2 Pita 3:16 - Saniyo-Hiyewe

¹⁶ Pol fene ma'e apou lese ausawi, “Peri ano ape ane fene ma'e lesesiya. Jisas si tame itorairowa. Fene yo seni luwaru a'i me'iyeni ma'e atati arunatite. Fene Owane Sitewi lo marepi werese tote tawesi umasite.” Pol peri ape mo one towe sahe leseye su, peri lo eti kairefi a'i ne. Peri tamo erasi lo nomo lai wanu so'oruwerowata. Lu taune tamo Pol lo peri, sosu Owane Sitewi lo peri tere'e, atati ani te'e areareteye. Lu taune Owane Sitewi lo marepi siye so'oru ta'ama. Sosu lowe Owane Sitewi ne tote tawesiyei towafi lowe lo kairefi se ta'ama. Serai Owane Sitewi lai lowe werese yehe omo ma'e ani fu arosawirowa.

2 Pita 3:16 ပူးပေါင်းရင်းမြစ်များ

Matyu 15:3

Sosu Jisas lowe ma'e itiya'u eiye, “Fene lai piyene Owane Sitewi lo yo peri arisisiya awere? Fene ya'ariyei lo yo peri kairefiyeyei se tote tawesisiya. Ahowa, fene Owane Sitewi lo yo peri werese arisisiya.

Matyu 15:6

Fene ya'ariyei lo yo peri ape wanu umasiteye, fene Owane Sitewi lo yo peri wiyeme a'i ani ararowe. Ya'ariyei fene lo, lo yo peri apou eiye, ‘Fene mai tai fene lo lo iyape owe ape ei ani arowere.’ Marepi fene lo se Owane Sitewi lo peri yahowa'i henerai.

Matyu 22:29

Ahowa, Jisas lowe ma'e itiya'u eiye, “Marepi fene lo meremereye a'i ironamisiya. Fene Owane Sitewi lo peri lo sitewi so'oru ta'ama. Fene Owane Sitewi lo kairefi pefine siye so'oru ta'ama.

Filipai 3:19

Yo seni luwaru a'i, lowe umasinamisiya ape, lowe omo yehe ma'e henetirowa. Ahowa, lowe Owane Sitewi pefine a'i au wisereye nine'i se ta'ame. Lowe tahe pa'are lo marepi towafi lowe lo umasinamisiya. Lowe yo seni neritase a'i umasinamisiya. Lowe apou totesiya. “Nomo yo seni apou ape irowei su, tahe pa'are nomo lo wisere a'i teritesiya.” Lowe ya'ariyei lo yo seni weriyei totenamisiya. Serai fene yo seni luwaru apou ape lowe lo owe ape umasite.

Hibru 5:11

Meni Krais, au heseyei lo meni owane erasi pefine a'i nomo lo ne. Ane peri tomu ne'ese a'i ne fene ma'e te'eyei ne totesiya. Ahowa, piye peri tamo ane fene ma'e au te'eyei awere? Marepi fene lo peri ape wanu so'oru ta'ama. Serai peri lo sitewi ape ane fene ma'e eiwerou au te'erowa awere?

Jems 1:8

Meni ape marepi hesiyei se totesiya su, yo seni werese lo meremereye a'i ne.

1 Pita 1:1

Ane Pita Jisas Krais lo wiyawi ta'ane siye meni. Tu naifa le lai ane ariariyeye. Le lai ane peri lo au te'eyei ne eimawesawi. Ane one towe eite Owane Sitewi lo lu taune fene omo sitewi towafi lowe lo arunatiyewe, omo tere'e tere'e sahe faiyewe, irosiya. Fene lu taune omo pani Pontus sahe, sosu pani Galesia sahe, sosu pani Kapadosia sahe, sosu pani Esia sahe, sosu pani Bitinia sahe, ane fene ma'e one towe eite ausawisiya.

