Matyu 10:15 - Saniyo-Hiyewe15 Ane peri wiyeme a'i fene ma'e au te'esiya. Wanure! Omo ta ape fene ma'e au luwaruweyei su, nowe ye'ewi su, lu taune omo ape sahe iroteye ape, Owane Sitewi lai lowe ma'e fofowei erasi luwaru a'i aurowa. Lu taune, omo Sodom, omo Gomora sahe iroteye ape, nowe ye'ewi su, lowe fofowei oso a'i teritetorowa.” အခန်းကိုကြည့်ပါ။ |
Matyu 10:15
22 ပူးပေါင်းရင်းမြစ်များ
Peri ano wiyeme a'i ne. Ane fene ma'e eisiya, Wanure! Owane Sitewi lo peri werese Moses leseye ape, mi mi pasi pasi weriyei ironamitorowa. Yo peri lo tewi oso oso a'i ape po'uterowata. Yo peri lo tewi werese werese pefine henerairowa. Awei pani werese, ni'arawe etiri werese hire ma'e irosiya ape, po'uterowa. Ahowa, Owane Sitewi lo yo peri werese po'uterowata.
Fene omo ta Owane Sitewi lo peri au te'e fiyariyei ne iyei su, lu taune ape mo peri fene lo wanu ta'ame, fene omo ape arunatire. Omo nowe ma'e iyei su, fene awei peperi lowe tahe sahe iroteyei ape ani ato periperenatiyei su, lu taune werese etiri ape siye so'oruwerowa. Owane Sitewi lai lowe ma'e ai marepi erasi a'i totesiya.”
Owane Sitewi Tai Pefine a'i ano, ane hi awei ma'e eimawe arosai ape, lo marepi apou wou a'i ne. Lu taune werese, Owane Sitewi lai ane ma'e auwe ape, ane lowe werese awera'iyenati ta'ame. Serai nowe ye'ewi su, ane a'i lai lowe werese si ta'ane norohuwe hene anirowa. Sosu marepi hepene he'i a'i aurowa. Lowe werese mi mi pasi pasi weriyei tei ironamirowa.
Owane Sitewi Tai Pefine a'i ano lo marepi apou wou tote te'eye, lu taune werese, eime lo siyeyei ape, sosu peri lo wanu tote tawesiyei ape, Owane Sitewi lai lowe werese ma'e marepi hepene he'i a'i aurowa. Sosu ane lai nowe ye'ewi se, lowe werese a'i si ta'ane norohuwe hene anirowa. Serai lowe mi mi pasi pasi weriyei tei ironamirowa.”
Nowe ta se henerairowa su, Owane Sitewi lai lu taune werese lo yo seni au hese ereirowa. Le yo seni werese au hese ereirowa su, marepi lo farere a'i ironamirowa. Tu naifa weriyei, le lai meni ta yo seni au hese ereiyei ne ariariyeye. Meni ape temeniyeye su, le meni ape si tame ta'ane norohuwe ani sineye. Serai le nomo werese ma'e marepi farere a'i lo au atuatuteye.”
Meni ta me tou hire ma'e etiri ape mo se ta'aneyei su, Owane Sitewi lai etiri lowe lo ape mo siye eti ereiyei. Nowe ta se etiri werese lowe lo amerame a'i heneraiyei. Owane Sitewi lai etiri werese lowe lo yehe arineyei. Etiri wisere ape mo kairefi a'i teinamiyei. Yehe ape etiri ape mo ti siyeyei. Meni ta lo wiyawi wisere a'i awere? Luwaru a'i awere?
Lu taune tamo lai lu taune tere'e mase ta'uweyei ne ta'oresiya. Serai nomo yo seni lowe lo owe ape umasite. Ahowa, nomo lu taune tiyati mase ta'uwenamite. Serai fene nowe ape se meni Owane Jisas si tame itoraiyei ne ataheyesiya ape, siye so'oruwesiya su, nomo lu taune marepi erasi a'i au tote wisereye tiyatite.
