Pol One Towe eite Omo Rom maꞌe Lese Ausawi 8:38 - Saniyo-Hiyewe

^38-39 Ei Wanure! Etiri werese werese Owane Sitewi lo marepi erasi pefine a'i nomo ma'e ani erau fiyarisawirowata. Nomo temeniyeyei su, Owane Sitewi lai nomo ma'e marepi erasi pefine a'i lo au atuatu fiyarinamirowa. Nomo marepi hepene norohuwe irosiya ape, nomo aiwawe a'i Owane Sitewi lo marepi tote wawesiyesiya ape sahe, ironamisiya. Owane Sitewi lo ipari wisere a'i, sosu aiwawe a'i Satan lo sepei luwaru a'i, lowe werese Owane Sitewi lo marepi tote wawesiyesiya ape, nomo ani erau fiyarirowata. Etiri werese pereye nowe eite se irosiya ape, etiri werese nowe me'iye henerairowa ape, etiri werese ape mo Owane Sitewi lo marepi tote wawesiyesiya ape, nomo ma'e totesiya ape, ani erau fiyarirowata. Kairefiyei apou ape Owane Sitewi lo marepi tote wawesiyesiya ape, nomo ma'e totesiya ape, ani erau fiyarirowata. Etiri werese ni'arawe hire ma'e irosiya ape, etiri werese awei unahi irosiya ape, lowe aiwawe a'i Owane Sitewi lo marepi tote wawesiyesiya ape, nomo ma'e totesiya ape, ani erau fiyarirowata. Aiwawe a'i etiri werese werese omo pani werese irosiya ape, Owane Sitewi lo marepi erasi pefine a'i nomo ma'e ani erau fiyarisawirowata. Nomo Meni Owane Jisas Krais ne tote tawesi umasinamisiya su, Owane Sitewi lo marepi tote wawesiyenamisiya ape, nomo mase mi mi pasi pasi weriyei ironamitorowa.

Pol One Towe eite Omo Rom maꞌe Lese Ausawi 8:38 ပူးပေါင်းရင်းမြစ်များ

Jisas Krasi lo Peri Heneruwe, Jon leseteye ape ne 10:28

Sosu ane lowe werese ma'e marepi hepene he'i a'i aurowa. Serai lowe mi mi pasi pasi weriyei ironamitorowa. Lowe mi mi pasi pasi temeniyerowata. Lu tamo lowe ereti ano sahe ani tepa'asi anirowata.

Pol One Towe eite Omo Rom maꞌe Lese Ausawi 14:7

Nomo so'oruwesiya tene! Nomo lu taune werese marepi norohuwe irosiya ape, nomo marepi towafi nomo lo a'i tote se ta'ama. Aiwawe a'i nomo temeniyeyei ne toteyei su, nomo apou totere. Nomo temeniyeyei su, nomo marepi erasi a'i nine'i wisereyerowa. Ahowa, fene owe ape totere!

Pol One Towe eite Omo Rom maꞌe Lese Ausawi 14:8

Apou a'i nomo hepene norohuwe irosiya ape, hepene norohuwe ape meni Owane Sitewi Pefine lo ne. Sosu nomo temeniyeyei su, etiri ape aiwawe a'i Owane Sitewi Pefine lo ne. Serai nomo awei sato norohuwe irosiya ape mo, sosu nomo temeniyeye ape su, nomo werese Meni Owane Pefine a'i lo ne.

Pol One Towe eite Omo Rom maꞌe Lese Ausawi 4:21

Meni Abraham etiri ape so'oruwe a'i ne, “Owane Sitewi lai notosi ma'e te'e naneiyei lo ape au te'eye. Serai le a'i lai etiri ape notosi ma'e pefine a'i henerairowa.”

Pol One Towe eite Omo Rom maꞌe Lese Ausawi 6:23

Lu taune tamo yo seni luwaru a'i iroteye su, meni owane weriyei lowe lo lowe ma'e itiya'u temeniyerowa. Ahowa, Owane Sitewi Pefine a'i lai nomo ma'e etiri ta neri a'i auwe. Etiri ape lai nomo marepi hepene he'i a'i mi mi weriyei weriyei ironamitorowa. Serai nomo Owane Krais Jisas nate tawesisiya su, nomo mi mi pasi pasi weriyei ironamitorowa.