1 Pita 2:8

Sosu meni tere'e Owane Sitewi lo peri one towe sahe leseye, “Meni ape Owane Sitewi lai ariariyeye ape le wesi me tou kairefi wou a'i ne. Lu taune tamo me tou kairefi a'i ape se lowe apine ato tewiye awei sahe winetaiyei. Lowe le siyeyei su, lowe le ne neritaseyeye.” Ais 8:14-15 Piyene awere? Lowe Owane Sitewi lo peri wanuwe su, lowe Owane Sitewi lo peri arisinamisiya. Winetaiyei lowe lo ape, Owane Sitewi lai lo ne ariariyeye.

2 Pita 2:1

Tu naifa Owane Sitewi lo peri au te'e siye lu tamo peri wiyeme a'i au te'eye su, areareyei lu tamo henerai. Lowe god wawero a'i lo peri Israel lo lu taune ma'e au te'eteye. Aiwawe pereye a'i god wawero lo peri au te'e siye lu fene mase heneraiyei. Lowe peri wawero eresene a'i au te'e fareyare atuatusiya. Peri wawero lowe lo Owane Sitewi ne tote tawesiyei fene lo au luwaruweyei. Lowe Meni Owane Pefine a'i me'iyeni ma'e atati tei awetowe. Meni Owane Pefine a'i lai lowe itiya'u au ete tepa'asiye. Ahowa, lowe Meni Owane Pefine a'i me'iyeni ma'e atati awetowe. Lowe yo seni luwaru a'i apou ape iroteye su, nowe ye'ewi se Owane Sitewi lai witane a'i yehe omo ma'e eimawe arosawirowa.

2 Pita 2:14

Lu tewi god wawero lo peri au te'e siye lu, lowe taune werese siye wisereyesiya. Lowe yo seni luwaru a'i mi mi pasi pasi ironamisiya. Lu taune tamo marepi afofoweteye ape, lu areareyei a'i lai marepi lowe lo tatai aninamisiya. Ei, lu tewi ape mo ma'aru lo marepi erasi a'i totenamisiya. Wanure! Lu tewi ape mo luwaru a'i tene. Owane Sitewi lai lowe yehe omo ma'e ani fu arosawirowa.

2 Pita 3:14

Serai kaiyemo mo, fene nowe ape ne ninawesiya su, fene Owane Sitewi ne tote tawesiyei fene lo kairefi a'i teite. Fene yo seni werese fene lo aseyaro wara'i a'i fu ironamite. Fene Krais lo marepi fetane a'i kairefi teite. Meni Owane Pefine a'i si tame itorairowa su, le fene ne marepi wisere a'i totenamirowa.

2 Pita 3:2

Tu naifa weriyei Owane Sitewi lo peri au te'e siye lu aseyaro a'i, lowe Owane Sitewi lo peri lu taune ma'e au te'e fiyariye. Fene Owane Sitewi lo peri ape wanu tepa'asiye. Serai fene peri lowe lo ape tote anite tawesite. Aiwawe a'i lu ape mo, Owane Sitewi ariariyeye ape, le lai lowe Meni Owane Pefine a'i lo peri lu taune ma'e au te'e fiyariyei ne eimawesawi. Fene peri lowe lo wanuwe su, fene Jisas ne tote tawesi umasinamiteye. Serai fene peri lowe lo fu tote anite tawesite.

Jut 1:4

Lu luwaru a'i tamo fene ponei sahe ta'uwe fareyaresiya. Tu naifa weriyei Owane Sitewi lo peri au te'e siye lu tamo, lowe ne au leseye. Owane Sitewi lai yo seni lowe lo au hese erei tepa'asiye. Yo seni lowe lo apou a'i ne. Lu ape mo yo seni luwaru a'i ironamisiya. Lowe Owane Sitewi ma'e ai atu tiyatinamisiya. Lowe lai Owane Sitewi lo ferafereiyei atati arowesiya. Serai lowe fara'u taune tamo tafa'e yo seni luwaru a'i ironamirowa. Sosu lowe Jisas Krais, Meni Owane Pefine a'i nomo lo, sosu Meni Owane tutawe nomo lo me'iyeni ma'e atati tei arunatinamisiya.