Aposel 10:42 - Saniyo-Hiyewe

⁴² Sosu le nomo ma'e apou eiye, ‘Fene lu taune werese ma'e te'e fiyarite. Ane meni ape, Owane Sitewi lai ariariyeye ape. Owane Sitewi lai ane ma'e kairefi lo se lu taune werese, temeniyeye ape, norohuwe irosiya ape, yo seni werese lowe lo au hese etirowa.’

Aposel 10:42 ပူးပေါင်းရင်းမြစ်များ

Jisas Krais lo Peri Heneruwe, Luk leseteye ape ne 16:28

Ane lu nairipi ereti feni werese (5) hi ma'e irosiya. Ne meni Lasarus nairipi ano te'e weiyai au te'eyei ne eimawe ito arosawire. Serai lowe fofowei erasi a'i, ane teritenamisiya ape, lowe yehe omo eite sahe fofowei erasi teriterairowata.’

Jisas Krais lo Peri Heneruwe, Luk leseteye ape ne 22:22

Peri ano wiyeme a'i ne! Wanure! Ei, ane, meni hire ma'e itorai ne. Nowe me'iye su ane temeniyerowa. Owane Sitewi lai wiyawi ano ape ariariyeye. Ahowa, meni ape ne weiyai! Meni ape ane ai lu ma'e henetirowa su, le marepi orese erasi a'i teritenamirowa.”

Aposel 1:2

Jisas awei sahe iroteye su, le Owane Sitewi lo Hepene Wara'i a'i se lu disaipel lo ma'e apou te'eye, “Fene omo omo werese ire! Lu taune werese ma'e peri ano au te'e atuatute.” Lu feni, Jisas lai ariariyeye ape, peri ape Owane Sitewi lo Hepene Wara'i a'i se wanuwe. Sosu Jisas temeniyeye. Mo'o Owane Sitewi lai si tame ta'ane norohuwe hene aniye su, lu disaipel lo ma'e saro henerai. Poweiye lu hesi werese (40) Jisas lu disaipel lo ma'e nowe poweiye tomu ne'ese saro henerai. Lowe Jisas siyeye su, lowe le ne marepi tote tawesiteye. Nowe poweiye saro henerai su, Jisas lu feni ma'e Owane Sitewi lo marepi werese au te'e atuatuwe. Sosu a'i pe nowe ta'i se Jisas lu feni ma'e saro henerai ape, le apou eiye, “Fene omo Jerusalem ma'e owe ape arunatire. Ahowa, weiya! Owane Sitewi lo peri te'e naneiyei, le fene ma'e au te'e naneiye ape, henerairowa. Ane lai fene ma'e tu au te'eye. Tu naifa Jon lai lu taune werese sa'i au huwe. Nowe oso a'i su, Owane Sitewi lai fene ma'e Hepene Wara'i a'i lo au hurowa.” Sosu Owane Sitewi lai Jisas hire ni'arawe ma'e wiye. Ane etiri werese ape mo one towe sahe lese tepa'asiye.

Aposel 1:8

Ahowa, Owane Sitewi lo Hepene Wara'i a'i fene papu wirai su, fene Owane Sitewi lo kairefiyeyei ape anirowa. Fene kairefiyeyei ape anirowa su, fene lu taune werese ma'e peri ano au te'e fiyarite. Fene lu taune werese ma'e omo Jerusalem sahe au te'e fiyarite. Sosu lu taune werese omo pani Judia au te'e fiyarite. Sosu lu taune werese omo pani Samaria au te'e fiyarite. Sosu lu taune ma'e omo omo werese eyeri ma'e au te'e fiyarite.”

Aposel 17:31

Nowe ta se henerairowa su, Owane Sitewi lai lu taune werese lo yo seni au hese ereirowa. Le yo seni werese au hese ereirowa su, marepi lo farere a'i ironamirowa. Tu naifa weriyei, le lai meni ta yo seni au hese ereiyei ne ariariyeye. Meni ape temeniyeye su, le meni ape si tame ta'ane norohuwe ani sineye. Serai le nomo werese ma'e marepi farere a'i lo au atuatuteye.”

