1 Pita 5:8 - Saniyo-Hiyewe

⁸ Fene marepi hepene amerame a'i totere. Mi mi werese fene etiri werese siye etite! Meni airame luwaru fene lo ape, sepei Satan, le omo omo werese ma'e itero ani nehi uwei siya. Le yo pusi erauwe no'u erasi wou a'i ne. Yo pusi erauwe erasi ape fe tamo mo'o ani umasisiya. Le fe ape tomu tera'e ayei ne totesiya. Sepei Satan aiwawe a'i ne. Le lu taune lo tote tawesiyei au luwaruweyei ne totesiya.

1 Pita 5:8 ပူးပေါင်းရင်းမြစ်များ

Matyu 13:39

Meni ape wafei tohu so ta'aneyei awei sahe pasi a'i se ani teroso fiyariye ape, le sepei luwaru a'i iyape Satan. Nowe ape se wiyawi yahowa'i ani siye lu lo'u ani une aniyei ape, nowe ape se nowe ye'ewi, wiyawi yahowa'i ani siye lu apou wou a'i, Owane Sitewi lo ipari wisere a'i (ensel) ne.

Matyu 24:42

Serai fene werese nowe ape se ane, Meni Owane Pefine fene lo si tame itorairowa su, fene siye ninawe etinamite. Le si tame itorairowa su, nowe ape fene so'oru ta'ama.

Matyu 25:41

Sosu meni owane ape lu taune ereti opi feni sahe iroteye ape, le lowe ma'e eirowa, ‘Fene werese ane arunatire. Fene ma'e ire. Fene lu taune luwaru a'i ne. Fene Owane Sitewi lo yo pefine awera'iyenati. Serai Owane Sitewi lo ai marepi fene ma'e ironamitorowa. Fene ma'e weriyei weriyei tinamitorowa ape, Owane Sitewi lai au ta'ane ta'uweye. Sosu sepei Satan lu feni werese lo aiwawe a'i ma'e tinamitorowa.

Matyu 4:1

Sosu a'i pe Jisas Sa'i Mai Jordan arunatiyewe, Owane Sitewi lo Hepene Wara'i a'i omo pani tewi ariye a'i ma'e heneti. Saro ahe sepei Satan luwaru a'i Jisas areareyei ne toteye.

Matyu 4:11

Sosu sepei luwaru a'i Satan le arunatiyewe, fi. Owane Sitewi lo ipari wisere a'i le ma'e au pati ani kairefiyeyei ne itorai.

Krais lo Peri Heneruwe, Mak leseteye ape ne 4:15

Me so tamo yo mai tewiye ma'e winetaiyei su, apou wou a'i lu taune tamo Owane Sitewi lo peri wanuwei. Sepei luwaru a'i (Satan) lu taune ape mo ma'e witane a'i aiyeye su, Owane Sitewi lo peri ani tepa'asi anirowa. Serai lowe Owane Sitewi lo peri wanu tote tawesi umasirowata.

Jisas Krais lo Peri Heneruwe, Luk leseteye ape ne 21:34

Fene werese weiyai! Fene sa'i luwaru a'i owe ape ene a meremereyete. Fene awei lo marepi owe ape totenamite. Fene yo seni luwaru a'i eito eite irowei su, Owane Sitewi lo nowe ape fene ma'e witane a'i heneraiyei. Fe la'inau aiwawe a'i ne.

Jisas Krais lo Peri Heneruwe, Luk leseteye ape ne 21:36

Serai fene mi mi pasi pasi siye etire. Fene Owane Sitewi ma'e apou te'e towerinamite, ‘Owane Sitewi, ne nomo ma'e kairefiyeyei no aure. Serai nomo etiri werese luwaru a'i, henerairowa ape, awera'iyenatirowa. Sosu aiwawe a'i Jisas, meni ape tu hire ma'e itorai ape, le lai yo seni nomo lo au hese eti ereirowa su, nomo le ma'e neritase a'i se teirowata.’”

Jisas Krais lo Peri Heneruwe, Luk leseteye ape ne 22:31

Sosu a'i pe Jisas Pita ma'e eiye, “Saimon, Saimon, ne weiyai! Sepei Satan Owane Sitewi ma'e tote tawesiyei no ape ne ei toweriye. Le apou ei toweriye, ‘Ane Saimon Pita lo tote tawesiyei au hese siye etiyei. Tote tawesiyei lo meremereye a'i awere? Apou wou a'i menitani ta oro'oru kewi so ma'e au sasarisiya.’

Jisas Krasi lo Peri Heneruwe, Jon leseteye ape ne 8:44

Tai fene lo, sepei luwaru a'i Satan. Serai fene Satan lo yo seni umasiyei ne totesiya. Tu naifa weriyei le a'i lai aine tera'e siye meni wiyeme a'i tene! Peri wiyeme a'i marepi lo ironamirowata. Peri wiyeme wanure! Le a'i lai etiri werese wawero a'i au te'enamiye. Le peri wawero a'i au te'eyei su, le marepi topo lo umasiyei. Serai Satan peri wawero a'i iro siye meni. Peri wawero werese a'i le ma'e fai. Satan peri wawero lo aite tene.

