Filipai 1:29 - Saniyo-Hiyewe

²⁹ Serai Owane Sitewi lai fene ma'e au ferafereiye. Serai fene lai Krais ne tote tawesiye. Fene Krais ne tote tawesisiya su, fene fofowei erasi a'i teriterowa. Sosu marepi orese a'i fene ma'e henerairowa. Serai fene Krais ne tote tawesiyei su, sosu fene fofowei erasi a'i teriterowa.

Filipai 1:29 ပူးပေါင်းရင်းမြစ်များ

Matyu 16:17

Sosu Jisas le ma'e itiya'u eiye, “Saimon, Jon lo meni eime, Owane Sitewi lai ne mase irosiya. Peri no ape lu lo marepi ma'e fai ta'ama. Ahowa, Tai ano, omo hire ma'e onunamisiya ape, le lai peri no ape marepi no papu au te'e atuatuteye.

Aposel 13:39

Meni ape se, lu taune werese Jisas ne tote tawesi umasiye ape, Owane Sitewi lai yo seni luwaru werese a'i lowe lo au ta'ane sasari pamoweye. Tu naifa Owane Sitewi lai yo peri lo, Moses ma'e auwe ape, yo peri ape yo seni luwaru a'i au ani sasari pamowerowata.

Aposel 14:22

Omo ape mo sahe lowesi lu taune werese lo marepi au te'e kairefiyeteye. Lowesi apou te'eye, “Fene Jisas lo marepi tote tawesite. Nomo werese Owane Sitewi lo marepi umasisiya su, etiri luwaru tomu ne'ese a'i nomo aiwawe henerairowa. Serai fene werese Jisas lo marepi tote tawesi umasite.”

Aposel 14:27

Omo Antiok henerai su, lowesi lu taune werese, Jisas lo peri umasiteye ape, te'e ta'uwe aniye. Sosu lowesi lowe ma'e Owane Sitewi lo etiri werese, ta'aneye ape, au te'e areiyeteye. Lowesi lowe ma'e au te'eye, Owane Sitewi lai lu taune tewi tere'e tomu ne'ese hene aniye. Serai lu taune tomu ne'ese Owane Sitewi lo marepi tote tawesi umasiteye.

Aposel 5:41

Lowe ta'uweyei wesi arunati su, lowe Owane Sitewi ne au te'e wisereye nine'iteye. Lowe Jisas lo iyape se neritase ta'ame. Serai lowe Owane Sitewi ma'e peri au te'e wisereye nine'iteye.

Pol One Towe eite Omo Rom maꞌe Lese Ausawi 5:3

Nomo Jisas Krais tote tawesiyei su, etiri luwaru a'i tamo nomo ma'e henerairowa. Ahowa, etiri luwaru a'i werese ape mo nomo ma'e henerairowa su, nomo aiwawe marepi wisereye nine'i ironamitorowa. Piyene awere? Awei yo seni luwaru a'i ape nomo ma'e heneraiyei su, marepi hepene nomo lo au ani tei kairefiyerowa.

Efesus 2:8

Fene Krais Jisas ne tote tawesi umasisiya su, Owane Sitewi lai fene ma'e ferafereiyei lo ape au atuatuwe. Sosu fene marepi hepene temeniyeteye ape awera'iyenatiyewe, le nomo ma'e marepi hepene he'i a'i aunamiye. Fene marepi hepene he'i aniyei ne ta'anerowata. Ahowa, fene Krais Jisas ne tote tawesi umasisiya su, Owane Sitewi lai fene ma'e neri a'i auwe.

Kolosi 2:12

Fene Meni Owane Krais ne tote tawesiye. Sosu mo'o meni ta fene sa'i au ani huwe. Sa'i au ani huwei ape lo peri sitewi apou te'esiya. Fene Krais aiwawe wou temeniyeye, fisiye yo papu aiwawe wou fuwe. Sosu Owane Sitewi lai Krais si tame ta'ane norohuwe sineye su, le kairefi lo se fene aiwawe wou a'i si tame norohuwe sineyei. Serai le meni Krais si tame norohuwe sineye su, le nomo werese ma'e kairefi lo au atuatu areiyeye.

Jems 1:2

Lu tamo fene ma'e au luwaruweyei su, fene marepi wisere a'i Owane Sitewi ma'e au te'e nine'inamite.

1 Pita 4:13

Fene Jisas lo wiyawi ta'aneyei su, fene fofowei ta'i ta'i a'i, fofowei le aiwawe a'i teriteyei. Lu taune tamo fofowei erasi a'i teriteyei. Lu taune tamo fofowei oso a'i teriteyei. Fene fofowei teriteye su, fene marepi wisere a'i totenamire. Serai nowe ye'ewi se Jisas Krais mitaiyeyei erasi mase pani awei amerame a'i ma'e itorairowa su, fene marepi wisere erasi a'i toterowa. Sosu fene Jisas lo iyape te'e ani arowerowa.