Aposel 24:25

Sosu Pol yo seni aseyaro a'i, tahe lowesi lo, lowesi au noweinoweiteye ape, ne, au te'e areiyeye. Nowe ye'ewi se Owane Sitewi lai lu taune werese au hese ereirowa. Le etiri ape mo lowesi ma'e apou au te'e areiyeye. Feliks peri ape wanuwe su, le marepi erasi a'i atoweiyeye. Sosu le apou te'eye, “Fara'u peri te'e tepa'asire. Ne ire. Marepi ano toteyei su, ane ne si ei anirowa.”

Aposel 5:20

Owane Sitewi lo ipari wisere a'i ape lai lowe ma'e apou eiye, “Fene Owane Sitewi lo wesi tutawe sahe teiri. Sosu fene Owane Sitewi lo wesi tutawe teiyei su, fene lu taune werese ma'e peri he'i a'i eite au te'e fiyariye. Peri he'i eite, fene au te'e fiyariyei ape, Owane Sitewi lai marepi hepene he'i a'i lu taune ma'e aurowa.”

Pol One Towe eite Omo Rom maꞌe Lese Ausawi 2:16

Ane fene ma'e peri heneruwe ano au te'esiya, “Nowe ye'ewi se Owane Sitewi lai lu taune werese lo yo seni fareyareyei ironamiteye ape, au hese erei ameramerowa. Le Jisas Krais lo ereti se yo seni lowe lo au hese ereirowa.”

2 Korin 5:10

Nowe ye'ewi heneraiyei su, nomo werese Krais lo etiyei sahe teirowa. Werese ta'i ta'i a'i yo seni werese, nomo werese ta'i ta'i a'i irowe ape, le nomo ma'e etiri tamo auwei. Yo seni wisere a'i, nomo irowe ape, le nomo ma'e etiri ta wisere a'i aurowa. Sosu yo seni luwaru a'i nomo irowe ape, le nomo ma'e etiri luwaru a'i aurowa.

2 Timoti 4:1

Sosu a'i pe Krais Jisas si tame aiyerowa, le lu taune werese a'i au noweinoweirowa su, le a'i lai lu taune werese hepene norohu irosiya ape, au hese ereiyei. Sosu aiwawe a'i le lu taune tu temeniyeye ape, au hese ereirowa. Owane Sitewi, Krais Jisas aiwawe a'i lowesi lo nihe se, ane ne ma'e peri kairefi a'i au te'esiya.

2 Timoti 4:8

Serai ane temeniyeyei su, Owane Sitewi lai ane ma'e marepi hepene norohu neri a'i aurowa. Marepi hepene norohu he'i a'i apou a'i yo seni wara'i a'i auwei. Meni Owane Pefine a'i au heseyei siye meni nomo lo, le lu taune werese marepi wara'i a'i au hese ereirowa. Serai nowe ye'ewi se Owane Sitewi lai ane ma'e yo seni wara'i a'i aurowa.

1 Pita 4:5

Nowe ye'ewi se, lu taune ape mo Owane Sitewi lo nihe sahe teirowa su, lowe yo seni luwaru werese a'i le ma'e au te'erowa. Owane Sitewi lu taune etiyei nowe ape ta'uwe tepa'asiye. Lu taune werese temeniyeye ape, lu taune norohu irosiya ape, le yo seni luwaru a'i lowe lo au hese eti ereirowa.

Kamapim Tok Hait 1:7

Fene werese siyere! Le aitu sapu ponei mase itorairowa. Le si itorairowa su, lu taune werese pani pani irosiya ape mo, le siye anirowa. Lu ape mo le me tape'i sahe aine tawere tera'eye ape, lowe aiwawe a'i le siye anirowa. Lu taune pani pani werese sahe irosiya ape, le ne lu ewiterowa. Etiri werese ape mo pefine a'i henerairowa. Pefine a'i tene!

Kamapim Tok Hait 22:12

“Wanure! Ane i'ero witane a'i aiyerowa. Ane aiyerowa su, ane etiri tamo aitairowa. Lu taune tamo yo seni luwaru a'i ironamisiya ape, ane lowe ma'e fofowei erasi itiya'u aurowa. Lu taune yo seni wisere a'i ironamisiya ape, ane lowe ma'e wisere a'i itiya'u aurowa.