2 Korin 2:11

Sepei Satan, meni ape hi ani ararowei su, le nomo aiwawe a'i au luwaruweyei. Ahowa, nomo meni ape lo yo seni luwaru a'i tote i'aneyei su, sepei Satan nomo ne au ani ararorowata. Ahowa, nomo Sepei Satan lo marepi siye so'oruwesiya tene! Le nomo werese ne hi au hi ani ararowei ne totesiya.

Efesus 4:27

Sepei luwaru a'i, iyape Satan, fene au ani luwaruweyei ne totenamisiya. Serene fene yo ta le ma'e fene au luwaruweyei ne owe ape aure!

Efesus 6:11

Owane Sitewi lo ai atuwei lo ipari tahe werese ani asire. Fene Owane Sitewi lo ai atuwei lo ipari tahe ani asiyei su, fene fara'u sepei Satan lo marepi areareye ape ma'e ai atu tiyatirowa.

1 Timoti 2:15

Serai taune werese Jisas Krais ne tote tawesiyei su, lowe fara'u eimane lowe lo auteirowa. Lowe yo seni werese aseyaro a'i irowei su, lowe lu taune werese ne marepi erasi a'i tote wawesiyeyei, sosu lowe etiri werese ape ne marepi momotei a'i irowei su, lowe marepi hepene he'i a'i anirowa.

1 Timoti 2:9

Ane taune werese ma'e, Owane Sitewi ne tote tawesiye ape, au te'esiya. Fene Owane Sitewi ipari tahe ani asiyei su, fene marepi eresene a'i tote etite. Fene mato towe asiyei su, fene etiri erasi a'i mato towe sahe leserowata. Fene tahe fene lo leseyei su, fene tahe erasi a'i owe ape lesete. Fene Owane Sitewi tahe ma'aru tomu ne'ese se owe ape etete. Fene nihari fene lo owe ape lese wisereyete.

1 Timoti 3:11

Sosu aiwawe a'i tani lowe lo ne, lu taune tere'e lowe ne marepi wisere a'i totenamite. Lowe lu taune werese ma'e peri luwaru a'i owe ape te'e narute. Yo seni werese lowe lo, lowe irosiya ape, apou a'i pei ironamite. Lowe etiri werese, lowe irowei ape, lowe marepi momotei a'i au ta'anerowa.

1 Timoti 3:2

Sosu Owane Sitewi lo wesi meni owane, le yo seni werese aseyaro a'i irote. Le tani ta'i naiture. Le sa'i meremereye a'i owe ape ate, ai peri werese owe ape te'ete. Lu taune werese meni ape ne erasi a'i toteyei. Lu taune wesi lo sewiyeyei ne aiyeyei su, le lowe ma'e ayei tamo au ene are. Meni ape lu taune werese fara'u au te'e atuatute.

2 Timoti 4:17

Ahowa! Meni Owane nomo lo ane mase teiteyewe, sosu marepi ano au kairefiyeye. Owane Sitewi lai ane ma'e au ani pati ferafereiye. Serai ane fara'u Owane Sitewi lo peri lu tewi tere'e ma'e au te'e fiyari areiyeteye.

Taitus 1:8

Ahowa, le meni isafi a'i ne. Le yo seni werese wisere a'i marepi erasi a'i fa totete. Le Owane Sitewi lo wiyawi au noweinoweiyei su, le marepi wara'i a'i irote. Owane Sitewi lo nihe se meni ape lo yo seni wara'i a'i ne. Le lu taune lo yo seni marepi wisere a'i se siye eti hesi ereire. Le Owane Sitewi ma'e au te'e wisereyeyei su, le marepi wisere a'i se au te'e wisereyete. Yo seni topo lo kairefi a'i se teite. Le yo seni lo yo hesi a'i ape owe ape umasite. Le Owane Sitewi lo peri werese a'i siye etite. Le Owane Sitewi lo peri wanu tote tawesi umasinamite.

Taitus 2:12

Nowe ape se le lai nomo ma'e apou au atuatunamisiya, nomo yo seni luwaru werese a'i me'iyeni ma'e pei atati arunatire. Nomo awei lo marepi werese a'i me'iyeni ma'e pei atati arunatite. Nomo yo seni aseyaro pei ironamite. Nomo marepi wisere a'i se yo seni nomo lo pei irote. Nomo Owane Sitewi ma'e marepi erasi a'i au totenamiyei. Serai yo seni nomo lo aseyaro a'i heneraiyei.

Taitus 2:2

Ne lu owane ma'e apou au te'ere, “Fene meremereye sa'i owe ape ate. Fene yo seni aseyaro a'i irote. Fene wiyawi ta'aneyei su, fene marepi wisere a'i se au irowei. Fene Owane Sitewi lo marepi kairefi a'i se umasinamite. Fene lu taune werese marepi erasi a'i tote wawesiyenamite. Marepi orese a'i fene ma'e heneraiyei su, fene kairefi a'i se teinamite. Serai fene marepi orese a'i ape hi ani ararowei.”