1 Korin 15:24

Sosu a'i pe nowe ye'ewi se Krais si tame itorairowa su, le lu taune werese pei au noweinoweinamite. Sosu le etiri werese awei sahe au iro po'uterowa. Nowe ape se le awei lo lu owane werese aine tera'erowa. Le awei lo lu owane lo peri einamirowa. Sosu le awei lo kairefi werese ani ararosawirowa. Le hi awei sahe ironamirowa su, le etiri werese au noweinoweirowa. Serai le Satan lo ai lu werese ape mo au ani ararosawirowa su, le lu taune werese au noweinoweiteye ape, le Owane Sitewi, Tai lo, ereti ma'e si itiya'u hene aitirowa.

2 Korin 11:14

Sawi amou! Wanure! Marepi ano hepene se su'ari ta'ame. Piyene awere? Satan lai sepei luwaru a'i ne. Le a'i lai ipari nihari wisere wou a'i mi erasi tewi mitaiyeyei ne atati arunati.

2 Korin 4:13

Tu naifa meni ta apou leseye, “Ane Owane Sitewi lo marepi tote tawesiye. Serai ane marepi lo au te'e fiyariye.” Sng 116:10 Nomo marepi lo aiwawe a'i tote tawesisiya. Serai nomo marepi apou ape aiwawe a'i tote tawesisiya su, nomo fene ma'e marepi apou ape au te'e fiyariyei.

Efesus 1:21

Owane Sitewi lai Krais meni Owane tutawe iro henerai. Awei lu owane, awei lu owane tutawe, ya'ariyei lu owane werese, lu kairefi a'i se le lai lowe werese hi ani araronamisiya. Etiri werese hi awei sahe irosiya ape, etiri werese mo'o henerairowa ape, Krais lai meni tutawe pefine a'i lowe werese ani araronamitorowa.

Kolosi 1:16

Jisas se Owane Sitewi lai etiri werese kairefi lo se au ta'aneteye. Etiri werese Owane Sitewi lo omo hire sahe irosiya ape, etiri werese hi awei sato irosiya ape, etiri werese nomo fara'u siyesiya ape, etiri werese nomo siye ta'ame ape, lu owane werese kairefi apou ape irosiya ape, lu owane werese lu taune au noweinoweisiya ape, Meni Owane Krais lai etiri werese werese ape mo au ta'aneteye. Etiri werese ape mo topo lo a'i ne.

Kolosi 2:15

Meni Owane Krais me tape'i sahe temeniyeye su, Owane Sitewi lai sepei Satan, sosu sepei luwaru werese a'i lo aine nayewe, hi ani ararowe. Le lu taune werese omo werese sahe apou au atuatuwe. Le lowe werese hi ani ararowe.

2 Timoti 1:12

Sosu Owane Sitewi lai ane ariariyeye su, serai lu tamo ane ma'e au luwaruwesiya. Ahowa! Ane neritaseyeyei se ta'ama. Wiyeme, ane le ne so'oruwesiya! Ane marepi lo umasinamisiya. Nowe weriyei weriyei se, Owane Sitewi lai peri farere a'i lo le ane ma'e auwe ape, le etiri ape au noweinoweinamiyei.

Hibru 11:13

Sosu a'i pe lu taune ape mo lowe Owane Sitewi ne tote tawesinamiteye. Peri te'e naneiyei werese lo, le lowe ma'e au te'e naneiye ape, le etiri ape mo ne wiyeme pefine a'i au iro henerairowa. Lowe hi awei sato iroteye su, lowe etiri ape mo Owane Sitewi lowe ma'e te'e naneiye ape, ani te ta'ame. Ahowa, lowe etiri werese ape mo eyeri yaro siyeteye su, marepi lowe lo tote wisereye nine'iteye. Sosu mo'o lowe ta'i ta'i a'i temeniyeye. Lowe lu taune werese ma'e apou te'e areiyeye. “Nomo hi awei sato ipari lu taune wou a'i irosiya.” Sosu mo'o lowe ta'i ta'i a'i temeniyeye

1 Pita 3:22

Jisas si tame sineye su, le Owane Sitewi lo omo hire ma'e wiye. Le Owane Sitewi lo ereti eyate feni ma'e onunamisiya. Owane Sitewi lai etiri werese Jisas unahi ma'e fuwe. Owane Sitewi lo ipari wisere a'i, ipari lo owane werese, sosu etiri werese kairefi a'i hire ma'e irosiya ape, Owane Sitewi lai lowe werese Jisas unahi ma'e funamiteye.