Aiwawe a'i tu naifa weriyei nowe mo'o tere'e se omo hesi a'i Sodom, sosu Gomora sahe lu taune werese yo seni luwaru a'i ironamiteye. Lowe yo seni luwaru a'i ironamiteye su, Owane Sitewi lai omo hesi ape ma'e yehe erasi a'i eimawe arosai. Yehe erasi ape lu taune werese werese a'i ti sero'o po'uteye. Meni ta'i a'i Owane Sitewi lai omo ape ma'e ei ani hene arosai. Lu taune, omo tere'e tere'e iroteye ape, siyeye su, lowe Owane Sitewi ne atoweiyeye. Serai lowe yo seni luwaru a'i apou ape iro ta'ame. Lowe apou toteye, “Nomo yo seni luwaru a'i irowei su, Owane Sitewi lai nomo aiwawe a'i yehe se ti sero'o po'uteyei.” Meni Lot yo seni aseyaro iroteye ape, lu taune lo tafa'e yo seni luwaru a'i siyeye su, le marepi orese a'i teriteteye. Serai Owane Sitewi lai meni ape omo Sodom nowe ma'e ei hene ani arosai.
Owane Sitewi Noa sosu Lot hene ani pati ferafereiye su, nomo etiri ta siye so'oruweye. Le fara'u lu taune Owane Sitewi lo marepi umasiteye ape, Owane Sitewi lai lowe au pati ferafereiyei. Lu tamo lowe ma'e au luwaruweyei ne toteyei su, Owane Sitewi lai lowe hene ani pati ferafereirowa. Ahowa, lu taune tere'e yo seni luwaru a'i ironamiteyei ape, sosu lowe Owane Sitewi ne me'iyeni ma'e atati tei awetowei su, le lai lowe ma'e pereye nowe eite se marepi orese a'i ausiya. Sosu nowe ye'ewi se, le lowe yehe omo ma'e eimawe arosawirowa.
Sa'i werese here foro'oweye su, Owane Sitewi apou eiye, “Ane lu taune werese sa'i se tame ani aporu temeniyerowata. Ahowa, etiri werese, hire ma'e irosiya ape, sosu etiri werese awei sahe irosiya ape, ane lai etiri werese ape mo yehe se taiso fu ti sero'o po'uterowa. Nowe ye'ewi su, ane lu taune werese yo seni luwaru a'i ironamiteye ape, yehe se etiri werese ape mo taiso fu ti sero'o po'uterowa.”
Sosu aiwawe, Owane Sitewi lo ipari tamo wiyawi lowe lo, Owane Sitewi lowe ma'e irowei ne auwe ape, awera'iyenatiyewe, iyape erasi heneraiyei ne toteye. Serai lowe omo lowe lo, Owane Sitewi lowe ne ariariyeye ape, arunati. Sosu Owane Sitewi lai lowe wafei se ereti, lowe sahe mi mi pasi pasi ti tawesinamiteye. Sosu le lowe yehe omo pasi a'i ma'e ani fu arosawi. Sosu nowe ye'ewi su, lowe Owane Sitewi ma'e teirowa. Sosu Owane Sitewi lai yo seni werese lowe lo au hese ereirowa.
Sosu tu naifa aiwawe a'i omo hesi a'i Sodom, Gomora, sosu omo tere'e tamo lowe atahe a'i iroteye ape, lowe tafa'e yo seni tere'e tere'e luwaruwenamiteye. Nowe mo'o su Owane Sitewi lai yehe taiso erasi a'i hire ma'e fu arosai. Serai lu taune werese omo hesi ape sahe yehe ti sero'o po'uteye. Owane Sitewi lai nomo ma'e au te'e atuatu areiyesiya. Serai lu taune werese yo seni luwaru a'i ironamisiya ape, Owane Sitewi lai lowe mi mi pasi pasi yehe taise ti sero'o po'utenamirowa. Lu taune werese apou ape siye so'oruwerowa.
ကြော်ငြာတွေ