Taitus 2:4

Serai lowe menitani ta meni he'i naituwei ape, lowe apou au te'e atuatute, “Ne meni no ma'e marepi erasi a'i tote wawesiyenamite. Ne aiwawe a'i eimane werese ma'e marepi erasi a'i au tote wawesiye noweinoweinamite.

Taitus 2:6

Aiwawe a'i ne yo'orei lu ma'e apou au te'ere, “Fene werese marepi momotei a'i se tote irote.

Jems 4:7

Serai ane fene ma'e au te'esiya, fene Owane Sitewi unahi sahe fu ironamite. Fene sepei luwaru a'i Satan ma'e ai atu tei kairefiyenamite. Fene sepei luwaru a'i Satan ma'e tei kairefiyenamiyei su, le fene me'iyeni ma'e atati tei arunatirowawe, atoweiye iterotirowa.

1 Pita 1:13

Serai nowe weriyei weriyei marepi fene lo ta'uwe naneite. Fene yo seni fene lo siye etite. Ferafereiyei lo etiri werese Owane Sitewi lai fene ma'e aurowa ape, fene marepi tote eti tawesite. Nowe ye'ewi se Owane Sitewi lai Jisas lu taune ma'e amerame a'i au atuaturowa su, fene etiri werese ape mo aniyei ne ninawenamite.

1 Pita 4:7

Nowe ye'ewi ataheyewa. Serai fene marepi wisere a'i tote etire. Fene yo seni wara'i a'i irote! Fene marepi wisere a'i toteyei su, fene fara'u Owane Sitewi ma'e au te'e tiyatiteyei.

Kamapim Tok Hait 12:10

Sosu ane peri no'u erasi ta ni'arawe hire ma'e apou uteye ape wanuwe, “Pereye nowe eite se Owane Sitewi lai lu taune werese awei sahe eite mo si ete hene aniye. Owane Sitewi lo kairefi erasi a'i, omo ni'arawe hire ma'e irosiya ape, sosu Krais lo iyape erasi a'i amerame a'i henerai tepa'asiye. Piyene awere? Ipari luwaru a'i ape, Satan, Owane Sitewi lo lu feni werese ma'e mi mi pasi pasi weriyei Owane Sitewi nomo lo ma'e peri wawero apou au fu te'enamisiya ape, Owane Sitewi lai le hi awei sahe eito ani fu arosai.

Kamapim Tok Hait 12:12

Lu taune werese sosu etiri werese ni'arawe hire ma'e irosiya ape, fene nine'inamite. Ahowa, fene hi awei sahe irosiya ape, sosu sa'i sahe irosiya ape, Weiyai! Sepei luwaru pefine a'i hi awei ma'e itorai. Le ai marepi erasi a'i tote ironamisiya. Nowe lo le po'uteyei ape oso a'i irosiya. Le so'oruwe a'i ne. Serene le ai marepi erasi a'i totenamisiya.”

Kamapim Tok Hait 12:9

Serai haru luwaru erasi ape iyape Satan. Le sepei luwaru pefine a'i ne. Owane Sitewi le hi awei ma'e ani fu arosai. Tu naifa weriyei weriyei haru ape ironamiteye. Le lu taune ne'ese erasi au arearenamiteye. Serai Owane Sitewi lai haru ape hi awei se eito ani fu arosai. Sosu sepei luwaru werese a'i lo aiwawe a'i hi awei sahe ani fu arosai.

Kamapim Tok Hait 20:10

Yehe tapiye salfa sahe tisiye ape, sa'i eifariyai, sosu meni peri wawero a'i saro iroteye ape, Owane Sitewi lai sepei Satan aiwawe a'i hare ite yehe titeye apou ma'e ani fu arosawi. Sepei Satan ai lu werese ape mo au areareteye. Lowe hesi heta yehe harite sahe mi mi pasi pasi ironamitorowa. Lowe fofowei erasi pefine a'i teritenamitorowa.

Kamapim Tok Hait 20:2

Sosu le haru luwaru a'i ape ereti lo se anite tawesiye. Haru luwaru ape iyape tere'e, Sepei Satan tu naifa weriyei weriyei lu taune tomu ne'ese areareteye. Owane Sitewi lo ipari ape Satan lo ereti lowe wafei se ti tawesiteyewe, fisiye yo ape papu fu arosawi. Serai haru luwaru ape iyu menei tausen ta'i saro iroteye. Le fisiye ahi yo ti tawesiyewe, me fito fuwe. Serai sepei Satan lu taune werese arearerowata. Iyu menei tomu ne'ese (1,000) i tepa'asiyei su, Owane Sitewi lai sepei Satan nowe oso a'i nowe ma'e toso arosairowa.