1 Jon 5:7 - Saniyo-Hiyewe

⁷ Serai etiri hesi heta lai nomo ma'e Jisas ne te'e atuatu areiyesiya.

1 Jon 5:7 ပူးပေါင်းရင်းမြစ်များ

Matyu 17:5

Pita le ma'e peri ape au te'eteye su, Siyere! Ni'arawe mitaiyeyei erasi a'i se omo hire ma'e itoraiyewe, lowe werese napetu tawesiye. Sosu Wanure! Peri no'u erasi a'i ni'arawe sahe apou au te'eye, “Meni ape le meni eime ano ne. Ane le ne marepi erasi a'i tote wawesiyenamisiya. Le marepi werese ano umasinamisiya. Serai ane le ne au nine'inamisiya.”

Matyu 18:16

Ahowa, kaiyemo, le peri no wanu umasi se ta'ame su, ne meni ta'i tere'e, lu hesi le ma'e aiwawe yo seni luwaru a'i lo ape au te'e areiyeyei ne ire. Owane Sitewi lo one towe sahe apou leseye, ‘Lu hesi, lu hesi heta yo seni luwaru a'i au te'e areiyerowa. Serai lu taune werese peri wiyeme a'i, henerai areiyerowa ape siye so'oruwerowa.’ Lo 19:15

Matyu 28:19

Serai ane fene ma'e au te'esiya. Fene omo omo werese ma'e ire. Fene lu taune werese peri ano au te'e fiyarite! Lowe peri ano wanu tote tawesirowa su, lowe fara'u lu feni ano henerairowa. Lowe lu feni ano henerairowa su, fene fara'u lowe sa'i se au hurowa. Fene Owane Sitewi Tai Pefine lo iyape se, meni eime lo iyape se, Hepene lo wara'i a'i se, lowe ma'e sa'i se au hurowa.

Jisas Krasi lo Peri Heneruwe, Jon leseteye ape ne 1:1

Tu naifa weriyei weriyei peri pefine a'i ironamiteye. Etiri werese henerai ta'ama. Peri pefine a'i ape Owane Sitewi wiyeme a'i mase ironamiteye. Peri pefine a'i ape Owane Sitewi wiyeme tene!

Jisas Krasi lo Peri Heneruwe, Jon leseteye ape ne 10:30

Ane sosu Owane Sitewi Tai Pefine a'i ano notosi ta'i a'i henerai ne. Notosi marepi ta'i a'i ne. Notosi wiyawi ta'i a'i ta'anesiya.”

Jisas Krasi lo Peri Heneruwe, Jon leseteye ape ne 12:28

Owane Sitewi Tai Pefine a'i ano, ane fofowei erasi teriteyei su, ne lai iyape no ei ani arore.” Sosu Jisas peri eite au te'eye su, peri no'u hire ma'e fai ape apou eiye, “Ane mi mi pasi pasi weriyei iyape ano ei ani aronamiteye. Sosu aiwawe a'i ane mi mi pasi pasi weriyei iyape ano ei ani arorowa.”

Jisas Krasi lo Peri Heneruwe, Jon leseteye ape ne 14:17

Le lai peri werese werese wiyeme a'i ne. Lu taune werese, awei lo yo peri umasisiya ape, lowe Owane Sitewi lo Hepene Wara'i a'i anirowata. Serai lowe le ma'e siye anirowata. Ahowa, le fene papu ironamisiya. Serai fene le ne siye so'oruwesiya tene!

Jisas Krasi lo Peri Heneruwe, Jon leseteye ape ne 15:26

“Ane Owane Sitewi lo Hepene Wara'i, Owane Sitewi Tai Pefine a'i ano ma'e fai ape, fene ma'e eimawesaiyei. Le peri wiyeme a'i hepene ne. Le fene ma'e aiyeyei su, le fene ma'e au pati aniyei. Le lu taune werese ma'e ane ne au te'e fiyariyei.

Jisas Krasi lo Peri Heneruwe, Jon leseteye ape ne 5:26

Peri eite wiyeme a'i ne. Owane Sitewi Tai Pefine a'i lai hepene se ironamisiya. Serai aiwawe a'i le meni eime lo ma'e hepene se auwe. Serai meni eime lo lu taune werese ma'e hepene he'i a'i aurowa.

Jisas Krasi lo Peri Heneruwe, Jon leseteye ape ne 8:18

Ane a'i lai ane ne au te'e fiyarisiya. Sosu aiwawe a'i Owane Sitewi Tai Pefine a'i ano ane ne au pati te'e fiyarisiya. Notosi a'i ane ne au te'e fiyarisiya su, serai peri ano wiyeme a'i tene!”

Jisas Krasi lo Peri Heneruwe, Jon leseteye ape ne 8:54

Sosu Jisas itiya'u eiye, “Ane a'i lai iyape ano ei ani aroweyei su, iyape ano yahowa'i ne. Ahowa, Owane Sitewi Tai Pefine a'i ano iyape ano ei ani arowenamisiya. Fene apou eiye, ‘Owane Sitewi wiyeme a'i Owane Sitewi Tai Pefine a'i nomo lo tene!’ Peri no wawero a'i tene!

Aposel 2:33

Owane Sitewi lai Jisas ereti eyate feni lo se hene wi onuwe. Nowe pereye eite se Owane Sitewi lai le ma'e peri pefine a'i au te'e naneiye. Peri pefine a'i ape, Owane Sitewi lai au te'e naneiyei ape, Owane Sitewi lai Hepene Wara'i a'i lo hi awei ma'e eimawe arosa. Pereye fene lai Owane Sitewi lo Hepene Wara'i a'i siyeye. Fene lai ahi peri lo ape wanuwe.

Aposel 5:32

Nomo, Owane Sitewi lo Hepene Wara'i aiwawe a'i, nomo etiri ape mo siyeye. Lu taune ta'i ta'i a'i, peri lo tote tawesi umasiteye ape, Owane Sitewi lai Hepene Wara'i lo lu taune werese ape mo papu wiyei ne eimawe arosai.”

1 Jon 1:1

Meni ta tu naifa weriyei ironamiteye. Nomo peri lo wanuteye ape, sosu nomo le ma'e nihe nomo lo se siyeteye. Sosu nomo le ma'e siye etinamiteye ape, sosu nomo le ma'e ereti nomo lo se isawe hetesiyeteye. Meni ape apou wou a'i marepi he'i a'i lo peri ne nomo fene ma'e au te'e areiyesiya.

1 Jon 5:6

Meni ape Jisas Krais, lai awei hi ma'e henerai su, le sa'i ani huwe. Sosu le temeniyeye su, fisa'i topo lo au terosowe. Jisas hi awei ma'e itorai su, mai topo lo auteiye. Aiwawe a'i le omo hire ma'e itorai. Serai le sa'i se, sosu fisa'i topo lo se aiwawe a'i itorai. Peri ape wiyeme a'i tene! Owane Sitewi lo Hepene Wara'i apou a'i au te'e areiyesiya. Piyene awere? Apou a'i Owane Sitewi lo Hepene Wara'i pefine a'i ne.

1 Jon 5:8

Owane Sitewi lo Hepene Wara'i, sosu sa'i au huwe ape, sosu fisa'i topo lo ani terosowe ape, lowe hesi heta marepi ta'i a'i tote iroteye.

Kamapim Tok Hait 19:13

Ipari tahe pitase a'i fisa'i sahe ani aporuwe ape, ani asiteye. Iyape tere'e lo apou aiwawe a'i Owane Sitewi lo peri pefine a'i ne.