Amagezi, n'okutegeera era n'okugalagirwa, byonabyona tibisobola kutakania Musengwa Katonda ni bimusinga.

Danieli 2:22

Ayoleka ebintu eby'ekyama ebitaboneka; yaamanha ebiri mu nzikiiza, era mwene gh'aba n'obutangaavu ghe buba.